ނިއު ރޭޑިއަންޓް ސްޕޯޓްސް ކްލަބް އަތުން މާލޭ ލީގު ގައިވީ ބަލިން އަރައިގަޭތުމަށް ކްލަބް އީގަލްސްއާ ދެކޮޅަށް ކުޅޭ މެޗު މުހިންމު ކަމަށް ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.
މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ނިޒާމްބެ ބުނީ އީގަލްސްއާ ދެކޮޅަށް ކުޅޭ ކޮންމެ މެޗަކީވެސް އަބަދުވެސް ވަރަށް ވާދަވެރި މެޗަކަށް ވެގެންދާ ކަމަށާއި، އެހެން ނަމަވެސް ޓީސީ މެޗަށް ނިކުންނާނީ ސީދާ ތިން ޕޮއިންޓް ހޯދާ ނިއު އަތުން ވީ ބަލިން އަރައިގަންނަން ކަމަށެވެ.
ނިޒާމްބެ ބުނީ މެޗު ފަސޭހަވާނެ ކަމަށް ނުބެލޭ ކަމަށާއި، ޓީމުގައި ރަނގަޅުކުރަންޖެހޭ ކަންތައްތައް އެބަހުރި ކަމަށެވެ. އެކަންތައްތައް އީގަލްސް މެޗަށް ރަނގަޅުކުރަންޖެހޭ ކަމަށްވެސް އޭނާ ވަނީ ބުނެފައެވެ.
އީގަލްސް ޓީމާ ބެހޭ ގޮތުން ނިޒާމްބެ ބުނީ އެ ޓީމުގައި ތިބީ ވަރަށް އެވްރެޖް ކުޅުންތެރިންތަކެއް ކަމަށާއި، އީގަލްސް އިން ބޭނުންކުރަނީ ރިޒާވް ޓީމްތޯ ބަލަން ނުޖެހޭ ކަމަށެވެ. އެގޮތުން އޭނާ ބުނީ ޓީސީން ވިސްނާނީ ދަނޑަށް އަރާ އީގަލްސް އިން ބޭނުންކުރާ ފުރަތަމަ 11 އަށްކަމަށްވެސް އޭނާ ވަނީ ބުނެފައެވެ.
އީގަލްސް އަދި ޓީސީ ބައްދަލުކުރާ މެޗުން މޮޅުވާ ޓީމެއް މާލޭ ލީގުގެ ގަދަ ހަތަރަކަށް އަރާއިރު، ޓީސީ އޮތީ ކުޅުނު ހަތަރު މެޗުން ލިބުނު ހަތް ޕޮއިންޓާއެކު ލަނޑުގެ ތަފާތުން ޕޮއިންޓް ތާވަލުގެ ހަތަރުވަނައިގަ އެވެ. އެޓީމު ވަނީ ލީގުގައި ކުޅުނު ހަތަރު މެޗުގެ ތެރެއިން ދެ މެޗުން މޮޅުވެފައެވެ. އެއް މެޗުން އެޓީމު އެއްވަރުވިއިރު، އަނެއް މެޗުން ވަނީ ބަލިވެފައެވެ.
