ޓައިފޮއިޑު ފެތުރެނީ، އަވަހަށް ފަރުވާ ނުހޯދައިފިނަމަ ފުރާނައަށް ނުރައްކާވާނެ: ޑރ.ފައިސަލް
ޓައިފޮއިޑް ޖެހިފައިވާ ފަސް މީހުންނަށް ދަނީ ފަރުވާ ދެމުން
އައިޖީއެމްއެޗްގެ ކުޑަކުދިންގެ ޚާއްސަ ޑރ. އަހުމަދު ފައިސަލް
ރާއްޖޭގައި ޓައިފޮއިޑު ފެތުރެމުންދާ ކަމަށާއި، މިބައްޔަށް އަވަހަށް ފަރުވާ ނުހޯދައިފިނަމަ ފުރާނައަށް ނުރައްކާވާ ކަމަށް އައިޖީއެމްއެޗްގެ ކުޑަކުދިންގެ ޚާއްސަ ޑރ. އަހުމަދު ފައިސަލް ވިދާޅުވެއްޖެއެވެ.
ޑރ.ފައިސަލް ވިދާޅުވީ މިދުވަސްވަރު މި ބަލި ރާއްޖޭގައި ފެތުރޭ ކަމަށާއި، ޓައިފޮއިޑު ޖެހިފައިވާ ފަސް މީހުންނަށް އައިޖީއެމްއެޗްގައި ފަރުވާ ދެމުން ދާ ކަމަށެވެ. އެއީ ހަތަރު ކުޑަކުދިންނާ ބޮޑު މީހެކެވެ. ޓައިފޮއިޑު ކުރިން ވެސް ޖެހޭކަން ފާހަގަކޮށް ޑރ.ފައިސަލް ވިދާޅުވީ މީގެ ކުރިން ކޭހެއް ރިޕޯޓު ކުރެވެނީ ދެމަހުން އެއްމަހު އެއް ކޭސް ކަމަށާއި، ނަމަވެސް މިދިޔަ މަހު ފަހުކޮޅުން ފެށިގެން ފަސް މީހުންނަށް ބަލި ޖެހުމުން ކަންބޮޑުވާ ކަމަށެވެ.
ޑރ.ފައިސަލް ވިދާޅުވީ މިބަލި ޖެހިއްޖެނަމަ އަވަހަށް ޑޮކްޓަރަށް ދައްކައި ފަރުވާ ހޯދަންޖެހޭ ކަމަށެވެ. މިބަލީގައި ބައެއްފަހަރު ވަރަށް ބަލިވެދާނެ ކަމަށާއި، މަރުވެސްވާ ކަމަށެވެ. ބަލީގެ އަލާމަތްތަކަށް އިޝާރާތް ކުރައްވައި ޑރ.ފައިސަލް ވިދާޅުވީ މިބަލީގައި ގަދައަށް ހުންއައުމާއިއެކު ހޮޑުލެވޭ ކަމަށެވެ. އަދި ވިދާޅުވީ ބައެއް ފަހަރު ބައެއް މީހުންގެ ބަނޑަށް ތަދުވެ ބަނޑުދިޔާވާ ކަމަށާއި، އަނެއް ބައި މީހުންގެ ބަނޑު ހަރުވާ ކަމަށެވެ. ހަށިގަނޑުގެ އެކި ގުނަވަންތަކަށް އަސަރުކުރާއިރު، ބައެއް ހާލަތްތަކުގައި ލިވަރ ހަލާކުވުމާއި، ފިޓުޖެހުމާއި އަދި ހޭވެރިކަން ނެތުން ވެސް ހިމެނޭ ކަމަށް ޑރ.ފައިސަލް ވިދާޅުވިއެވެ.
