ސާފް ޗެމްޕިއަންޝިޕަށް ރާއްޖެ މިރޭ ޕްރެކްޓިސް ފަށަނީ
21 މެއި 2023 | އާދީއްތަ 06:53ޕްރެކްޓިސް ފަށާނީ 30 ކުޅުންތެރިންނާއެކު
ރާއްޖެ އާއި ލަންކާ ބައްދަލުކުރި މެޗުގެ ތެރެއިން
ސާފް ޗެމްޕިއަންޝިޕް ފުޓްބޯޅަ މުބާރާތަށް ދިވެހި ގައުމީ ޓީމު މިރޭ ޕްރެކްޓިސް ފަށަން ނިންމައިފި އެވެ.
އަންނަ މަހުގެ 21 އިން ޖުލައި ހަތަރަކަށް ބާއްވާ މުބާރާތަށް ރާއްޖޭގެ ސީޒަން މެދުކަނޑާކީ ޕްރެޒިޑެންޓްސް ކަޕާއި ދިވެހި ޕްރެމިއާ ލީގުގައި ކޮންމެ ޓީމެއް ތިން މެޗު ކުޅުމަށްފަހު އިއްޔެ އެވެ.
މި މެޗުތަކަށް ފަހު ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ އާއި އޭނާގެ އެހީތެރިން ވަނީ 30 ކުޅުންތެރިންގެ ސްކޮޑެއް އެކުލަވާލައިފަ އެވެ. މި ކުޅުންތެރިން މިރޭ ގަލޮޅު ދަނޑަށް ނުކުންނައިރު މުބާރާތުގެ ކުރިން ރާއްޖެ ދަނީ އެކުވެރިކަމުގެ މެޗުތަކަކާއި ރާއްޖޭގެ ބޭރުގައި ކޭމްޕް ކުރުމަށް ވެސް މަސައްކަތް ކުރަމުންނެވެ.
ސާފް ޗެމްޕިއަންޝިޕުގައި މި ފަހަރު ރާއްޖެ ހިމެނެނީ ލުބުނާނާއި ބަނގްލަދޭޝް އަދި ބޫޓާނާއެއް ގްރޫޕެއްގަ އެވެ. މުބާރާތުގައި ދެން ހިމެނޭ ގްރޫޕުގައި ހިމެނެނީ ޗެމްޕިއަން އިންޑިޔާ އާއި ޕާކިސްތާން އަދި ކުވޭތާއި ނޭޕާލެވެ.
