ޗާގޯސް މައްސަލައާ ގުޅޭ ގޮތުން ދިވެހި ފުލުހުންނަށް މައުލޫމާތު ދިނުމުގެ ސެޝަނެއް ބާއްވައިފި އެވެ.
މި ސެޝަން ކުރިއަށްގެންގޮސްފައިވަނީ އަންގާރަ ދުވަހުގެ ރޭ އިސްކަންދަރު ކޮށީގައެވެ. މި ސެޝަނުގައި ޗާގޯސް މައްސަލައާ ގުޅޭގޮތުން ފުލުހުންނަށް މައުލޫމާތު ދެއްވީ ފޮރިން މިނިސްޓަރު އަބްދުﷲ ޝާހިދުއާއި އެޓަރނީ ޖެނެރަލް އިބްރާހިމް ރިފްއަތުއެވެ.
ފުލުހުން ބުނި ގޮތުގައި މި ސެޝަނަކީ ދިވެހިރާއްޖެއާއި މޮރިޝަސްއާ ދެމެދު މިހާރު ކުރިއަށްދާ މައްސަލައާ ގުޅޭގޮތުން ދިވެހި ފުލުހުންނަށް މައުލޫމާތުދިނުމަށް ގައުމީ ސަލާމަތާބެހޭ މަޖިލީހުން ނިންމެވުމާ ގުޅިގެން ކުރިއަށް ގެންދިޔަ ސެޝަނެއް ކަމަށެވެ.
ދިވެހި ފުލުހުންގެ ޚިދުމަތުގެ ސްޕްރިންޓެންޑެންޓް އޮފް ޕޮލިސްގެ ރޭންކުން ފެށިގެން މަތީގެ އޮފިސަރުންނަށް މައުލޫމާތު ދިނުމަށް ކުރިއަށް ގެންދިޔަ މި ސެޝަނުގައި، މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲ އާއި ކޮމިޝަނަރ އޮފް ޕޮލިސް މުޙައްމަދު ޙަމީދު އަދި މިނިސްޓްރީ އޮފް ފޮރިން އެފެއާޒާއި އެޓަރނީ ޖެނެރަލްގެ އޮފީހުގެ އިސް ބައެއް ވެރިންވެސް ބައިވެރިވެވަޑައިގެންނެވިއެވެ.
މޮރިޝަސް އިން ޗާގޯސްގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދައުވާ އެގައުމާއި އެއްކޮޅަށް ނިމި 2019 ވަނަ އަހަރު އެ ކޯޓުން ވަނީ ޗާގޯސް ވީ އެންމެ އަވަހަކަށް މޮރިޝަސްއާ ހަވާލުކުރުމަށް އިނގިރޭސިވިލާތަށް އަންގާފައެވެ. އެ އަހަރު މި ގަރާރުގައި ރާއްޖެއިން ވޯޓުލީ ދެކޮޅަށެވެ. ނަމަވެސް ދެވަނަ ފަހަރަށް އެފަދަ ވޯޓަކަށް އަހައިފިނަމަ ރާއްޖޭން މޮރިޝަސްއާ ދެކޮޅު ނަހަދާނެ ކަމަށް ވިދާޅުވެ، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ މޮރިޝަސްގެ ސަރުކާރަށް ސިޓީފުޅެއް ފޮނުއްވާފައެވެ.
މި މައްސަލައިގައި ރާއްޖޭގެ ސްޓޭންޑު ބަދަލުކޮށްފައިވާ ކަމަށް ބުނެ ދެކެވެމުން އަންނަ ވާހަކަތަކާ ގުޅިގެން ސަރުކާރުން ބުނެފައިވަނީ އޭގެ ސަބަބުން އިޓްލޮސްގައި މިހާރު ކުރިއަށްދާ ކަނޑުގެ ސަރަހައްދުގެ މައްސަލައިގައި އެއްވެސް ކަމަކަށް ބަދަލު ނާންނާނެ ކަމަށެވެ. އަދި އެކަން ރައީސްގެ ސިޓީފުޅުގައި ވެސް ފާހަގަކުރެއްވި ކަމަށް މިނިސްޓަރު ޝާހިދު މީގެ ކުރިން ވިދާޅުވެފައިވެއެވެ.
ސަރުކާރުން ބުނެފައިވާ ގޮތުގައި ޗާގޯސްގެ ސިޔާދަތީ ބާރު މޮރިޝަސް އަށް ލިބުމަށް ރާއްޖެއިން ތާއީދުކޮށް އެ ގައުމާއި އެއްކޮޅަށް ވޯޓުލާން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު ގައުމަކަށްވެފައި ގައުމުތަކުގެ ސިޔާދަތީ ބާރު އޮތުމަށް ތާއީދުކުރާ ގައުމަކަށް ރާއްޖެ ވާތީއެވެ.
