އެސްޓަން ވިލާ މެޗަށް ކްލޮޕް ސަސްޕެންޑް ކޮށްފި

އިނގިރޭސި ޕްރިމިއަރ ލީގުގައި އެސްޓަން ވިލާ އާ ދެކޮޅަށް ނިކުންނަ މެޗަށް ލިވަޕޫލްގެ ކޯޗު ޔާގަން ކްލޮޕް ސަސްޕެންޑްކޮށްފިއެވެ.

ކްލޮޕް ސަސްޕެންޑް ކުރީ 30 އެޕްރީލްގައި ޓޮޓެންހަމް ކައިރިން 4-3 ން މޮޅުވި މެޗުގައި ރެފްރީއާ ގުޅޭގޮތުން މީޑިއާގައި ދަައްކާފައި ހުރި ވާހަކަތަކާ ގުޅިގެނެވެ. އެއް މެޗަށް ސަސްޕެންޑު ކުރިއިރު، ޖޫރިމަނާ ގޮތުގައި 75,000 ޕައުންޑް ދައްކަން ޖެހެއެވެ.

ޓޮޓެންހަމް މެޗަށްފަހު ކްލޮޕްގެ ފާޑުކިޔުން ރެފްރީ ޕޯލް ޓިއާނީއަށް އަމާޒުވީ ކްލޮޕަށް ރީންދޫ ކާޑު ދެއްކުމުންނެވެ. ކްލޮޕަށް ކާޑު ދެއްކީ އެ މެޗުގެ ފަހު ވަގުތު ޑިއޯގޯ ޔޮޓާ ލަނޑު ޖެހުމުން ހަތަރުވަނަ އޮފިޝަލް، ޖޯން ބްރޫކްސް ކުރިމަތީގައި އުފާ ފާޅުކުރުމުންނެވެ. ކްލޮޕް ބުނީ ލިވަޕޫލް އާ ދެކޮޅަށް އެއްވެސް ކަމެއްނެތޭ ޓިއާނީ ބުންޏަސް، ގަބޫލުކުރަން ދަތިކަމަށެވެ. އަދި 2021 ވަނަ އަހަރުގައިވެސް ޓޮޓެންހަމް އާއެކު ކުޅުނު މެޗުގައި ހެރީ ކޭން އަށް ދައްކަން ޖެހޭ ރަތް ކާޑެއް ޓިއާނީ ނުދައްކާ ވާހަކަ ކްލޮޕް ބުންޏެވެ.

އިނގިރޭސި އެފްއޭ އިން ކްލޮޕް ދެ މެޗަށް ސަސްޕެންޑް ކުރިނަމަވެސް، ކްލޮޕް މާފަށް އެދިފަ ސިޓީއެއް ފޮނުވުމުން އޭގެތެރެއިން އެއް މެޗުގެ ސަސްޕެންޝަން ވަނީ އުނިކޮށްފައެވެ. އެ ސިޓީގައި ކްލޮޕް ބުނެފައިވަނީ އެ ގަޑީގަ އަމަލުތައް ހުރީ ރުޅި އައިސްގެންނާ ޖަޒުބާތުގަޖެހިގެން ކަމަށެވެ. އަދި އެއީ ކާޑު ދައްކަން ޖެހޭވަރު ކުށެއްކަން ގަބޫލުކޮށްފައިވެއެވެ.

ބާކީ ދެ މެޗު އޮތް އިރު ލިވަޕޫލް އޮތީ ފަސް ވަނައިގައެވެ. ގަދަ ހަތަރަކަށް އެރޭނީ މެންޗެސްޓަރ ޔުނައިޓެޑް ނުވަތަ ނިއުކާސަލް އިން ޕޮއިންޓު ގެއްލުވާލައިފިނަމައެވެ.