ޗާގޯސް މައްސަލައިގައި ޕީޕީއެމްއިން ނަޝީދާ ބައްދަލުކޮށްފި
ޗާގޯސްއަކީ މޮރިޝަސްގެ ތަނެއްކަމަށް ރާއްޖެއިން ފުރަތަމަ ބަލައިގަތީ ނަޝީދުގެ ވެރިކަމުގައި
ޕީޕީއެމްއާއި ރައީސް ނަޝީދު ބައްދަލު ކުރެއްވުން
ޗާގޯސްއާއި ދިވެހިރާއްޖެއާ ދެމެދުގައިވާ ކަނޑުގެ ސަރަހައްދުގެ މައްސަލާގައި އިޓްލޮސްއިން އޭޕްރީލް 28ގައި އިއްވި ހުކުމާއި ގުޅޭގޮތުން ޕީޕީއެމް ޕީއެންސީން ރައްޔިތުންގެ މަޖިލީހުގެ ރައީސް މުޙައްމަދު ނަޝީދާ ބައްދަލުކުރައްވައިފިއެވެ.
އެ ޙުކުމަކީ އިގްތިސާދީ ނަފާ ހޯދުމަށް ދިވެހިންނަށް ލިބެން އޮތް 200 ނޯޓިކަލް މޭލުގެ ބޮޑު ސަރަހައްދު ހޯދުމަށް އޮތް ފުރުސަތު ގެއްލުވައިލުން ކަމަށް، އިދިކޮޅު ފަރާތްތަކުން ދަނީ ބުނަމުންނެވެ.
މި މައްސަލައާ ގުޅިގެން ރައްޔިތުންގެ މަޖިލީހުގެ ރައީސް އާއި ޕީޕީއެމް/ޕީއެންސީގެ ފަރާތުން ބައްދަލުކޮށް މަޝްވަރާ ކޮށްފައިވާއިރު، މި ބައްދަލުވުމުގައި އެ ޕާޓީގެ އިސް ފަރާތްތަކުން ބައިވެރިވެވަޑައިގެންފައިވެއެވެ.
އިދިކޮޅު ފަރާތްތަކުން މި މައްސަލައިގައި ނަޝީދާ ބައްދަލު ކުރައްވާފައިވާއިރު، ޗާގޯސްއަކީ މޮރިޝަސްގެ ތަނެއްކަމަށް ރާއްޖެއިން ފުރަތަމަ ބަލައިގަތީ ނަޝީދުގެ ވެރިކަމުގައި 2010 ގައެވެ.
އެގޮތުން ޗާގޯސްއާއި ރާއްޖެއާ ދެމެދު ފުށުއަރާ ބައި ހަމަޔަށް ބަހަން ފުރަތަމަ އެއްބަސްވީ ރައީސް ނަޝީދުގެ ސަރުކާރުން ކަމަށް ޗާގޯސް މައްސަލައިގައި މިފަހުން ބޭއްވި ނޫސްވެރިންގެ ބައްދަލުވުމުގައި ކުރީގެ ބަންޑާރަ ނާއިބް އާއިޝަތު އާޒިމާ ޝަކޫރު ވިދާޅުވިއެވެ. ނަމަވެސް ރާއްޖެއިން ބޮޑުބައެއް ގެއްލުވާލީކަމަށް ވިދާޅުވެ، ސަރުކާރާއި ރައީސް ސާލިހަށް ނަޝީދު ގެންދަވަނީ ފާޑު ވިދާޅުވަމުންނެވެ.
އިޓްލޮސްއިން ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފައެވެ. އިޓްލޮސްގެ ސްޕެޝަލް ޗެމްބަރުން އިއްވި ނިންމުމުގައި ވަނީ، ތިލަ ދިޔަވަރުގައި ފެންނަން އޮންނަ ފަރަކުން އިން ވަކިކުރުމަށްޓަކައި އިކުއިޑިސްޓަންސް ރޮނގު ދެމޭނެ އެއްވެސް ހަމައެއް ނެތްކަމަށެވެ. އެއާއެކު މޮރިޝަސްއާ ދެކޮޅަށް މައްސަލަ ނިމުމުން، ދެގައުމުގެ ފުށުއަރާ ސަރަހައްދުން ރާއްޖެއަށް ވަނީ 4،687 އަކަކިލޯމީޓަރުގެ އިތުރު ސަރަހައްދެއް ކަށަވަރުވެފައެވެ.
