ފަތުވާ މަޖިލީހުގެ ހުސްވެފައިވާ 3 މަގާމަށް މެންބަރުން އައްޔަންކުރައްވައިފި
އެ މަޖިލީހުގައި ދައުރު ހަމަނުވެ ހުންނެވީ ރައީސް އެކަނި
އިސްލާމިކް މިނިސްޓްރީ
ރާއްޖޭގެ އިސްލާމީ ފަތުވާ ދޭ މަޖިލީހުގެ ހުސްވެފައިވާ މަގާމުތަކަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މެންބަރުން އައްޔަންކުރައްވާފައިވާކަމަށް ރައީސް އޮފީހުން ބުނެފިއެވެ.
ދިވެހި ރައްޔިތުންގެ ދީނީ އެއްބައިވަންތަކަން ހިޔާމަތްކުރުމުގެ ގާނޫނުގެ ދަށުން ފަތުވާ މަޖިލިސް އުފައްދަވާފައިވާއިރު، މި މަޖިލިސް އެކުލަވާލާފައިވާ ގޮތުން ފަތުވާ މަހިލީހުގައި ހިމެނެނީ ރައީސުލްޖުމްހޫރިއްޔާ އައްޔަން ކުރައްވާ ހަތަރު މެންބަރުންގެ އިތުރުން، މިނިސްޓަރުގެ ލަފާ މަތިން އައްޔަން ކުރައްވާ މެންބަރެކެވެ.
މި މަޖިލީހަށް ރައީސުލްޖުމްހޫރިއްޔާ އައްޔަންކުރައްވާފައިވާ 3 މެންބަރެއްގެ ދައުރު ހަމަވިތާ ދެ އަހަރެއްހާ ދުވަސް ފަހުން މިހާރު މިވަނީ އިތުރު 3 މެންބަރުން އައްޔަންކުރައްވާފައެވެ. މިކަން ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ ރާއްޖެޓީވީއަށް ކަށަވަރުކޮށްދެއްވާފައެވެ. އެހެންނަމަވެސް ފަތުވާ މަޖިލީހަށް ރައީސުލްޖުމްހޫރިއްޔާ އައްޔަންކުރެއްވީ ކޮންމެ ބޭފުޅުންނެއްކަން ސާފުވެފައެއް ނުވެއެވެ.
އައު މެންބަރުން އައްޔަންކުރެއްވުމުގެ ކުރިން ރައީސުލްޖުމްހޫރިއްޔާ އައްޔަންކުރައްވާ މެންބަރުންގެ ތެރެއިން އެ މަޖިލީހުގައި ހުންނެވީ ރައީސް ޑރ. މުހައްމަދު ރާޝިދު އިބްރާހީމެވެ. ފަތުވާ މަޖިލީހުގެ މެންބަރަކަށް 5 އަހަރުގެ ދައުރެއް ލިބެއެވެ.
ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ (7) ވަނަ މާއްދާގެ (ހ) ގައިވާ ގޮތުން ރާއްޖޭގައި ދީނީ އެއްބައިވަންތަކަން ގާއިމްކޮށް ދެމެހެއްޓުމަށްޓަކައި މުޖުތަމައަށް ބޭނުންވާ ދީނީ ފަތުވާ ދިނުމަކީ އިސްލާމީ ފަތުވާދޭ އެންމެ މަތީ މަޖިލީހުގެ މަސްއޫލިއްޔަތެކެވެ. މި މާއްދާގެ (ށ) ގައިވާ ގޮތުން ދައުލަތުގެ މުއައްސަސާތަކަށް ވެސް އިސްތިޝާރީ ލަފާ ދޭނީ އެ މަޖިލީހުންނެވެ.
