ޗާގޯސްގެ އިމުގެ މައްސަލައިގައި ރައީސް ފޮނުއްވި ސިޓީފުޅު ހާމަކުރަން ގޮވާލާ ހުށަހެޅި ކުއްލި މައްސަލަ ބޭރުކޮށްލައިފި
އެ މައްސަލަ އަށް ބަހުސް ކުރަން ފެންނަ ކަަމަށް ވޯޓުދެއްވާފައި ވަނީ މެންބަރުން
މެންބަރު އާދަމް ޝަރީފް
ރާއްޖެއާއި މޮރިޝަސް ދެމެދު އޮތް ފުށުއަރާ ސަރަހައްދު ވަކިކުރުމުގައި ބަންޑާރަ ނާއިބު މަސައްކަތްކުރެއްވީ ދިވެހިންގެ މަސްލަހަތު ގެއްލޭ ގޮތަށް ރައީސް އިބްރާހީމް މުހައްމަދު ޞާލިހު މޮރިޝަސް އަށް ސިޓީފުޅެއް ފޮނުއްވާފައިވާ ކަމަށް ތުހުމަތުކޮށް އެ ސިޓީ ހާމަކުރަން ގޮވާލާ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
ދިވެހިރާއްޖޭގެ މަސްކަނޑުން ބައެއް ގެއްލޭ ގޮތަށް ސަރުކާރުން މޮރިޝަސް އަށް ސިޓީ އެއް ފޮނުވާފައިވާ ކަމަށް ބުނެ އެ ސިޓީ ހާމަކުރަން ސަރުކާރަށް ގޮވާލާ ކުއްލި މައްސަލަ ހުށަހެޅުއްވީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ.
އެ މައްސަލަ އަށް ބަހުސް ކުރަން ފެންނަ ކަަމަށް ވޯޓުދެއްވާފައި ވަނީ 18 މެންބަރުންނެވެ. އަދި އެ މައްސަލަ އަށް ބަހުސްކުރަން ނުފެންނަ ކަަމަށް 33 މެންބަރުން ވޯޓުދެއްވިއެވެ. އެހެންކަމުން އެ މައްސަލަ އަށް ބަހުސްކުރަން ފާސްވެފައެއް ނުވެއެވެ. މަޖިލީހުގެ ޤަވާއިދު ބުނާގޮތުން ކުއްލި މައްސަލަ އަށް ބަހުސްކުރުމަށް 26 މެންބަރުންގެ ވޯޓު ބޭނުންވެއެވެ.
މި މައްސަލަ ހުށަހަޅުއްވަމުން އާދަމް ޝަރީފް ވިދާޅުވެފައި ވަނީ ފޯޅަވައްސަކީ ނުވަތަ ޗާގޯސް އަކީ މޮރިޝަސްގެ ސިޔާސަތީ ބާރު ހިނގާ ތަނެއްގެ ގޮތުގައި ހަމަޖެއްސުމަށާއި އަދި ދިވެހިރާއްޖޭގެ ހާއްސަ އިގްތިޞާދީ ސަރަހައްދުން ބައެއް ހޯދުމަށް މޮރިޝަސް އިން އިންޓަރނޭޝަނަލް ޓްރިބިއުނަލް ފޯރ ލޯވ އޮފް ދަ ސީ އަށް ހުށަހަޅާފައިވާ މައްސަލައިގައި ރާއްޖެއިން ކުރިން ގެންގުޅުނު ސިޔާސަތާއި ސްޓޭންޑް ސަރުކާރުން ބަދަލުކޮށްފައިވާކަން އިޓްލޮސް އިން ނެރުނު ބަޔާނުން އެނގޭ ކަމަށެވެ.
އަދި މި މައްސަލައިގައި ސަރުކާރުން އަމަލު ކުރީ ރާއްޖޭގެ މަސްލަހަތު ހިމާޔަތްކުރަން ނޫން ކަމަށް ވެސް އޭނާ ވިދާޅުވިއެވެ. މީގެ އިތުރުން އޭނާ ވަނީ މަޖިލީހަށް އެނގުމަކާއި ނުލާ ރައީސް އިބްރާހީމް މުހައްމަދު ޞާލިހު ސިޓީފުޅެއް ފޮނުއްވާފައިވާ ކަމަށާއި އެކަމުގެ ސަބަބުން ރާއްޖެ އަށް އިއާދަ ނުކުރެވޭ ވަރަށް ގެއްލުން ލިބިފައިވާ ކަަމަށް ވިދާޅުވެފައެވެ.
އެހެންކަމުން އެ ސިޓީ ރައްޔިތުންނަށް ހާމަކޮށްދެއްވުމަށާއި އެ ސިޓީ ފޮނުއްވި ސަބަބު މަޖިލީހަށް އެންގެވުމަށް އެ ކުއްލި މައްސަލައިގައި ވަނީ ގޮވާލާފައެވެ.
