ފާޑުކިޔުން ބޮޑުވުމުން ރޯދަ މަހު މަޖިލީހުގެ ޖަލްސާތައް ކުރިއަށް ގެންދަން ނިންމަނީ
16 ފެބުރުއަރީ 2025 | އާދީއްތަ 14:00ޕީއެންސީގެ އާންމު ކޮމިޓީން ބުރާސްފަތި ދުވަހު ރޯދަ މަހު މަޖިލިސް ބަންދު ކުރަން ފާސްކޮށްފައި ވިޔަސް އާއްމުންގެ ފާޑުކިޔުން އަމާޒުވުމުން މިކަން ރިވިއުކުރަން ނިންމައިފި
ރައްޔިތުންގެ މަޖިިލިސް
މުޅި ރޯދަމަސް އެކީ ރައްޔިތުންގެ މަޖިލިސް ޗުއްޓީ އަށް ދާން އުޅުމުން އާއްމުންގެ ފާޑުކިޔުން އެކަމަށް އަމާޒުވެފައި ވަނިކޮށް، އެ އިސްލާހާއި މެދު ދެވަނަ ވިސްނުމަކަށް ދާން ޕީއެންސީން ނިންމައިފިއެވެ.
ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އަޣުލަބިއްޔަތު އޮންނަ އާންމު ކޮމިޓީން ބުރާސްފަތި ދުވަހު ވަނީ ރޯދަ މަހު މަޖިލިސް ބަންދު ކުރަން ފާސް ވެސް ކޮށްފައެވެ. މަޖިލީހުގެ ދައުރުތަކަށް ބަދަލުގެނައިމަށް އިސްލާހު ހުށަހަޅުއްވާފައި ވަނީ މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢުއެވެ.
އެއާއި އެކު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ނިސްބަތްވާ މަޖިލިސް މެމްބަރުން ދެކޮޅު ކަމަށް އެ ޕާޓީން ވަނީ މީގެ ކުރިން ވެސް ބުނެފައެވެ.
ރާއްޖެއެމްވީ އަށް މައުލޫމާތު ދިން ޕީއެންސީގެ މެމްބަރަކު ވިދާޅުވީ ރަމަޟާން މަހު ޗުއްޓީއަށް ނުދާގޮތަށް މިހާރު އެ ޕާޓީން ވިސްނުން ގެންގުޅޭ ކަމަށެވެ. ކުރިން ރޯދަ މަހު މަޖިލިސް ޗުއްޓީ އަށް ދާން ވިސްނީ ރޯދަ މަހުގެ ފަހު ދިހަ އަކީ ސަރުކާރު ބަންދުވަސް ވަރެއް ކަމަށް ވާތީ ކަމުގައި އެ މެމްބަރު ވިދާޅުވިއެވެ. މިކަން ޕީއެންސީގެ ޕީޖީ ލީޑަރ އިބްރާހިމް ފަލާހު ވަނީ ބައެއް މީޑިއާތަކަށް ކަށަވަރުކޮށްދެއްވާފައެވެ. ނަމަވެސް އެކަމުގެ މާބޮޑު ތަފްސީލެއް ހިއްސާކުރައްވާފަ އެއް ނުވެއެވެ.
އާންމު ކޮމިޓީގައި 11 މެމްބަރުން ތިއްބަވާއިރު، އެ ކޮމިޓީގައި ހިމެނެނީ އެމްޑީޕީ ގެ އެންމެ މެމްބަރެކެވެ. އެއީ ކަޑިތީމު ދާއިރާގެ މެމްބަރު އަމީން ފައިސަލް އެވެ. އޭގެ އިތުރުން ކޮމިޓީގައި އެންމެ އަމިއްލަ މެމްބަރެއް ހިމެނިވަޑައިގަންނަވައެވެ. އެއީ ތުޅާދޫ މެމްބަރ އަބްދުލްހައްނާން އަބޫބަކުރު އެވެ. ނަމަވެސް މިހާތަނަށް ވެސް އޭނާ ކަންކަން ނިންމަވަމުން ގެންދާވަފައި ވަނީ ޕީއެންސީ އިން ނިންމާ ނިންމުންތކާ އެއްގޮތަށެވެ. ދެން ތިއްބަވަނީ ޕީއެންސީ އަށް ނިސްބަތްވާ 9 މެމްބަރުންނެވެ. އެހެންކަމުން މި މަރުހަލާގެ ފުރިހަމަ ކޮންޓްރޯލް މި ވަގުތު އޮތީ ޕީއެންސީގެ އަތްމަތީގައެވެ.
