އޭޝިޔާގެ ފުޓްބޯޅައިގެ ގަދަ ބާރުތަކާ އެއް ހަމައެއްގައި ފައިތިލަސާބިތު ކުރުމަކީ ފަރުބަދައެއް ކެނޑުން ފަދަ ކަމެއް ކަމަށާއި ނަމަވެސް އެކަމަށް މަސައްކަތް ކުރަންޖެހޭ ކަމަށް ގަތަރުގެ އައު ކޯޗު ކާލޮސް ކުއެރޯޒް ބުނެފި އެވެ.
ޕޯޗުގަލް އާއި ރެއާލް މެޑްރިޑް އަދި މިސުރާއި އިރާނުގެ ކޯޗުކަން ވެސް ކުރި ތަޖުރިބާކާރު ޓީމާ ހަވާލުވީ ވޯލްޑްކަޕަށް ފަހު އެވެ. ގަތަރުން އުއްމީދުކުރި ގޮތާ ހިލާފަށް އެންމެ އަވަހަށް މުބާރާތުން ކެޓި ޓީމަކަށް ގަތަރުވުމުން ކޯޗުކަމުން ސްޕޭނުގެ އެލެކްސް ސަންޗޭޒް ވަކިކޮށް ކުއެރޯޒް ގެނައީ ތަޖުރިބާކާރު ލައްވައި ޓީމު އަލުން ބައްޓަން ކުރުވުމަށެވެ.
އޭނާގެ ފުރަތަމަ މުބާރާތަކަށްވާނީ ކޮންކާކަފް ގޯލްޑްކަޕެވެ. މި މުބާރާތަށް ކުއެރޯޒް އެކުލަވާލި ސްކޮޑުން ވަނީ ނަން މަޝްހޫރު އަދި ދުވަސްވީ ގިނަ ކުޅުންތެރިން ދޫކޮށްލައިފަ އެވެ. އޭނާ ބުނީ ބޭނުންވަނީ ގަތަރުގެ ގައުމީ ޓީމު ވަރުގަދަ ކުރުމަށް ކަމަށާއި އެއް މަގާމަށް މަދުވެގެން ހަމަ ކުޅުންތެރިއަކު ވާދަކުރަން ބޭނުންވާ ކަމަށެވެ. މަޝްހޫރު ކުޅުންތެރިންތަކެއް އުނިކޮށް ޒުވާން ސްކޮޑެއް ނެގީ މިހެންވެ ކަމަށާއި މިއީ ހައިރާންވާންވީ ކަމެއްނޫން ކަމަށެވެ.
ޓީމުން ވަކިކުރި ކުޅުންތެރިންގެ ތެރޭގައި ކެޕްޓަން ހަސަން އަލް ހައިދޯސް އާއި ޕެޑްރޯ މިގުއެލް، އަކްރަމް އަފީފް، ކަރީމް ބައުދިއާފް، އަބްދުލް އަޒީމް ހާތިމް ފަދަ ކުޅުންތެރިން ހިމެނެ އެވެ.
"ޓީމަށް ޒުވާން ކުޅުންތެރިންތަކެއް މިއައީ އެމީހުންގެ (ކުލަބު މެޗުތަކުގައި) ދެއްކި ކުޅުމުގެ ސަބަބުން. ކުރިއަށް އޮތްތަނުގައި ވެސް ޓީމަށް ބަދަލު އަންނާނެ. އަހަރެން ބޭނުންވަނީ އެއް މަގާމަކަށް މަދުވެގެން ހަ ކުޅުންތެރިއަކު ވާދަކުރަން. އަދި ސްކޮޑުގައި ވާދަވެރިކަން އޮތުމަށް. އެއިރުން ޓީމު ވަރުގަދަވާނީ،"ކުރެރޯޒް ބުންޏެވެ.
އޭނާ ބުނީ މި ފަހަރުގެ ޓީމުގައި ހިމެނުނު ގިނަ ކުޅުންތެރިންނަކީ މިހާތަނަށް ގައުމީ ޓީމަށް މެޗެއް ނުވަތަ ދެ މެޗެއް ކުޅެދީފައިވާ ކުޅުންތެރިން ކަމަށެވެ.
"މިއީ ހަމައެކަނި އަހަރެންގެ ލޮލުން ބަލައިގެން ކުރި ކަމެއްނޫން. އަހަރެން ބޭނުންވަނީ މި ކުޅުންތެރިންނަށް އިތުރު ފުރުސަތުދޭނެ. އަހަރެން ހުރިހާ ދުވަހަކު ޒުވާން ކުޅުންތެރިންނަށް ގައުމީ ޓީމުގެ ދުރު ހުޅުވިފައި ހުންނާނެ. ހަގީގަތުގައި އަހަރުމެން މިއޮތީ އޭޝިޔާގެ ހަ ވަނާގައި. އަހަރުމެންނަށްވުރެ ކުރީގައިވާ ގައުމުތަކަށް ބަލާއިރު މި ތިބީ ޖަޕާން، ދެކުނުކޮރެޔާ، އޮސްޓްރޭލިޔާ، ސައޫދީ އަރަބިއާ، އިރާން ފަދަ ގައުމުތައް. މި ޓީމުތަކާ އެއް ހަމައެއްގައި ތިބުމަކީ ފަރުބަދައެއް ކެނޑުންފަދަ ކަމެއް. އެކަން ކުރެވޭނީ އެހިސާބަށް ދެވޭނެ ކަމަށް ގަބޫލުކޮށް މަސައްކަތް ކޮށްގެން،"ކުއެރޯޒް ބުންޏެވެ.
އޭނާ ބުނީ އެންމެ ފުރަތަމަ ކަމަކީ 2019 ވަނަ އަހަރު ކާމިޔާބުކުރި އޭޝިއަން ކަޕް ކާމިޔާބު ކުރުމުން ކަމަށާއި ނަމަވެސް އޭނާގެ ހަގީގީ ޓާގެޓަކީ 2026 ވަނަ އަހަރުގެ ވޯލްޑްކަޕަށް ޓީމު ކޮލިފައިކޮށްދިނުން ކަމަށެވެ.
