މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ) ގެ ރައީސް، ރައީސް މުހައްމަދު ނަޝީދާ މެދު ފިޔަވަޅު އަޅަން ދަތި ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒް މިފަދައިން ވިދާޅުވީ ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
އެގޮތުން ރައީސް ނަޝީދަށް ތާއިދުކުރައްވާ އެމްޑީޕީގެ ކުރީގެ މެންބަރުން ފިކުރެއްގެ ދިރުމުގެ ނަމުގައި އައު ސިޔާސީ ޕާޓީއެއް އުފައްދަވާނެކަމަށް އިއުލާންކުރައްވާފައިވުމާއެކު، މި ކަމުގައި އިސްކޮށް ހުންނަވަނީ ރައީސް ނަޝީދު ކަމަށް ވާތީ، އެމަނިކުފާނާމެދު ޕާޓީން ފިޔަވަޅު ނާޅަނީ ކީއްވެގެންތޯ ނޫސްވެރިން ސުވާލުކުރެއްވުން ފައްޔާޒު ވިދާޅުވީ ނަޝީދަށް ފިޔަވަޅު އަޅަން ދަތިވި ނަމަވެސް, އިސްކުރައްވާނީ ޕާޓީގެ މަސްލަހަތު ކަމަށެވެ.
ތިން އަހަރާއި ބައި ވަންދެން ނަޝީދަށް ތާއިދުކުރައްވާ މެންބަރުންނާމެދު ފިޔަވަޅު އަޅަން ބޭނުންވެވަޑައިނުގަންނަވާ ކަމަށް ފައްޔާޒު ވިދާޅުވިއެވެ. އަދި ބެއްލެވީ މަސްލަހަތަށް ކަމަށާއި އަދިވެސް ފިޔަވަޅު އަޅުއްވަން ބޭނުންވެވަޑައިނުގަންނަވާ ކަމަށް ވިދާޅުވިއެވެ.
މެންބަރުންނާމެދު ފިޔަވަޅު އަޅަން ޖެހިއްޖެ ހާލަތެއްގައި ފިޔަވަޅު އަޅުއްވާނެކަން ފާހަގަކުރައްވާ ފައްޔާޒު ވިދާޅުވީ އެ ހާލަތަކީ ބަޣާވާތަށް ގޮވާލާ ހިސާބު ކަމަށެވެ. ޕާޓީ އެއްބައިކުރަން ވަރަށް މަސައްކަތް ކުރެއްވި ކަމަށާއި އެ މަސައްކަތުގައި ފެއިލް ވެވަޑައިގެންނެވި ކަމަށް ވެސް ފައްޔާޒު ވިދާޅުވިއެވެ.
ޕާޓީ އެއްބައިކުރަން އުޅުއްވިއިރު، ދިމާވީ އެއް ނުވެވޭވަރުގެ ކަންތައްތައް ކަމަށާއި އެއީ ވެރިކަމާއި ގުޅުންހުރި ކަންތައްތައް ކަމަށް ފައްޔާޒް ވިދާޅުވިއެވެ. ޕާޓީ އެއްވާން އޮތީ ރައީސް ނަޝީދަށް ރިޔާސީ ޓިކެޓް ދީގެން ކަމަށް ވެސް ފައްޔާޒު ފާހަގަކުރެއްވިއެވެ. އަދި ޕާޓީ ހިންގާނީ ވަކި ބޭފުޅެއްގެ މައްޗަށް ނޫން ކަމަށް ވެސް ވިދާޅުވިއެވެ.
އެމްޑީޕީން މެންބަރުން ވަކިވިޔަސް ޕާޓީގެ ކުރިމަގަށް އެއްވެސް ގެއްލުމެއް ނުވާނެ ކަމަށާއި އެއްވެސް މީހަކަށް ޕާޓީއަށް ދެވޭނެ އިތުރު ގެއްލުމެއް ނެތް ކަމަށް ފައްޔާޒް ވިދާޅުވިއެވެ.
ފައްޔާޒު ވިދާޅުވީ މިހާރު ކޮންމެވެސް ވަރަކަށް ޕާޓިގެ މެންބަރުން ވަކިވާނެ ކަމަށާއި ނަމަވެސް އެއަށް ވުރެ ގިނަ މެންބަރުން ޕާޓީއަށް ވެއްދޭނެ ކަމަށެވެ. އަދި ވަކިވި މެންބަރުން ޕާޓީއަށް އަލުން ވަޑައިގެންފިނަމަ މަރުހަބާ ވިދާޅުވާނެ ކަމަށާއި ނަމަވެސް އެ މެންބަރުންނާ ނުލައި ވެސް އެމްޑީޕީއަށް ރިޔާސީ އިންތިޚާބު އެއް ބުރުން ކާމިޔާބު ކުރެވޭނެ ކަމަށް އޭނާ ވިދާޅުވިއެވެ.
