ބަޔާނުން ފޯވާޑުން ހޯދާނެ، އެކަމަކު އެ ކުޅުންތެރިންގެ ވާހަކައެއް ނުދައްކާނެ
އެ ކުޅުންތެރިންނަކީ އެހެން ކުލަބުތަކުގައި ތިބި ކުޅުންތެރިންނަށް ވުމުން އެ ވާހަކަ ދައްކަން ބޭނުމެއް ނުވޭ
ބަޔާން މިއުނިކްގެ ސީއީއޯ އޮލިވާ ޚާން
ކުރިއަށް އޮތް ސީޒަނަށް ޓީމުގެ ވަރުގަދަ ކުރުމުގެ ގޮތުން ޖަރުމަނުގެ ބަޔާނުން މިއުނިކުން އައު ފޯވާޑުން ހޯދާނެ ކަމަށާއި، ނަމަވެސް އެ ކުޅުންތެރިންގެ ވާހަކަ ދައްކަން ބޭނުންނުވާ ކަމަށް އެ ކުލަބުގެ ސީއީއޯ އޮލިވާ ޚާން ވިދާޅުވެއްޖެ އެވެ.
އޮލިވާ ޚާން މިހެން ވިދާޅުވީ ކުރިއަށް އޮތް ސީޒަނަށް ބަޔާން ވަރުގަދަ ކުރުމުން ކުރަމުން އަންނަ މަސައްކަތާ ގުޅޭ ގޮތުން ޖަރުމަނުގެ މީޑިއާއަކަށް ދެއްވި އިންޓަވިޔުއެއްގަ އެވެ. އެ އިންޓަވިޔުގައި އޮލިވާ ޚާން ވިދާޅުވީ، އައު ކޯޗު ތޯމަސް ޓުޗެލާއެކު މަޝްވަރާ ކުރުމަށް ފަހު ޓީމަށް ބޭނުންވާ ކުޅުންތެރިން ހޯދުމުގެ މަސައްކަތް ކުރަމުން އަންނަ ކަމަށެވެ. އެއީ ކޮން ކުޅުންތެރިންނެއްކަމެއް އޮލިވާ ޚާން ވިދާޅުވެފައެއް ނުވެ އެވެ. ޓޮޓެންހަމަށް ކުޅެމުން އަންނަ އިންގްލެންޑުގެ ހެރީ ކޭން އާއި ފްރާންސްގެ ޒުވާން ކުޅުންތެރިޔާ ރަންޑަލް ކޯލޯ މުއާނީ ގެންނަން ބަޔާނުން ކުރަމުން އަންނަ މަސައްކަތާ ގުޅޭ ގޮތުން ސުވާލު ކުރުމުން އޭނާ ވިދާޅުވީ، މިވަގުތު އެ ވާހަކަ ދައްކަން ބޭނުންނުވާ ކަމަށެވެ. ސަބަބަކީ އެ ކުޅުންތެރިންނަކީ އެހެން ކުލަބެއްގައި ތިބި ކުޅުންތެރިންނަށް ވެފައި، މިވަގުތު އެއީ ކުރަން ރަނގަޅު ކަމެއް ނޫން ކަމަށް ވާތީއެވެ.
އެހެން ނަމަވެސް އޮލިވާ ޚާން ދެއްވާ ޔަގީންކަމަކީ ކުރިއަށް އޮތް ސީޒަނަށް ބަޔާނުން ކުޅުންތެރިން ގެންނާނެ ކަމެވެ. ޚާއްސަކޮށް ޓީމުގެ ފޯވާޑުގައި ކުޅެން މޮޅެތި ކުޅުންތެރިން ބަޔާނުން ހޯދާނެ ކަމަށް އޭނާ ވިދާޅުވި އެވެ. ޓުޗެލާ ގުޅޭ ގޮތުން އޮލިވާ ޚާން ވިދާޅުވީ، ކުރިން ވެސް ބުނި ފަދައިން ޓުޗެލަަށް ފުރިހަމައަށް އިތުބާރު އޮންނާނެ ކަމަށެވެ. ކުރިއަށް އޮތް ސީޒަނަށް ވެސް ބޭނުންވަނީ ޓުޗެލާއެކު ކުރިއަށް ދާން ކަމަށާއި، އޭނާ އަށް ބޭނުންވާ ވަގުތު ދޭނެ ކަމަށް ވެސް އޮލިވާ ޚާން ވިދާޅުވި އެވެ. މި ސީޒަނުގައި ބަޔާނަށް އެކަށީގެންވާ ކާމިޔާބީތަކެއް ލިބުނު ކަމަށް ޤަބޫލު ކުރަންތޯ ސުވާލު ކުރުމުން އޮލިވާ ޚާން ވިދާޅުވީ، މިހާރު ބޭނުންވަނީ ޖަރުމަނު ލީގު ކާމިޔާބު ކުރުމަށް ކަމަށެވެ. އޭނާ ވިދާޅުވީ މުބާރާތްތަކުން ބަޔާން އަލްވަދާއު ކިޔުމަކީ ޓުޗެލްގެ ކުށް ދައްކަން ޖެހޭ ކަމެއް ނޫން ކަމަށެވެ.
މި ސީޒަނުގައި ބަޔާން ވަނީ ޖަރުމަނު ކަޕުންނާއި ޔުއެފާ ޗެމްޕިއަންސް ލީގުން ވެސް ކަޓައިފަ އެވެ. އެ ޓީމަށް އޮތް ހަމައެކަނި ފުރުސަތަކީ ޖަރުމަނު ލީގެވެ. އެހެން ނަމަވެސް ލީގުގައި ބަޔާން އޮތީ ހިތްހަމަޖެހޭ ވަރެއްގައެއް ނޫނެވެ. ބަޔާން އެއް ވަނައިގައި އޮތީ ޕޮއިންޓެއްގެ ލީޑަކުންނެވެ.
