ވިލާ ސްކޫލުން ފަހަތުން އަރައި އަހުމަދިއްޔާ ސްކޫލް ބަލިކޮއްފި

އެފްއޭއެމް އިން އިންތިޒާމްކޮއްގެން ކުރިއަށް ގެންދާ މައިލޯ އިންޓަ ސްކޫލް ފުޓުބޯޅަ މުބާރާތުގެ 18 އަހަރުން ބައިގައި އަހުމަދިއްޔާ އިންޓަނޭޝަނަލް ސްކޫލުން 4 ލަނޑު ޖަހާފައި ވަނިކޮށް ވިލާ އިންޓަނޭޝަނަލް ހައި ސްކޫލުން ފަހަތުން އަރާ މެޗު ކާމިޔާބުކޮއްފިއެވެ.

ބުރާސްފަތި ދުވަހު ހަވީރު ހެންވޭރު ދަނޑުގައި ކުޅުނު މި މެޗް ވިލާއިން ކާމިޔާބުކުރީ 6-5 ގެ ނަތީޖާއަކުންނެވެ.

މެޗު ފެށިގެން އަހުމަދިއްޔާ ސްކޫލުގެ ފަރާތުން ފެނިގެން ގޮސްފައި ވަނީ މޮޅު ކުޅުމެކެވެ. އެގޮތުން މެޗުގެ ވަރަށް ކުރީކޮޅުގައި އެޓީމުން ވަނީ މެޗުގެ ލީޑު ނަގާފަ އެވެ. މި ލަނޑު މެޗުގެ 9 ވަނަ މިނެޓުގައި އަހުމަދިއްޔާއަށް ކާމިޔާބުކޮއްދިނީ މުހަންމަދު ޒިހާ ހުސައިން އެވެ. މި ލަނޑާއެކު އަހުމަދިއްޔާއިން މެޗުގެ ކޮންޓްރޯލް އަތުލިއިރު އެޓީމުން ވަނީ ރަނގަޅޫ ހަމަލާތަކެށް އުފައްދައި ފުލުފުލުގައި އިތުރު ދެ ލަނޑު ކާމިޔާބުކޮއްފަ އެވެ. 25 ވަނަ މިނެޓުގައި އަލީ އަރުޝަލް ލަނޑެށް ކާމިޔާބުކޮއްދިން އިރު، 28 ވަނަ މިނެޓުގައި ހަސަން ޝާމިހް ވަނީ 3 ވަނަ ލަނޑު ކާމިޔާބުކޮއްދީފަ އެވެ.

އޭގެ ފަހުން ވިލާއިން ވަނީ ލިބުނު ފުރުސަތެއްގެ ބޭނުން ހިފައި ލީޑު ހަނިކޮއްފަ އެވެ. 35 ވަނަ މިނެޓުގައި އެޓީމަށް ސުން ކަނޑުވާލަ ދިނީ އިޔާން އަހުމަދު ރަޝީދދް އެވެ. ނަމަވެސް މާ ގިނަ އިރުތަކެށް ނުވެ އަހުމަދިއްޔާއިން ވަނީ އަނެއްކާވެސް ލީޑު ފުޅާކޮއްފަ އެވެ. 37 ވަނަ މިނެޓުގައި މި ލަނޑު އެޓީމަށް ކާމިޔާބުކޮއްދިނީ ނޫރުﷲ މުފީދް އެވެ. އެއާއެކު ފުރަތަމަ ހާފު ނިމިގެންދިޔައީ 4-1 އިން އަހުމަދިއްޔާ ކުރީގައި އޮވެގެންނެވެ.

ނަމަވެސް ދެވަނަ ހާފުގައި އަހުމަދިއްޔާގެ ޑިފެންސް ލައިނުން ގިނަ ގޯސްތަކެށް ފެނިގެން ދިޔައެވެ. ނަތީއެއްގެ ގޮތުން ވިލާއިން ފުލުފުލު ގައި ދެލަނޑު ކާމިޔާބުކޮށް ލީޑު ހަނިކުރި އެވެ. 52 ވަނަ މިނެޓުގައި މުސައްނިފް މުހަންމަދު ލަނޑެއް ކާމިޔާބުކުރި އިރު އިޔާން އަހުމަދު ރަޝީދް ވަނީ 53 ވަނަ މިނެޓުގައި އޭނާގެ ދެވަނަ ލަނޑާއެކު އެންމެ ލަނޑަކަށް ލީޑު ހަނިކޮއްދީފައެވެ.

މި ލަނޑަށް ފަހުގައިވެސް ވިލާއިން ވަނީ ހޮތްވަރާއެކު ކުޅެ މެޗުގެ ލީޑު އަތުލާފަ އެވެ. 71 ވަނަ މިނެޓުގައި ނަބީހް މުހަންމަދުގެ ލަނޑުން ނަތީޖާ ހަމަހަމަ ކުރިއިރު 73 ވަނަ މިނެޓުގައި އަހުމަދު ޝާވިން ޝިހާމް ވަނީ ފުރަތަމަ ފަހަރަށް ވިލާއަށް މެޗުގެ ލީޑު ނަގައިދީފަ އެވެ. އޭގެ ފަހުން 78 ވަނަ މިނެޓުގައި އިޔާން އަހުމަދު ރަޝީދް ވަނީ އޭނާގެ ދެވަނަ ލަނޑާއެކު ވިލާއަށް ލީޑު ފުޅާކޮއްދީފަ އެވެ. ފަހަތުން އަރައި ވިލާއިން ކާމިޔާބުކުރި ލަނޑުތަކާއެކު 2 ލަނޑުގެ ލީޑުން ވިލާ މޮޅުވާން ދަނިކޮށް އަހުމަދިއްޔާއިން ލީޑު ހަނިކުރީ މެޗުގެ ފަހު ވަގުތުގައި ނޫރުﷲ މުފީދު ކާމިޔާބުކުރި ކަނޑުންނެވެ.

މިމުބާރާތުގައި ބުރާސްފަތި ދުވަހުހު ކުޅުނު ދެވަނަ މެޗުން އަލް މަދްރަސަތުލް އަރަބިއްޔާގެ މައްޗަށް ޖީއެޗްއެސްސީ އިން ވަނީ ކުރިހޯދާފަ އެވެ. އެޓީމުން މެޗު ކާމިޔާބުކުރީ 2-0 ގެ ނަތީޖާއަކުން ނެވެ. އެޓީމުގެ ފުރަތަމަ ލަނޑު ފުރަތަމަ ހާފުގެ 40 ވަނަ މިނެޓުގައި ކާމިޔާބުކޮއްދިނީ ރިޝްވާން އިސްމާޢީލް އެވެ. ދެވަނަ ލަނޑު އެޓީމުން ކާމިޔާބުކުރީ 68 ވަނަ މިނެޓުގަ އެވެ. މި ލަނޑު އެޓީމަށް ކާމިޔާބުކޮއްދިނީ އިބްރާހިމް ޒިދާން އެވެ.