ފުރަތަމަ ސެމީ ފައިނަލްގައި 2-0 އިން މޮޅުވީ އިންޓަމިލާން
އިންޓަމިލާނުގެ ކުޅުންތެރިން އޭސީ މިލާން ގޯލު ޖަހާފައ ދުވަނީ: ފުރަަތަމަ ސެމީ ފައިނަލުން އިންޓަ މޮޅުވީ 2-0އިން
ދެ ލަނޑުން ފަހަތުގައި އޮތަސް ތިން ލަނޑުގެ ތަފާތަކުން ޗެމްޕިއަންސް ލީގުގެ ފައިނަލުން އިންޓަމިލާން ކަޓުވާލެވިދާނެ ކަމަށް އެންމެ ވާދަވެރި އޭސީ މިލާނުން ބުނެފި އެވެ.
އިޓަލީގައި އެއް ދަނޑެއް ހިއްސާކުރާ މި ދެ ޓީމުގެ ފުރަތަމަ ސެމީ ފައިނަލް ސެންސީރޯގައި އިންޓަ ކާމިޔާބުކުރީ 2-0އިންނެވެ. ނަމަވެސް އޭސީމިލާނުގެ ކޯޗު ސްޓެފަނޯ ޕިއޯލީ ގަބޫލުކުރާ ގޮތުގައި އިންޓަ ފައިނަލުން ކަޓުވާލެވިދާނެ އެވެ.
އޭނާ ބުނީ މިސީޒަން ފެށުމުގެ ކުރިން އޭސީ މިލާން ސެމީ ފައިނަލް ކުޅޭނެ ކަމަށް އެކަކު ވެސް ހީނުކުރާނެ ކަމަށާއި އެފަދަ ހީކުރުންތައް ގިނަވެފައިވާ ސެމީ ފައިނަލެއްގައި ނަތީޖާ ނެރެން ޓީމު އޮތީ ތައްޔާރަށްކަމަށެވެ. ކޯޗު އަދި ބުނީ ޒުވާން އުއްމީދީ ފޯވޑް ރަފޭލް ލިއާއޯ ހުރީ މެޗުގައި ކުޅެވޭ ވަރަށް ފިޓްކޮށްކަމަށެވެ.
ހަތް ފަހަރު މުބާރާތް ކާމިޔާބުކޮށްފައިވާ އޭސީ މިލާނަކީ ޗެމްޕިއަންސް ލީގުގައި ދެ ވަނަ އަށް އެންމެ ކާމިޔާބު ޓީމެވެ އިންޓަމިލާން މި ތަށި ހޯދީ ތިން ފަހަރު އެވެ. އިންޓަ އެންމެ ފަހުން ފައިނަލް ކުޅުނީ ވެސް އަދި ތަށި ހޯދީ ވެސް 2010ގަ އެވެ.
އިންޓަގެ ކޯޗު ސިމޯން އިންޒާގީ ބުނީ މިއީ އެ ޓީމުގެ ތާރީހުގައި ކުޅޭ އެންމެ މުހިންމު މެޗު ކަމަށެވެ. ސަބަބަކީ ޔޫރަޕުގެ އެންމެ ޝަރަފުވެރި ފައިނަލަށް ދިއުމަށް އޭސީ މިލާނާއެކު ކުޅެން ޖެހުން ކަމަށެވެ.
ޗެމްޕިއަންސް ލީގުގެ ފައިނަލް އޮންނާނީ ޖޫން 10ގައި ތުރުކީގަ އެވެ. ފައިނަލަށް މި ދެ ޓީމުން ކުރެ ޓީމަކާ ދެކޮޅަށް ނުކުންނާނީ ސެމީގެ ފަހު މެޗުގައި ވާދަކުރާ މެންޗެސްޓާ ސިޓީ އާއި ދިފާއީ ޗެމްޕިއަން ރެއާލް މެޑްރިޑެވެ.
