ޗާގޯސް ހޯދަން ހަނގުރާމައަށް ދާން ތައްޔާރު - ފައްޔާޒު
މި 5 އަހަރު ނިމޭއިރު ދިވެހިރާއްޖޭގެ އިސްތިގުލާލުގެ ތެރެއަށް ވަދެފައި އޮތް ބަޔަކަށް ޗާގޮސް ވާންޖެހޭނެ
އެމްޑީޕީގެ ޗެއަރޕާސަން ފައްޔާޒް އިސްމާއިލް
މިހާރު އޮތް ސަރުކާރުން ބޭނުންވާނަމަ ޗާގޯސް ހޯދަން ހަނގުރާމައަށް ދާން ތައްޔާރުކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒު ވިދާޅުވީ ޗާގޮސް ރާއްޖޭގެ ބަޔަކަށް ހަދަންވާނެ ކަމަށާއި، މި 5 އަހަރު ނިމޭއިރު ދިވެހިރާއްޖޭގެ އިސްތިގުލާލުގެ ތެރެއަށް ވަދެފައި އޮތް ބަޔަކަށް ޗާގޮސް ވާންޖެހޭނެ ކަމަށެވެ. ފައްޔާޒް ވިދާޅުވީ މި ސަރުކާރުން ބޭނުންވާނަމަ، އެ ހަނގުރާމައަށް ދާން އެމްޑީޕީން ނުކުންނާނެ ކަމަށެވެ.
ފައްޔާޒު ވިދާޅުވީ ފައިސާ ހުރިނަމަ ބުރިޖް އަޅަން ރަނގަޅު ކަމަށެވެ. ނަމަވެސް ވިސްނުން ހުރެގެން ކުރެވޭނެ ކަންކަމާއި އެއިން ލިބޭނެ ފައިދާއާއި އެ ހުރިހާ ކަމަކަށް ވިސްނަން ޖެހޭ ކަމަށެވެ.
މީގެއިތުރުން މި ސަރުކާރުގެ ވިޝަނެއް ވެސް ގާބިލުކަމެއް ވެސް ނެތް ކަމަށް ވިދާޅުވެ ފައްޔާޒް ވިދާޅުވީ މި ސަރުކާރަށް ދައްކަން އެނގެނީ ވާހަކަ އެކަނި ކަމަށާއި، މި ސަރުކާރަކީ ރައީސް ޔާމީންގެ ސަރުކާރުގައި ހަދާފައި ހުރި އިމާރާތެއް ދައްކައިގެން އެއީ އިގްތިސާދު ކަމަށް ބުނެ އެ ވިސްނުމުގައި އައިސްފައިތިބި ބައެއް ކަމަށެވެ. އަދި 'އިންޖިނިއަރަކަށް' ވިސްނޭނީ ވެސް އެގޮތަށް ކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ ރާއްޖޭގެ އިގްތިސާދު އިނދަޖައްސާލުމަށް ޓަކައި ކުރެވޭ ކަމެއް ނޫން އިތުރު އެއްވެސް ކަމެއް މި ސަރުކާރުގެ މި ދިޔަ 50 ދުވަހުގެ ތެރޭގައި ވެސް ނުކުރެވޭ ކަމަށެވެ.
މީގެ އިތުރުން ތާކުންތާކުނުޖެހޭ މައްސަލައެއްގައި އިންޑިއާގެ ރައްޔިތުންނާއި ރާއްޖޭގެ ރައްޔިތުންނާއި ފިތުނަ އުފައްދާ، ދެ ބައިމީހުން ޖައްސުވާފައިވާ ކަމަށް ވެސް ފައްޔާޒް ވިދާޅުވިއެވެ. އަދި އެކަންކުރީ ދެތިން އެކްޓިވިސްޓުން މަގާމުގައި ބޭތިއްބުމަށް ޓަކައި ކަމަށް ވެސް ފައްޔާޒު ތުހުމަތުކުރެއްވިއެވެ. އަދި އެކަން އެގޮތަށް ކޮށްފައިވަނީ އެކަމުގައި އިތުރު މަގުސަދެއް އޮވެގެން ކަމަށް ވެސް ފައްޔާޒް ވިދާޅުވިއެވެ.
ފައްޔާޒު ދެއްކެވި ވާހަަކަފުޅުގައި އިތުރަށް ވިދާޅުވީ ދިވެހިރާއްޖޭގެ ކުރިމަގު ބިރުވެރި ދިމާލަކަށް ދާ ކަމަށާއި، މިހާރު އޮތް ސަރުކާރަށް ފުރުސަތު ދީފިނަމަ، ދިވެހިންނަށް ލިބިފައިވާ ހުރިހާ މިނިވަންކަމަކާއި، ހުރިހާ ހައްގުތަކެއް ގެއްލިގެންދާނެ ކަމަށް ރިޔާސީ އިންތިހާބުގެ ކެމްޕޭންގެ ތެރޭގައި އެމްޑީޕީން ބުނަމުންދިޔަ ކަމަށެވެ.
އެހެންނަމަވެސް ދިވެހިން އެ ފުރުސަތު ދީފައިވާ ކަމަށާއި، މިއަދު އެ ފުރުސަތު ދިން ރައްޔިތުން ވެސް ހިތާމަކުރަމުން އަންނަ ކަމަށެވެ. އަދި ދެމަސް ވެސް ނުވަނީސް ސަރުކާރެއް ދެކެ ފޫހިވި މިފަދަ ސަރުކާރެއް އަދި ނާންނަ ކަމަށް ފައްޔާޒް ވިދާޅުވިއެވެ.
