މާޒިޔާ އަށް ކޮންމެ މުބާރާތެއް ވެސް މުހިންމު، ޔޫވީ މެޗު ސީރިއަސްކޮށް ނަގާނެ

މާޒިޔާ ސްޕޯޓްސް އެންޑް ރެކްރިއޭޝަނަށް ކޮންމެ މުބާރާތަކީ ވެސް މުހިންމު މުބާރާތެއް ކަމަށާއި، ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅޭޭ މެޗު ސީރިއަސްކޮށް ނަގާނެ ކަމަށް އެ ޓީމުގެ ކޯޗު އިވާން ވެންކޯ ކޮލޭވް ބުނެފި އެވެ.

އިވާން މިހެން ބުނީ ދިވެހި ޕްރިމިއާ ލީގުގައި މާޒިޔާގެ ފުރަތަމަ މެޗުގައި ޔޫވީއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގަ އެވެ. އޭނާ ބުނީ، ޔޫވީ މެޗަކީ މާޒިޔާ އަށް ލީގުގެ ފަށުން ކަމަށެވެ. އެހެންކަމުން އެ މެޗުން މާޒިޔާ ބޭނުންވަނީ ރަނގަޅު ކުޅުމެއް ދައްކަން ކަމަަށާއި، ހަގީގަތުގައި މާޒިޔުާ އިން އެ މެޗަށް ތައްޔާރުވީ ވެސް ވަރަށް ސީރިއަސްކަމާއެކު ކަމަށެވެ. މާޒިޔާއާ ދެކޮޅަށް ނުކުންނަ ޔޫވީ އިން ސީޒަނަށް މާ ބޮޑު ތައްޔާރުވުމެއް ނެތް ކަމަށާއި، އެހެންކަމުން އެއީ ޕްރެޝަރަކަށްވާނެތޯ ސުވާލު ކުރުމުން އިވާން ބުނީ، މާޒިޔާ އިން ކޮންމެ ޓީމަކަށް ވެސް ފުރިހަަމަ އަށް އިހުތިރާމް ކުރާނެ ކަމަށެވެ. އެހެންކަމުން ޔޫވީގެ ތައްޔާރީތަކާއި، އެ ޓީމުން ޕްރެޒިޑެންޓްސް ކަޕްގައި ބައިވެރިވިތޯ ނުވަތަ ނޫންތޯ ވެސް މާޒިޔާ އިން ނުބަލާނެ ކަމަށެވެ. އިވާން ފާހަގަ ކުރި ގޮތުގައި ކޮންމެ ޓީމަކަށް ވެސް އެބައެއްގެ އަމިއްލަ ގޮތްތަކެއް އޮންނާނެ އެވެ. އެހެންކަމުން މާޒިޔާ އިން ބޭނުންވަނީ ރަނގަޅު މެޗެއް ކުޅެން ކަމަށް އިވާން ބުންޏެވެ.

މީގެ އިތުރުން އިވާން ބުނީ ޔޫވީގެ މެޗު މާޒިޔާ އަށް ފަސޭހަ ނުވާނެކަން އެނގޭ ކަމަށެވެ. ސަބަބަކީ އޭނާ އަށް މައުލޫމާތު ލިބިފައިވާ ގޮތުގައި ޔޫވީ ޓީމުގައި ގިނަ ޒުވާން ކުޅުންތެރިން ތިބުމުން ކަމަށެވެ. އޭނާ ބުނީ އާންމު ގޮތެއްގައި ޒުވާން ކުޅުންތެރިން ކުޅޭނީ ވަރަށް ހިތްވަރާއެކު، ވަރަށް އުންމީދުގައި ކަމަށެވެ. އެހެންކަމުން އެފަދަ ގޮތަކަށް ކުޅޭ ޒުވާން ކުޅުންތެރިންނާ ދެކޮޅަށް ކުޅުމަކީ އުނދަގޫ ކަމަކަށްވާނެ ކަމަށެވެ. މާޒިޔާ ޓީމު މިވަގުތު އޮތް ހާލަތާ ގުޅޭ ގޮތުން ސުވާލު ކުރުމުން އިވާާން ބުނީ، އެކަމަށް އެއްޗެއް ބުނަން އެނގޭނީ ޓީމުން ކުޅޭ މެޗާ، އެ މެޗުން އަންނަ ނަތީޖާ އިން ކަމަށެވެ. އޭނާ ބުނީ އެކަމަށް އެއްޗެއް ބުނަން އެނގޭނީ ކުޅުންތެރިން މެޗުގައި ދައްކާ ކުޅުމުން ކަމަށާއި، އެހެންކަމުން މެޗުގެ ކުރިން އެއްޗެއް ބުނަން އުނދަގޫ ކަމަށެވެ. އަދި މާޒިޔާ އިން މަސައްކަތް ކުރާނީ ރަނގަޅު ކުރަން ކަމަށާއި، ފަރިތަކުރުންތަކުގައި ވެސް ކުރިއަށް ދަނީ އެ މަގުން ކަމަށެވެ. އެކަމާއެކު މާޒިޔާގެ ޓާގެޓަކީ ކޮންމެ މެޗެއް ރަނގަޅު ކުރުން ކަމަށް ވެސް އިވާން ބުންޏެވެ.

މެޗުގެ ފުރަތަމަ 11 ގައި ފަށާނެ ކުޅުންތެރިންނާ ގުޅޭ ގޮތުން އިވާން ބުނީ، އެކަން ނިންމާނީ ހޯމަ ދުވަހު ކުރިއަށް ގެންދާ އެންމެ ފަހު ފަރިތަކުރުމަށް ފަހު ކަމަށެވެ. އިވާން ފާހަގަ ކުރި ގޮތުގައި މާޒިޔާގައި އަދިވެސް އަނިޔާގެ މައްސަލަތަކެއް އުޅެ އެވެ. ނަމަވެސް މެޗުގައި މާޒިޔާގެ ޑިފެންޑަރު ސަމޫހު އަލީ (ސަމުއްޓޭ) އަށް ކުޅެވޭނެ ކަމަށް އޭނާ ވަނީ ބުނެފަ އެވެ. އިވާން ބުނީ ސަމުއްޓޭ ފަރިތަކުރަމުން އަންނަނީ ވަރަށް ސީރިއަސްކަމާއެކު ކަމަށާއި، އޭނާގެ މޫޑު ވެސް ވަރަށް ރަނގަޅު ކަމަށެވެ.

މިއަހަރު މާޒިއާ ހަވާލުވި އިވާން ވަނީ އެ ޓީމަށް ނިމުނު ޕްރެޒިޑެންޓްސް ކަޕް ކާމިޔާބުކޮށްދީފަ އެވެ. ލީގުގައި މާޒިޔާގެ ފުރަތަމަ މެޗުގައި ޔޫވީއާ ދެކޮޅަށް ނުކުންނާނީ އަންގާރަ ދުވަހުގެ ހަވީރު އެވެ.