ކުޅުދުއްފުށި އެއަރޕޯޓުގައި ނައިޓް ލޭންޑިންގ ޚިދުމަތް ދިނުމަށް ޓެސްޓް ފްލައިޓް ޖައްސައިފި
13 މެއި 2023 | ހޮނިހިރު 13:24ޓެސްޓް ފްލައިޓް ޖެއްސީ މިއަދު
ކުޅުދުއްފުށި އެއަރޕޯޓުގައި ނައިޓްލޭންޑިންގެ ޚިދުމަތް ފެށުމަށް ޖެއްސި ޓެސްޓް ފްލައިޓް
ރީޖަނަލް އެއަރޕޯޓްސް ކޮމްޕެނީ އިން ހިންގަމުން އަންނަ ކުޅުދުްފުށި އެއަރޕޯޓުގައި ނައިޓްލޭންޑިންގ ޚިދުމަތް ފެށުމަށް ކާމިޔާބު ކަމާއެކު ޓެސްޓް ފްލައިޓު ޖައްސައިފިއެވެ.
މި ފްލައިޓު ޖައްސާފައިވަނީ ހޮނިހިރު ދުވަހުގެ އިރުއޮއްސުނު ވަގުތުގައެވެ. މި ޚިދުމަތާއެކު ކުޅުދުއްފުށި އެއަރޕޯޓް، 24 ގަޑިއިރު ޚިދުމަތްދޭ އެއަރޕޯޓަކަށް ބަދަލު ވެގެންދާނެ ކަމަށް ރީޖަނަލް އެއަރޕޯޓްސް އިން ބުންޏެވެ.
ރޭގަނޑު ޚިދުމަތް ރަސްމީކޮށް ފެށުމުގެ ގޮތުން ކުޅުދުއްފުށި އެއަރޕޯޓުގައި ވަނީ ނައިޓް ލޭންޑިންގ ސިސްޓަމެއް ގާއިމްކޮށްފައެވެ. މި ޚިދުމަތާއެކު އެއަރޕޯޓުން ދޭ ޚިދުމަތްތައް އިތުރު ހަރުފަތަކަށް ގޮސް، ކުޅުދުއްފުއްޓާއި އެ ރަށާ ކައިރި ރަށްތަކުގެ ރައްޔިތުންނަށް ދިމާވެފައިވާ ދަތިތަކަށް ހައްލު ލިބިގެންދާނެ ކަމަށް ރީޖަނަލް އެއަރޕޯޓްސް އިން ބުންޏެވެ.
އެ ކުންފުނިން ފާހަގަކުރި ގޮތުގައި ކުޅުދުއްފުށީ އެއަރޕޯޓުން 24 ގަޑިއިރު ޚިދުމަތް ދޭން ފެށުމާއެކު ރޭގަނޑު ވަގުތު ވައިގެމަގުން ބަލި މީހުން އުފުލުމަށް ލުޔެއް ލިބިގެންދިއުމަކީ އެ ސަރަހައްދުގެ ރައްޔިތުންނަށް ލިބޭނެ ވަރަށް ބޮޑު ހިތްހަމަޖެހުމެކެވެ. އަދި އެ ސަރަހައްދުގެ ރަށްތަކުގެ ވިޔަފާރިތަކާށާއި ރިސޯޓުތަކަށް ވެސް މީގެ ސަބަބުން ލުއިތަކެއް ލިބިގެންދާނެ ކަމަށް އެ ކުންފުނިން ބުންޏެވެ.
ކުޅުދުއްފުށި އެއަރޕޯޓުގެ އިތުރުން ރީޖަނަލް އެއަރޕޯޓްސް އިން ހިންގަމުން އަންނަ ހޯރަފުށި އެއަރޕޯޓާއި މާވަރުލު އެއަރޕޯޓަށް ވެސް ރޭގަނޑު ފްލައިޓު ޖެއްސޭ ގޮތް ހެދުމަށް ނައިޓް ލޭންޑިންގ ސިސްޓަމް ގާއިމް ކުރުމުގެ މަސައްކަތް އެ ކުންފުނިން އަންނަނީ ކުރަމުންނެވެ. މި މަސައްކަތްތައް ކުރިއަށްއޮތް މަހެއްހާ ދުވަހުގެ ތެރޭގައި ނިންމައި، ޚިދުމަތް ފެށޭނެ ކަމަށް ވެސް އެ ކުންފުނިން ބުންޏެވެ.
ކުޅުދުއްފުށި އެއަރޕޯޓާއެކު ރީޖަނަލް އެއަރޕޯޓްސް އިން ހިންގާ އެއަރޕޯޓުތަކުގެ ތެރެއިން ރޭގަނޑު ފްލައިޓު ޖެއްސުމުގެ ޚިދުމަތް ދޭ އެއަރޕޯޓުގެ އަދަދު މިވަނީ ހަތަރަކަށް އަރައިފައެވެ. އެއީ ހަނިމާދޫ އިންޓަނޭޝަނަލް އެއަރޕޯޓާއި ފަރެސްމާތޮޑާ އެއަރޕޯޓާއި ފުވައްމުލައް އެއަރޕޯޓެވެ.
ރީޖަނަލް އެއަރޕޯޓްސް އިން ބުނިގޮތުގައި އެކުންފުނިން ހިންގާ ހުރިހާ އެއަރޕޯޓުތައް ތަރައްގީ ކުރުމަށާއި ދަތުރުވެރިންނަށް ދޭ ޚިދުމަތް ފުޅާ ކުރުމަށް ކެނޑިނޭޅި އަންނަނީ މަސައްކަތް ކުރަމުންނެވެ.
