މަތިވެރި ދާއިރާގެ ރައްޔިތުންގެ މަޖިލިސް މެންބަރު ޙަސަން ޒަރީރަށް ޙަމަލާދިން މައްސަލައިގައި ހޯދަމުން ދިޔަ މީހާ، އޭނާ ހޯދަމުންދާތާ ހަފްތާއެއް ފަހުން އަމިއްލަ އަށް ފުލުހަށް ހާޒިރުވުމުން، ކްރިމިނަލް ކޯޓަށް ހާޒިރުކޮށް ބަންދުކުރަން އަމުރުކޮށްފިއެވެ.
ފުލުހުން ބުނީ ކ. މާލެ / މއ. ނައިޓްވިލާ، އިބްރާހީމް ޢަބްދުﷲ (32އ) ގެ ބަންދަށް 30 ދުވަސް ކްރިމިނަލް ކޯޓުން އަންގާރަ ދުވަހު ދީފައިވާ ކަމަށެވެ.
މަތިވެރި ދާއިރާގެ ރައްޔިތުންގެ މަޖިލިސް މެންބަރު ޙަސަން ޒަރީރަށް ޙަމަލާ ދީފައިވަނީ މެއި 1 ވަނަ ދުވަހު ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށެވެ.
ފުލުހުން ބުނީ އިބްރާހީމް ޢަބްދުﷲގެ މައްޗަށް ގްރޫޕް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގައި، މީހަކު މަރާލަން އުޅުނުކަމަށް ތުހުމަތުކުރެވޭ ކަމަށެވެ.
އަދި އޭނާ ހޯދަމުން އައީ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުންދާ، ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގައި، މީހަކު މަރާލަން އުޅުުނުކަމަށް ތުހުމަތުކުރެވޭ މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކުރުމަށް ޓަކައި ކަމަށް ވެސް ފުލުހުން ވަނީ ބުނެފައެވެ.
ފުލުހުން މައުލޫމާތު ދިން ގޮތުގައި މެންބަރު ޒަރީރަށް ހަމަލާ ދީފައިވަނީ ނުރައްކާތެރި ހަތިޔާރެއްގެ ގޮތުގައި ބެލެވިދާނެ އެއްޗެއް ބޭނުންކޮށްގެންނެވެ. ނަމަވެސް ޙަމަލާއާ ގުޅިގެން މެންބަރު ޒަރީރަށް ސީރިއަސް އަނިޔާއެއް ލިބިފައެއް ނުވެއެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
