ޔުއެފާ ޔޫރޮޕާ ލީގުގެ ސެމީ ފައިނަލްގައި ބަޔާ ލެވަކޫސަނާ ދެކޮޅަށް ނުކުންނައިރު، ރޯމާ އިން އެ ޓީމަށް އެއްވެސް ކަމެއް ދޫނުކުރާނެ ކަމަށް އެ ޓީމުގެ ކޯޗު ހޯސޭ މޮރީނިއޯ ބުނެފި އެވެ.

ސެމީ ފައިނަލް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން މޮރީނިއޯ ބުނީ، މެޗަށް ރޯމާ އިން ނުކުންނަން ޖެހޭނީ މިއީ އެ ޓީމަށް ލިބޭނެ އެންމެ ފަހު ފުރުސަތުގެ ގޮތުގައި ދެކިގެން ކަމަަށެވެ. މޮރީނިއޯ ބުނީ ރޯމާ ޓީމުގައި ގިނަ އުނދަގޫތަކެއް ނުވަތަ ގޮންޖެހުންތަކެއް ހުރި ނަމަވެސް، އެ ޓީމުން ލެވަކޫސަނަށް މެޗުގައި އެއްވެސް ކަމެއް "ހަދިޔާ" ނުވަތަ ދޫނުކުރާނެ ކަމަށެވެ. އޭނާ ފާހަގަ ކުރި ގޮތުގައި ރޯމާ އިން ދަނޑު މަތީގައި އެމީހުންނަށް ކުރެވެން އޮތް ހުރިހާ ކަމެއް ކުރާނެ އެވެ. އޭގެ ތެރޭގައި ކުޅުންތެރިންގެ ހުނަރާއި، ފެންވަރު ހިމެނޭނެ ކަމަށް އޭނާ ވަނީ ބުނެފަ އެވެ. ސެމީ މެޗަކީ ވަރަށް މުހިންމު މެޗެއްކަން ފާހަގަކޮށް މޮރީނިއޯ ބުނީ، ސެމީ މެޗުން ނަތީޖާ ނެރުމަށް ކުރެވެން އޮތް އެންމެހައި ކަމެއް އޭނާގެ ކުޅުންތެރިން ކުރާނެ ކަމަށެވެ. އެއަށްފަހު ފައިނަލަށް ދިޔުމަކީ ޓީމުގެ އަޒުމު ކަމަށާއި، ރޯމާގައި އޮތް ޓީމަށް އެކަން ކުރެވޭނެ ކަމަަށް އޭނާ ބުންޏެވެ.

މީގެ އިތުރުން ސެމީ މެޗުގައި ރޯމާ އަށް ކުޅެމުން އަންނަ އާޖެންޓީނާގެ ޕައުލޯ ޑިބާލާ ފެންނާނެތޯ ސުވާލު ކުރުމުން މޮރީނިއޯ ބުނީ، އޭނާ އަށް ޤަބޫލު ކުރެވޭ ގޮތުގައި ޑިބާާލާ އަށް ނުކުޅެވޭނެ އެވެ. އެހެން ނަމަވެސް ގޮތެއް ނިންމަން ޖެހޭނީ އެންމެ ފަހު ވަގުތުގައި ކަމަށާއި، މިވަގުތު އޭނާ އަށް ސީދާ ޖަވާބެއް ނުދެވޭނެ ކަމަށެވެ. ސަބަބަކީ މިވަގުތު ޑިބާލާ އަށް ނުކުޅެވޭނެ ކަމަށް އޭނާ ބުނެފައި އޮއްވާ، ފަހު ވަގުތު ޑިބާލާ ކުޅެފިނަމަ އޭނާ އަކީ ދޮގުވެރިއެއްގެ ގޮތުގައި ސިފަ ކުރާނެ އެވެ. އެހެންކަމުން މޮރީނިއޯ ބުނީ އޭނާ އަށް ޤަބޫލު ކުރެވެނީ ޑިބާލާ އަށް ނުކުޅެވޭނެ ކަމަށާއި، ނަމަވެސް ސިދާ ނުކުޅެވޭނެޔޭ ބުނަން އުނދަގޫ ކަަމަށެވެ.

ބަޔާ ލެވަކޫސަނާ ގުޅޭ ގޮތުން ވާހަކަ ދައްކަމުން މޮރީނިއޯ ބުނީ، އެ ޓީމަކީ މިވަގުތު ޔޫރަޕުގައި އޮތް ޓީމުތަކުގެ ތެރެއިން ކައުންޓަ އެޓޭކުގައި އެންމެ ނުރައްކާތެރި އެއް ޓީމު ކަމަށެވެ. ޚާއްސަކޮށް ޒަބީ އަލޮންސޯ ލެވަކޫސަނާ ހަވާލުވެ އެ ޓީމު މުޅިން އެހެން ހަރުފަތަކަށް ގެންގޮސްފައިވާ ކަމަށާއި، ކޯޗެއްހެ ހައިސިއްޔަތުން އަލޮންސޯގެ ޕްލޭނާ ދެކޮޅަށް ކުޅެން އުނދަގޫ ވެސް ވާނެ ކަމަށް މޮރޯނިއޯ ވަނީ ބުނެފަ އެވެ.

ރޯމާ އާއި ލެވަކޫސަން ބައްދަލު ކުރާ މެޗު ފަށާނީ ބުރާސްފަތި ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.