ސީޒަން ފެށިއިރު ގަދަ ހަތަރަކަށް އަމާޒެއް ނުހިފަން: ހޯވް

ސީޒަން ފެށިއިރު ގަދަ ހަތަރަކުން ޖާގަ ހޯދަން އަމާޒު ނުހިފާކަމަށް ނިއުކާސަލް ޔުނައިޓެޑުގެ ކޯޗު، އެޑީ ހޯވް ބުނެފިއެވެ.

އިނގިރޭސި ޕްރިމިއަރ ލީގުގައި ލެސްޓާ ކައިރިން ޕޮއިންޓެއް ހޯދާ، ނިއުކާސަލްއިން ގަދަ ހަތަރެއްގެ ޖާގަ ކަށަވަރު ކުރީ ހޯމަ ދުވަހުއެވެ. މިއީ 2003 ވަނަ އަހަރަށްފަހު، ނިއުކާސަލް އަށް ޗެމްޕިއަންސް ލީގު ކުޅުމަށް ފުރުސަތު ލިބުނު ފުރަތަމަ ފަހަރެވެ.

ހޯވް ޓީމާ ހަވާލުވީ 2021 ވަނަ އަހަަރު ނޮވެންބަރުގައެވެ. އޭނާ ހަވާލުވި އިރު، ޓީމު އޮތީ ރެލިގޭޝަނުގެ ބިރާއެކު ތާވަލުގެ 19 ވަނައިގައެވެ. އޭނާ ބުނީ އަމާޒަކީ ގަދަ ހަތަރެއް ނޫންކަމާ، ނިމުނު ސީޒަނަށްވުރެ ރަނގަޅު ނަތީޖާއެއް ހޯދުންކަމެވެ.

މެޗު ނިމުމަށްފަހު ވާހަކަ ދައްކަމުން ހޯވް އިތުރަށް ބުނީ، އަމާޒު ކަނޑަނޭޅިޔަސް ގަދަ ހަތަރަކަށް އެރުމަކީ ހުވަފެނެއް ކަމަށެވެ. ނަމަވެސް، ކުރީ ސީޒަނުގައި ރެލިގޭޝަނުން ސަލާމަތްވުމަށް މަސައްކަތް ކުރަން ޖެހުމުން އެކަމަށް ތައްޔާރަށް ތިބިކަމުގެ އިހުސާސް ނުކުރެވޭ ކަމަށް އޭނާ ބުންޏެވެ.

37 މެޗު ކުޅެވުނު އިރު ނިއުކާސަލް އޮތީ 70 ޕޮއިންޓާއެކު ތިންވަނައިގައެވެ. ހަތަރު ވަނައިގައި މެންޗެސްޓަރ ޔުނައިޓެޑަށް އެއް މެޗު މަދުން ކުޅެ، ލިބިފައިވަނީ 69 ޕޮއިންޓެވެ. ނިއުކާސަލް ޖާގަ ކަށަވަރުކޮށްފައިވާއިރު، ޔުނައިޓެޑާ ވާދަކުރަނީ 66 ޕޮއިންޓާއެކު ލިވަޕޫލްއެވެ. ޗެމްޕިއަންސް ލީގު ޖާގަ ކަށަވަރުކުރުމަށް ޔުނައިޓެޑް ބޭނުންވަނީ އެންމެ ޕޮއިންޓެކެވެ.