މިހާރު ކުރިއަށްދާ އިންޓަރ އޮފީސް ވޮލީ ބޯޅަ މުބާރާތުގައި ކުޅުނު ތިން ވަނަ މެޗު ކާމިޔާބުކޮށް ވޭސްޓް މެނޭޖްމަންޓް ކޮމްޕެނީ ލިމިޓެޑް (ވެމްކޯ) އިން ސެމީ ފައިނަލްގެ ޖާގައެއް ކަށަވަރުކުރި އިރު، ޕޮލިހުން ކުޅުނު ތިން ވަނަ މެޗު ވެސް ކާމިޔާބުކޮށްފި އެވެ.

ދެ ގްރޫޕަކަށް ބަަހައިގެން ކުރިއަށްދާ މުބާރާތުގައި މިހާރު ވަނީ ސެމީ ފައިނަލްގައި ކުޅޭނެ ޓީމުތައް ކަށަވަރުވެފަ އެވެ. ފަސް ޓީމު ހިމެނުނު ގްރޫޕް އޭ އިން ސެމީ ފައިނަލަށް ދިޔައީ އާބަންކޯ އާއި ޕޮލިހެވެ. ނަމަވެސް މި ގްރޫޕްގެ އެއް ވަނަ ޓީމާއި ދެ ވަނަ ޓީމު ޔަގީން ވާނީ އަންގާރަ ދުވަހުގެ ރޭ އާބަންކޯ އާއި ޕޮލިސް ބައްދަލު ކުރާ މެޗުންނެވެ. އެ މެޗުން މޮޅުވާ ޓީމަކަށް ގްރޫޕްގެ އެއް ވަނަ ލިބޭނެ އެވެ. ހަތަރު ޓީމު ހިމެނުނު ގްރޫޕްގެ ހުރިހާ މެޗެއް ނިމުނުއިރު، އެއް ވަނަ ހޯދީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިންނެވެ. ދެ ވަނަ ލިބުނީ ހޯމަ ދުވަހުގެ ހަވީރު ފިއުލް ސަޕްލައި މޯލްޑިވްސް (އެފްއެސްއެމް)ގެ މައްޗަށް ކުރި ހޯދީ ވެމްކޯ އަށެވެ.

އެފްއެސްއެމާ ދެކޮޅަށް ކުޅުނު މެޗު ވެމްކޯ އިން ކާމިޔާބު ކުރީ ސީދާ ތިން ސެޓުންނެވެ. ވާދަވެރި ކުޅުމެއް ތިން ސެޓުގައި ވެސް ފެނުނުއިރު، ވެމްކޯ އިން ސެޓުތައް ކާމިޔާބު ކުރީ 25-22، 25-22 އަދި 25-20 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ބިދޭސީ ކުޅުންތެރިޔާ ވިނީތު ކުމާރު އެވެ. ހޯމަ ދުވަހުގެ ރޭ މޯލްޑިވްސް ޕޯޓްސް ލިމިޓެޑް (އެމްޕީއެލް)އާ ދެކޮޅަށް ކުޅުނު މެޗު ޕޮލިހުން ކާމިޔާބު ކުރީ ވެސް ސީދާ ތިން ސެޓުންނެވެ. މެޗުގެ ސެޓުތައް ޕޮލިހުން ކާމިޔާބު ކުރީ 28-26، 25-21 އަދި 25-10 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިހުގެ ބިދޭސީ ކުޅުންތެރިޔާ  ޓްޔާގީ ހިމަންޝޫ އެވެ.

މުބާރާތުގެ ސެމީ ފައިނަލް މެޗުތައް ކުޅުމަށް ތާވަލްކޮށްފައި ވަނީ ބުރާސްފަތި ދުވަހުގެ ހަވީރު އާއި ރޭގަނޑު އެވެ.