އިސްރާއީލުގެ ސިފައިން ޣައްޒާ ސިޓީގައި ހުންނަ އަލް-އަހްލީ ހޮސްޕިޓަލަށް ދިން ހަމަލާއެއްގައި މަދުވެގެން 7 މީހުން ޝަހީދުވެއްޖެ އެވެ.

މި ހަމަލާ ދީފައިވަނީ އިސްރާއީލުން ފަލަސްތީނުގެ ރައްޔިތުން ދެކުނުގެ ސަރަހައްދުތަކަށް މަޖުބޫރުން ބަދަލުކުރުމުގެ މަސައްކަތް ހަލުވި ކުރަމުންދާ ދަނޑިވަޅެއްގައެވެ.

ފަލަސްތީނުގެ ހެލްތު މިނިސްޓްރީން ބުނާ ގޮތުގައި ވޭތުވެދިޔަ 24 ގަޑިއިރު ތެރޭގައި އިތުރު 11 މީހުން ކާބޯތަކެތި ނުލިބިގެން މަރުވެފައިވެއެވެ. މިހާތަނަށް ބަނޑަހައިހޫނުކަމުގައި މަރުވެފައިވާ މީހުންގެ އަދަދު 251 އަށް އަރާފައިވާއިރު، އޭގެ ތެރޭގައި 108 ކުޑަކުދިން ހިމެނެއެވެ.

އަނެއްކޮޅުން އިސްރާއީލުގެ ވެރިރަށް ތެލްއަވީވް ގައި އެތައް ހާސް ބަޔަކު އެއްވެ، ޣައްޒާ އަށް ދެމުންދާ ހަމަލާތައް ހުއްޓާލުމަށާއި ހަމާސްގެ ބެލުމުގެ ދަށުގައި ތިބި އިސްރާއީލުގެ ގައިދީން މިނިވަން ކުރުމަށް ގޮވާލައިފިއެވެ.

ޣައްޒާގެ ސިވިލް ޑިފެންސް އޭޖެންސީން ބުނާ ގޮތުގައި ހޮނިހިރު ދުވަހު އިސްރާއީލުގެ ހަމަލާތަކުގައި މަދުވެގެން 39 މީހުން ޝަހީދުވިއެވެ. އަދި ޣައްޒާ ސިޓީގެ ޒައިތޫން ސަރަހައްދަށް އަމާޒުކޮށް ދެމުންދާ ހަމަލާތައް އިތުރުވަމުން ދާތީ، އެ ސަރަހައްދު ގައި ދިރިއުޅޭ ރައްޔިތުންގެ ފުރާނަ އަށް ނުރައްކާވެފައިވާ ކަމަށް ބުނެފައިވެއެވެ.

ޣައްޒާގެ ސިވިލް ޑިފެންސްގެ ތަރުޖަމާނު މަހްމޫދު ބައްސާލް ވިދާޅުވި ގޮތުގައި ޒައިތޫން ސަރަހައްދުގެ ހާލަތު ވަރަށް ބޮޑަށް ގޯސް ވެފައިވެއެވެ. އެ ސަރަހައްދުގައި އަންދާޒާ ކުރެވޭ ގޮތުގައި 50,000 މީހުން ދިރިއުޅެމުންދާއިރު، ގިނަ މީހުންނަށް ކާނާ އާއި ބޯފެން ލިބެމުން ނުދެއެވެ.

2023 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެން އިސްރާއީލުގެ ހަމަލާތަކުގައި މިހާތަނަށް މަދުވެގެން 61,827 ފަލަސްތީނު ރައްޔިތުން ޝަހީދުވެ، 155,275 މީހުން ޒަޚަމްވެފައިވެއެވެ.