ބުސްކެޓްސް އަށް ފަހު އަލްބާ ވެސް ފޮނުވާލަނީ
11 މެއި 2023 | ބުރާސްފަތި 04:02އަލްބާ ހުރީ މުސާރަ ކުޑަނުކުރާ ވިސްނުމުގައި
ޖޯޑީ އަލްބާ: ބާސެލޯނާއިން ބޭނުންވަނީ އޭނާ އެހެން ކުލަބަކަށް ދިއުމަށް
ކެޕްޓަން ސާޖިއޯ ބުސްކެޓްސް އަށް ފަހު ޖޯޑީ އަލްބާ ވެސް ފޮނުވާލަން ބާސެލޯނާއިން މަސައްކަތް ފަށައިފި އެވެ.
ބާސެލޯނާއާއެކު އަލްބާ ހަދާފައިވާ ކޮންޓްރެކްޓްގައި ބާކީ އަދި ދެ އަހަރު އެބައޮތެވެ. ނަމަވެސް އޭނާ އަށް އަންނަ ސީޒަނުގައި ޓީމުން ފުރުސަތުދޭން މެނޭޖްމަންޓުން ވިސްނާފައިވަނީ މުސާރަ ކުޑަކުރާނަމަ އެވެ. ނޫނީ ބާސެލޯނާއިން ބޭނުންވަނީ ފްރީ ކުޅުންތެރިއެއްގެ ގޮތުގައި އަލްބާ ބޭނުން ކުލަބަށް ދިއުމަށް އޭނާ އަށް ފުރުސަތުދިނުމަށެވެ.
ސްޕޭނުގެ ކެޓަލަން ރޭޑިއޯއިން ބުނާ ގޮތުގައި އަލްބާ ހުރީ މުސާރަ ކުޑަކުރާ ގޮތަކަށްނޫނެވެ. އޭނާ އަކީ އަހަރަކު ގާތްގަނޑަކަށް 10 މިލިއަން ޔޫރޯ ލިބޭ ކުޅުންތެރިއެކެވެ. އަދި ކުލަބުގެ އެންމެ މުސާރަބޮޑު އެއް ކުޅުންތެރިޔާ އެވެ.
އަލްބާ ކުލަބު ދޫކޮށްދާން ޖެހިއްޖެނަމަ އޭނާ އަށް އިޓަލީ އާއި އެމެރިކާ އަދި ސައޫދީ އަރަބިއްޔާގެ ލީގުތަކުން ފުރުސަތު އެބައޮތެވެ. އުމުރުން 34 އަހަރުގެ ކުޅުންތެރިޔާ ކުލަބުގައި ހުންނަން ބޭނުންނަމަ އެކަމުގައި ކޯޗު ޒަވީ ހަނާންޑޭޒްގެ އެއްވެސް މައްސަލައެއްނެތެވެ.
ބާސެލޯނާއިން އަލްބާ ވިއްކާލަން ނުވަތަ އޭނާ ކުލަބު ދޫކޮށްދާން ބާރު އަޅަން ފެށީ ކެޕްޓަން ބުސްކެޓްސް މި ސީޒަނަށް ފަހު ކުލަބު ދޫކޮށްލަން ނިންމިތާ އެއް ދުވަސް ފަހުންނެވެ. އުމުރުން 34 އަހަރުގެ ބުސްކެޓްސް ބާސެލޯނާ ދޫކޮށްލަން ނިންމީ އޭނާގެ ކެޕްޓަންކަމުގައި ސްޕެނިޝް ލީގު ހޯދާފައި ރީތި ގޮތުގައި ކުލަބުން ދިއުމަށްޓަކާއެވެ. އޭނާ އަށް ބާސެލޯނާއިން އެއް އަހަރު ކޮންޓްރެކްޓެއް ދޭން ހުށަހެޅި އެވެ.
