ރައީސް، އެމްޑީޕީގެ ޕީޖީ ގްރޫޕާ ބައްދަލުކުރައްވާފައެއް ނުވޭ - އަސްލަމް
މެމްބަރުން ޕާޓީން ވަކިވެވަޑައިގެންފައި ވަނީ މަޖިލީހުގެ ކޮމިޓީތަކުގައި މެމްބަރުން ހިމެނޭ ގޮތް ބަދަލުކޮށްދެއްވުމަށް އެދިވަޑައިގެންފައިވަނިކޮށް
ރައްޔިތުންގެ މަޖިލީހުގެ ޖަލްސާގެ ތެރެއިން
ރައީސް އިބްރާހީމް މުހައްމަދު ސާލިހު އެމްޑީޕީގެ ޕީޖީ ގްރޫޕާއި ބައްދަލުކުރައްވާފައި ނުވާކަމަށް، އެމްޑީޕީ ޕީޖީ ގްރޫޕްގެ ލީޑަރ މުހައްމަދު އަސްލަމް ވިދާޅުވެއްޖެއެވެ.
އަސްލަމް މިފަދައިން ވިދާޅުވީ، ބުދަ ދުވަހު ޕީޖީ ގްރޫޕާއި ރައީސް ބައްދަލުކުރެއްވި ކަމަށާއި، އެ މެމްބަރުންނާ ސިޔާސީ ބައެއް ކަންކަމާމެދު މަޝްވަރާކުރެއްވި ކަމަށް ބުނެ ދެކެވެމުންދާ ވާހަކަތަކާ ގުޅިގެން "ރާއްޖެ އެމްވީ"ން ދެންނެވި ސުވާލަށް ޖަވާބުދެއްވަމުންނެވެ. އަސްލަމް ވިދާޅުވީ ޕީޖީ ގްރޫޕާ، ފަހުގެ ތާރީޚެއްގައި ރައީސް ބައްދަލުނުކުރައްވާ ކަމަށެވެ.
އެހެންނަމަވެސް ބައެއް ވަކިވަކި މެމްބަރުންނާ ރައީސް ބައްދަލުކުރައްވާފައި ވާކަމަށާއި އެ މެމްބަރުންނާ ބައްދަލުކުރެއްވީ އެ މެމްބަރުންގެ އެދިވަޑައިގަތުމުގެ މަތިން ކަަމަށްވެސް އަސްލަމް ވަނީ ވިދާޅުވެފައެވެ. ބައެއް މެމްބަރުން ރައީސާ ބައްދަލުކުރައްވާފައި މި ވަނީ ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރަށްފަހު ނެގި ޗުއްޓީ ނިމުމަށްފަހު ދައުރު ފެށުމަށް ތައްޔާރުވެފައިވާ ދަނޑިވަޅެއްގައެވެ. މަޖިލިސް ފެށުމަށް ތައްޔާރުވެފައި ވާއިރު އެމްޑީޕީގެ 12 މަޖިލިސް މެމްބަރުން ވަނީ އެ ޕާޓީން ވަކިވެވަޑައިގެންފައެވެ.
އެ މެމްބަރުން ވަކިވެވަޑައިގެންފައި ވަނީ ބުދަ ދުވަހުއެވެ. އެ މެމްބަރުން ޕާޓީން ވަކިވެވަޑައިގެންފައި ވަނީ މަޖިލީހުގެ ކޮމިޓީތަކުގައި މެމްބަރުން ހިމެނޭ ގޮތް ބަދަލުކޮށްދެއްވުމަށް އެދިވަޑައިގެންފައިވަނިކޮށެވެ.
