ދަ ޑިމޮކްރެޓްސްއިން އުޅުނީ ގާނޫނީ ބޮޑު ބަޣާވާތެއް ހިންގަންކަމަށް، މަޖިލީހުގެ ފޭދޫ ދާއިރާގެ އެމްޑީޕީ މެމްބަރު މުހައްމަދު ނިހާދު ވިދާޅުވެއްޖެއެވެ.
އާދިއްތަ ދުވަހު ނިހާދު ވިދާޅުވީ، ދަ ޑިމޮކްރެޓްސްއިން މަސައްކަތްކުރީ ރައްޔިތުންގެ މަޖިލީހުގެ ތެރެއިން ގާނޫނެއް ހުށަހަޅައިގެން ބަރުލަމާނީ ނިޒާމު ގެނެސް، އެ ނިޒާމުގެ ތެރެއިން ޑރ. މުހައްމަދު މުއިއްޒުއާ ވެރިކަން ހަވާލުނުކުރުމަށް ކަމަށާއި، މުޅި ނިޒާމު ބަދަލުކުރެއްވުމަށް ކަމަށެވެ.
ނިހާދު ވިދާޅުވީ ނަޝީދުގެ ވިސްނުންފުޅުގައި ހުރީ ވެރިކަން ވެއްޓުމުން، އެ ޖަޒުބާތުގައި ޖެހިވަޑައިގެން އެމްޑީޕީގެ މެޖޯރިޓީ މެމްބަރުންނާއެކު ވަޑައިގެން ބަރުލަމާނީ ނިޒާމު ގެނެސް، އެމްޑީޕީ މެމްބަރުންނަށް އިންތިޚާބަކާނުލައި އިތުރު ދެ އަހަރު ހޯދައިދީ، އެމްޑީޕީގެ ރައީސަށް އިތުރު ދެ އަހަރު ދީގެން އެކަން ކުރެއްވުމަށް ކަމަށެވެ.
ރައްޔިތުންގެ މަޖިލީހުގެ ތެރެއިން އެމްޑީޕީގެ މެމްބަރުން އެކަމަށް އެއްބާރުލުން ނުދިންކަމަށާއި، ޑރ. މުއިއްޒުއަށް ވެރިކަން ހަވާލު ނުކުރުމަށް މަސައްކަތްކުރީ ދަ ޑިމޮކްރެޓްސްއިން ކަމަށް ނިހާދު ވިދާޅުވިއެެވެ. އަދި އެ ދުވަހުވެސް އުޅުނީ ގާނޫނީ ބޮޑު ބަޣާވާތެއް ހިންގުމަށްކަމަށް ނިހާދު ތުހުމަތު ކުރެއްވިއެވެ.
އެމްޑީޕީގެ މެމްބަރުންގެ އަތުގައި އޮތް މަޖިލިސް މެޖޯރިޓީ ބޭނުންކޮށްގެން ގާނޫނު އަސާސީ އޮޅާލައި، ވެރިކަމުގެ ނިޒާމު ބަދަލުކުރަން ނުޖެހޭނެކަމަށާއި، އެކަމަށް އެމްޑީޕީން އެއްބާރުލުން ނުދޭނެކަމަށްވެސް ނިހާދު ވިދާޅުވިއެވެ. ރައްޔިތުން ބަސް ބުނެ، ޑރ. މުއިއްޒު ހޮވައިފިކަމަށާއި ރައްޔިތުންގެ ބަހަަށް އިހުތިރާމުކޮށް ބޯލަނބަންޖެހޭ ކަމަށް ނިހާދު ވިދާޅުވިއެވެ.
ނިހާދު ވިދާޅުވީ އެމްޑީޕީން، ރައްޔިތުންގެ މަޖިލީހުގެ ރައީސާވެސް އަދި އެހެން ބޭފުޅަކާވެސް ޒާތީވާންޖެހޭ އެއްވެސް ސަަބަބެއް ނެތްކަމަށެވެ.
