އެމްޑީޕީން އިތުރު މެންބަރުންތަކެއް ވަކިވެވަޑައިގަންނަވާ މަންޒަރު ފެނިވަޑައިނުގަންނަވާކަމަށް، މެންބަރު އަލީ ނިޔާޒުވެސް ވިދާޅުވި
މަޖިލީހުގެ ހޯރަފުށީ ދާއިރާގެ މެންބަރު، އަދި މަޖިލީހުގެ ނައިބު ރައީސް އަހުމަދު ސަލީމް
އެމްޑީޕީ ފެއިލްވިނަމަ، މަޖިލީހުގެ މެޖޯރިޓީގައި އެ ޕާޓީ ނޯންނާނެ ކަމަށާއި، އެމްޑީޕީއަކީ އަދިވެސް އެންމެ ވަރުގަދަ ޕާޓީކަމަށް, ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު އަދި މަޖިލީހުގެ ނައިބު ރައީސް އަހުމަދު ސަލީމް ވިދާޅުވެއްޖެއެވެ.
އެމްޑީޕީގެ ޕާލިމެންޓަރީ ގްރޫޕު (ޕީޖީ)ން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި، އެމްޑީޕީން ވަކިވެވަޑައިގެން، ވެރިކަން ކުރާ ޕީއެންސީއަށް 13 މެންބަރަކު ބަދަލުވެވަޑައިގަތުމާ ގުޅޭގޮތުން ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން މެންބަރު ސަލީމް ވިދާޅުވީ، އެމްޑީޕީގެ ޕީޖީ އޮތީ ވަރަށް ވަރުގަދަކޮށް ކަމަށާއި، ރައްޔިތުންގެ މަޖިލީހުގައި 43 މެންބަރުން ތިއްބެވި ޕާޓީއެއް އެމްޑީޕީ ނޫނީ ނެތްކަމަށެވެ.
ސަލީމް ވިދާޅުވީ 19 ވަނަ ރައްޔިތުންގެ މަޖިލިސްވެސް ނިންމާނީ އެމްޑީޕީގެ ޕާލިމެންޓަރީ ގްރޫޕް ވަރުގަދަކޮށް، އެކުގައި އޮވެގެން ކަމަށެވެ. އެހެންކަމުން "ފެއިލް" ވި ބަޔަކު ވަރުގަދަކޮށް އޮންނާނެ ކަމަށް ގަބޫލުނުކުރައްވާ ކަމަށާއި، އެމްޑީޕީއަކީ އަދިވެސް އެންމެ ވަރުގަދަ ޕާޓީގެ ގޮތުގައި ދެކެވަޑައިގަންނަވާ ކަމަށް ސަލީމް ވިދާޅުވިއެވެ.
އެއާއެކު އެމްޑީޕީގެ ތެރެއިން ވަކިވެ، ޑިމޮކްރެޓްސްގެ ނަމުގައި ޕާޓީއެއް އުފައްދަވައިގެން ބަދަލުވެވަޑައިގެންނެވި މެންބަރުންނާއި ޕީއެންސީއަށް ބަދަލުވެވަޑައިގެންނެވި މެންބަރުންނާއެކު، އެމްޑީޕީގެ ޕީޖީން އެކަތިގަނޑެއްގެ ގޮތުގައި ތިބުމަށް ކުރައްވަމުންގެންދަވާ މަސައްކަތްތަކާ ގުޅޭގޮތުން ނޫސްވެރިޔާ ސުވާލު ދެންނެވިއެވެ.
އެ ސުވާލަށް ޖަވާބު ދެއްވަމުން މެންބަރު ސަލީމް ވިދާޅުވީ، އެމްޑީޕީގެ ޕީޖީން ކުރި މަސައްކަތުގެ ނަތީޖާއަކީ 19 ވަނަ ރައްޔިތުންގެ މަޖިލީހުގެ އެންމެ ފަހު ދައުރާ ކުރިމަތިލާއިރުވެސް، އެމްޑީޕީއަކީ މަޖިލީހުގެ އެންމެ ވަރުގަދަ ޕާޓީގެ ގޮތުގައި އޮތުންކަމަށެވެ.
ސަލީމް އެފަދައިން ވިދާޅުވިއިރު، އެ ނޫސްވެރިންގެ ބައްދަލުވުމުގައި ހުޅުމާލޭ ދާއިރާގެ މެންބަރު އަލީ ނިޔާޒްވެސް ވަނީ އެމްޑީޕީން އިތުރު މެންބަރުންތަކެއް ވަކިނުވާނެކަމުގެ ޔަގީންކަން ދެއްވާފައެވެ.
އެގޮތުން ނިޔާޒް ވިދާޅުވީ ކުރިއަށްއޮތް ތަނުގައިވެސް މަޖިލީހުގެ މެޖޯރިޓީ އެމްޑީޕީއަށް ހިފެހެއްޓޭނެކަމަށާއި، އިތުރު މެންބަރަކު އެ ޕާޓީން ވަކިވެވަޑައިގަންނަވާ މަންޒަރެއް ފެނިވަޑައިނުގަންނަވާ ކަމަށެވެ.
