މިހާރު އިންޑިއާގައި ކުރިޔަށްދާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕުން ރާއްޖެއިން ދެ ބްރޯންޒް މެޑަލް ހޯދައިފިއެވެ.

ރާއްޖެއިން ހަތަރު ކެޓެގަރީއަކުން ބައިވެރިވިއިރު، މެޑަލް ލިބިފައިވަނީ 19 އަހަރުން ދަށުގެ އަންހެން އަދި ފިރިހެން ޓީމު އިވެންޓުންނެވެ.

ޖޫނިއާ ކެޓެގަރީގެ ޓީމު އިވެންޓުގައި ބައިވެރިވެފައިވަނީ ޖުމްލަ ހަތަރު ގައުމުންނެވެ. ކުޅުނު ހުރިހާ މެޗަކުން ބަލިވިނަމަވެސް، ހަތަރު ޓީމުން ބައިވެރިވެފައިވާތީ، މުބާރާތުގެ ގަވައިދުގެ ދަށުން ރާއްޖެއަށް ބްރޯންޒް މެޑަލް ލިބެއެވެ. މުބާރާތް ކުރިޔަށްދަނީ ފައިނަލް ކުޅޭ ދެ ޓީމު ފިޔަވާ، ބާކީ ދެ ޓީމަށް ބްރޯންޒް މެޑަލް ލިބޭގޮތަށެވެ.

ޖޫނިއާ ފިރިހެން ޓީމު ލަންކާއާ ބައްދަލުކޮށް ބަލިވެފައިވަނީ 3-0 ގެ ނަތީޖާއަކުންނެވެ. އަދި ބަންގްލަދޭޝް އަތުން ބަލިވީ 3-2 ގެ ނަތީޖާއަކުންނެވެ. ޖޫނިއާ އަންހެން ޓީމުގެ ދެ މެޗުވެސް ބަލިވެފައިވަނީ ހަނިގޮތަކަށެވެ. ނޭޕާލް އަދި ލަންކާއާ ބައްދަލުކުރި ދެ މެޗުންވެސް ބަލިވީ 3-2 ގެ ނަތީޖާއަކުންނެވެ.

މިކްސް ޑަބަލް ކެޓެގަރީއިން ރާއްޖޭގެ ދީމާ އަދި އަހްޔާރުގެ ޕެއާ ވަނީ ފައިނަލަށް ދަތުރުކޮށްފައެވެ. ފައިނަލުގައި ނިކުންނާނީ އިންޑިއާގެ ޕެއާއާ ދެކޮޅަށެވެ.

މި މުބާރާތަކީ ދެކުނު އޭޝިއާގެ ޒުވާން ޓީޓީ ކުޅުންތެރިންނަށް ހާއްސަ މުބާރާތެކެވެ. މިފަހަރު ބައިވެރިވެފައިވަނީ ރާއްޖޭގެ އިތުރުން، އިންޑިއާ، ނޭޕާލް، ބަންގްލަދޭޝް، ބޫޓާން އަދި ސްރީލަންކާއެވެ.