ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހާއި ޑިމޮކްރަޓްސް ލީޑުކުރައްވާ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެކުގައި ކުރިޔަށްދެވިދާނެ ގޮތަކާ ގުޅޭގޮތުން ފޯނުން މަޝްވަރާކުރައްވައިފިއެވެ.

އެމްޑީޕީގެ ތެރޭގައި އުފެދުނު ޚިޔާލު ތަފާތުވުންތަކާއެކު ޕާޓީން ވަކިވެވަޑައިގެން ޑިމޮކްރަޓްސްގެ ނަމުގައި ޕާޓީ ހިންގަވަމުންގެންދަވާ ރައީސް ނަޝީދު އެންމެ ބޮޑަށް ބާރުއަޅުއްވަމުން ގެންދަވަނީ ރިޔާސީ އިންތިޚާބުގެ ދެވަނަ ބުރުގެ ކުރިން މިމަހުގެ 25 ވަނަ ދުވަހު ނިޒާމީ ވޯޓު ނެގުމަށެވެ. އެކަމުގެ ނުރަސްމީ މަޝްވަރާތައް އެމްޑީޕީއާއެކު ކުރިޔަށްދާކަމަށް މީގެކުރިން ޑިމޮކްރަޓްސްއިން ވަނީ ބުނެފައެވެ.

ރިޔާސީ އިންތިޚާބަށް ކެމްޕެއިން ކުރެއްވުމަށް ހޯމަ ދުވަހު ދޮރުން ދޮރަށް ހިންގަވަން ނިކުމެވަޑައިގެން ނޫސްވެރިން ދެންނެވި ސުވާލުތަކަށް ޖަވާބު ދެއްވަމުން ރައީސް ސާލިހު ވިދާޅުވީ، ރައީސް ނަޝީދު ބޭނުންފުޅުވަނީ މިމަހުގެ 25 ވަނަ ދުވަހު ނިޒާމީ ވޯޓެއް ނެގުމަށްކަމަށާއި ނަމަވެސް އެއީ އެންމެ ޕްރެކްޓިކަލް ކަމެއް ކަމުގައި ނުވާނެ ކަމަށް ނަޝީދު އަރިހު ވިދާޅުވިކަމަށެވެ.

ނަމަވެސް ރިޔާސީ އިންތިޚާބުގެ ފަހުން ނިޒާމީ ވޯޓު ނެގޭނެ ތާރީޚަކާއި ގުޅޭގޮތުން މަޝްވަރާކުރެއްވިކަމަށް ރައީސް ވިދާޅުވިއެވެ. ރައްޔިތުންގެ މަޖިލީހަށް މިހާރު ހުށަހަޅާފައިވާ، ނިޒާމު ކަނޑައެޅުމާގުޅޭ ގަރާރަށް މަޖިލީހުން ގޮތެއް ނިންމުމުން އެކަމާ ގުޅޭގޮތުން ކުރިޔަށްދެވޭނެކަމަށް ރައީސް ވިދާޅުވިއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާއަށް ވަނީ، ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން ރައްޔިތުންގެ ޚިޔާލު ހޯދުމުގެ އާންމު ވޯޓެއް ނެގުމާ ގުޅޭގޮތުން ހުޅުދޫ ދާއިރާގެ މެމްބަރ އިލްޔާސް ލަބީބު ހުށަހަޅުއްވާފައިވާ ގަރާރަށް ބަހުސްކުރުމަށް އެޖެންޑާކޮށްފައެވެ. އިލްޔާސް ލަބީބު ހުށަހަޅުއްވާފައިވާ ގަރާރުގައި ވަނީ ނިޒާމީ ވޯޓު ނޮވެމްބަރ 30ގެ ކުރިން ނެގުމަށެވެ. މީގެ އިތުރުން ދެވަނަ ބުރުގައި ޑިމޮކްރަޓްސްއިން އަމަލުކުރާނެ ގޮތެއް ކަނޑައެޅުމަށް ހޯމަ ދުވަހުގެ ރޭ 9 ޖަހާއިރު ކައުންސިލް ބައްދަލުވުމެއް ބާއްވަން ވަނީ ނިންމާފައެވެ.

ގިނަ ދުވަސްތަކަކަށްފަހު ރައީސް ނަޝީދާއި ރައީސް ސާލިހު ވާހަކަދައްކަވާފައިވާއިރު، އެކަމާގުޅޭގޮތުން ރައީސް ވިދާޅުވީ، ދިމާވެގެން އުޅެނީ ސިޔާސީ ކަމެއް ކަމަށާއި ކުރިއެކޭ އެއްގޮތަށް ވާހަކަދެކެވުނުކަމަށެވެ. ދެ ބޭފުޅުން ފޯނުން ވާހަކަފުޅުދައްކަވާފައިވަނީ އާދިއްތަ ދުވަހުއެވެ. ރައީސް ސާލިހު ވިދާޅުވީ މާދުރުގައި ތިއްބެވިކަމުގެ އިހުސާސް ވެވަޑައިނުގަންނަވާ ކަމަށެވެ.