ފަލަސްތީނުގެ ހައްގުގައި ގައުމީ ފެންވަރުގެ ބޮޑު އެއްވުމެއް 15 އޮގަސްޓް 2025ގައި ބޭއްވުމަށް ނިންމައިފިއެވެ.

ޣައްޒާގެ ރައްޔިތުންގެ ހައްޤުގައި ބާއްވާ މި އެއްވުން މާލޭގެ އިތުރުން ރާއްޖޭގެ އެކި ކަންކޮޅުތަކުގައި ކުރިއަށް ދާނެ އެވެ. "ގްލޯބަލް ސުމޫދް ފްލޮޓިއްލާ" ހަރަކާތުގެ ދަށުން ކުރިއަށްގެންދާ މި އެއްވުމަކީ އިންޓަރނޭޝަނަލް އެއިޑް ކެމްޕެއިން، އައިއޭސީގެ އިސްނެގުމާއި އެކު ރާވާ އިންތިޒާމްކުރާ ހަރަކާތެކެވެ. މި ހަރަކާތް އިންތިޒާމްކުރުމުގައި ރާއްޖޭގެ މަދަނީ ޖަމިއްޔާ ޖަމާއަތްތަކާއި އިދާރާތަކާއި ކުންފުނިތަކުގެ އިތުރުން އާއްމުން ބައިވެރިވާ ހާއްސަ ސްޓިރިއަރިން ކޮމިޓީ އެއް ހަރަކާތްތެރިވެއެވެ.

މި ހަރަކާތާއި ގުޅޭގޮތުން އެ ހަރަކާތް އިންތިޒާމް ކުރާ ފަރާތުން ބުނީ މި ހަރަކާތް އޮންނާނީ ހުކުރު ދުވަހު ހަވީރު 4 ޖަހާއިރު ކަމަށެވެ. އަދި މި ހަރަކާތް މާލެ ސަރަހައްދުގައި އޮންނާނީ މާފަންނު ބޮޑު ސްޓޭޑިއަމްގައި ކަމަށް ވެސް މި ހަރަކާތް އިންތިޒާމް ކުރާ ފަރާތުން ވަނީ ބުނެފައެވެ.

މި ހަރަކާތުގައި ޝުއޫރު ފާޅުކުރުމާއި އާއްމުންނަށް މައުލޫމާތު ދިނުން އޮންނާނެއެވެ. އެހެންކަމުން މި އެއްވުމުގައި ވީހާވެސް ގިނަ ފަރާތްތަކަކުން ބައިވެރިވުމަށް ހަރަކާތް އިންތިޒާމް ކުރާ ފަރާތުން ވަނީ އެދިފައެވެ.

ރާއްޖޭގެ މީހުން ދިރިއުޅެމުންދާ 50 ހަށްވުރެ ގިނަ ރަށުގައި މި ހަރަކާތް ކުރިއަށް ގެންދިއުމަށް ވަނީ ހަމަޖެހިފައެވެ.