ކެންސަރުގެ ފަރުވާއަށް އޮތް ހުރަހަކީ އިޒްރޭލު!

މިއީ ޣައްޒާގެ ރަށްވެއްސެއް ކަމަށްވާ ދީނާ އަލް-ޟާނީގެ އޮންކޮލޮޖިސްޓްއާ ބައްދަލުކުރަންޖެހޭ ހަފުތާއެވެ. ކެންސަރު ބަލީގެ ޚާއްޞަ ޑޮކްޓަރު އިންނަވަނީ ޤުދުސްގައެވެ. ނަމަވެސް ދާދި ފަހުން، ޔަހޫދީ އިޒްރޭލާ ޣައްޒާއާ ދެމެދު ބަދަލުކުރަންފެށި ޙަމަލާތަކާ ގުޅިގެން ބޯޑަރު ބަންދުކޮށްފައި އޮތުމުގެ ސަބަބުން، ދީނާއަކަށް އޭނާގެ ޑޮކްޓަރާ ބައްދަލު ކުރެވޭ ގޮތެއް ނުވިއެވެ.

ދީނާއަކީ، ހުސްވި ހަފުތާގެ އަންގާރަ ދުވަހުން ފެށިގެން ވަރުގަދަކޮށްފައިވާ ޙަމަލާތަކާހެދި ފަރުވާއިން މަޙުރޫމުވެފައިވާ 432 ކެންސަރ ޕޭޝަންޓުންގެ ތެރެއިން އެކަކެވެ. އޮގަސްޓާ ވިކްޓޯރިއާ ހޮސްޕިޓަލުގައި އިންނަވާ އޮންކޮލޮޖިސްޓާއެކު އޮތް އެޕޮއިންޓްމަންޓަކީ، ދީނާއަށް ދޭނީ ކޮންކަހަލަ ރޭޑިއޭޝަން ޓްރީޓްމަންޓެއްތޯ ބަލައި، އެކަން ކަނޑައެޅުމަށް ހަމަޖެހިފައި އޮތް އެޕޮއިންޓްމަންޓެކެވެ.

އިޒްރޭލާ ޣައްޒާއާ ދެމެދު ބަދަލުކުރަމުންދާ ޙަމަލާތަކުގެ ސަބަބުން އެތައް މިލިއަން ބައެއްގެ ދިރިއުޅުމަށް ވަނީ ބުރޫއަރާފައެވެ.

ސަލާމަތީ ސަބަބުތަކަކަށްޓަކައި ކަމަށް ބުނެ، އިޒްރޭލާއި މިޞްރުން ވަނީ ޣައްޒާ ފިއްތާލާފައެވެ. ޙަމާސް ޖަމާޢަތުން ވެރިކަންކުރާ ޣައްޒާއާ ދެކޮޅަށް ފަލަސްޠީނުގެ މައި ސަރުކާރުންވެސް ފިއްތުންތައް ކުރިމަތިކުރެއެވެ. ހުރިހާ ދެރައެއް، ޢާންމު މީހާއަށެވެ.

ޞިއްޙީ ވަސީލަތްތައް ލިބުމުގައި ހުރި ދަތިކަމުގެ ސަބަބުން، ޣައްޒާގެ ހޮސްޕިޓަލުތަކުގައި، ކެންސަރ ޕޭޝަންޓުންނަށް އެކަށީގެންވާ ފަރުވާއެއް ދެވޭކަށް ނެތެވެ. ގިނަ މީހުންނަށް މަޖުބޫރު ވަނީ، އިޒްރޭލުން ވެރިވެގެންފައިވާ ހުޅަނގު އައްސޭރިއަށް ދަތުރުކުރާށެވެ. ނޫނީ އެހެން ޤައުމަކަށް ދަތުރުކުރާށެވެ.

ޞިއްޙީ ނިޒާމު ފެއިލްވުމުގައި، ފަލަސްޠީނުގެ ޞިއްޙަތާބެހޭ އޮފިޝަލުން، އިލްޒާމުގެ އިނގިލި އަމާޒު ކުރައްވަނީ 16 އަހަރުގެ ފިއްތާލުމެއްގެ ތެރޭގައި ޣައްޒާ އޮތް އޮތުމާ ދިމާއަށެވެ.

އިޒްރޭލާ ޣައްޒާއާ ދެމެދު އެންމެ ފަހުން ބަދަލުކުރަންފެށި ޙަމަލާތަކަށް ހަފުތާއެއްހާ ދުވަސް ފާއިތުވެފައި ވާއިރު، ފަލަސްޠީނުން މަރުވި މީހުންގެ ޢަދަދު 33ށް އަރައެވެ. އޭގެތެރޭގައި ކުޑަކުދިންނާއި، އަންހެނުންގެ އިތުރުން ދޮށީ ޢުމުރުގެ މީހުންވެސް ހިމެނެއެވެ. 5 ދުވަހުގެ ޙަމަލާ ބަދަލުކުރުންތަކުގައި 150ށްވުރެ ގިނަ މީހުން ޒަޚަމްވެފައި ވާކަމަށް ޣައްޒާގެ ޞިއްޙަތާބެހޭ ވުޒާރާއިން ވަނީ ހާމަކޮށްފައެވެ.