މީގެ އިތުރުން ޑރ.ފައިސަލް ވިދާޅުވީ މިބަލިން ރައްކާތެރިވުމަށް އަތްދޮވުމާއި ކާބޯތެތީގެ ސާފުތާހިރުކަމަށް ޚާއްސަ ސަމާލުކަމެއް ދޭން ޖެހޭ ކަމަށެވެ. އެގޮތުން ބިސްފަދަ ނަޖިސް އުގުޅިފައި ހުންނަ އެއްޗެއްސާ އެހެނިހެން ކާ އެއްޗެހި ވަކިކުރަންޖެހޭ ކަމަށާއި، ފިހާރައިން އެއްޗެހި ގަންނައިރު ވެސް މިބާވަތުގެ އެއްޗެހި އެއްކޮށްގެން ނުވާނެ ކަމަށެވެ. އަދި ބަލީގެ އަލާމަތެއް ފެންނަނަމަ މީހުން އެއްވެ އުޅޭތަންތަނަށް ނުދިއުމަށް ވަނީ އިލްތިމާސްކޮށްފައެވެ.
މީގެ އިތުރުން އައިޖީއެމްއެޗްގެ އެތެރެހަށީގެ ޑރ. މުހައްމަދު އަލީ ވެސް ވަނީ މިފަދަ ބަލިތަކުން ރައްކާތެރިވުމަށް ޚާއްސަ އިލްތިމާސްއެއް ކުރައްވާފައެވެ.
ޑރ.މުހައްމަދު އަލީ ވިދާޅުވީ ވިޔަފާރިކުރާއިރު، އެއްކޮތަޅަށް އެއްޗެހި އަޅަމުން ގޮސް ރޯ ބިހާ އެހެނިހެން ކާއެއްޗެހި އެއްކޮތަޅަށް އެޅުން ރަނގަޅެއް ނޫން ކަމަށެވެ. ޑރ.މުހައްމަދު އަލީ ވިދާޅުވީ ބައެއްފަހަރަށް ރޯބިހުގެ ބޭރުގައި ހުންނަ ޖަރާސީމު، އެހެނިހެން ކާއެއްޗެއްސަށް އަރާ، ބޭރަށް ހިންގާ ރޯގާ ޖެހުމުގެ ފުރުސަތު އިތުރުވާ ކަމަށާއި، ރަނގަޅު ކުރުމަށް ބިހުގެ ބޭރު ޑިޓަރޖެންޑެއްލައިގެން ދޮވުނަސް ކަމުނުދާ ކަމަށެވެ. އަދި އެގޮތަށް ހެދުމުން ބިހުގެ ތޮށިގަނޑުގައި ހުންނަ ކުދިކުދި ވިދުތައް ބޮޑަށް ހުޅުވި، ބޭރުގަ ހުންނަ ޖަރާސީމް ބިހުގެ އެތެރެއަށް ވަނުމަށް މަގުފަހިވާ ކަމަށާއި، ބިސް ގަންނައިރު ބިހުގެ ބޭރު ރީތި ބިސް ގަތުމަކީ އެންމެ ރަނގަޅު ގޮތް ކަމަށް ޑރ.މުހައްމަދު އަލީ ވިދާޅުވިއެވެ.
ޓައިފޮއިޑަކީ ސަލްމޮނެއްލާ ޓައިފީ އޭ ކިޔާ ބެކްޓީރިއާ އަކުން ޖެހޭ ބައްޔެކެވެ. މި ބަލި ފެތުރެނީ ސާފުތާހިރުކަން ކުޑަވުމާއި ތަޣައްޔަރު ވެފައިވާ ކާބޯތަކެތީގެ ސަބަބުންނެވެ. ސަލްމޮނެއްލާ ޓައިފީ އަކީ ހަށިގަނޑުގެ ވަކި ގުނަވަނެއްގައި އަށަގަންނަ ބެކްޓީރިއާއެކެވެ. އަވަހަށް ފަރުވާ ނުހޯދާ ގިނަ ދުވަސް ވެއްޖެ ނަމަ، ހަށިގަނޑުގައި ބެކްޓީއާ އަށަގަނެފައި ވާ ގުނަވަނަށް އޭގެ އަސަރު ކުރެއެވެ.
މިބައްޔަށް ދިވެހިން އާއްމުކޮށް ކިޔާ އުޅެނީ ގަދަ ހުމެވެ.
