ޕާކިސްތާނުގެ ސްކޫލަކަށް ބަޔަކު ބަޑި ހިފައިގެން ވަދެ ހަމަލާ ދިނުމުގެ ސަބަބުން 7 މީހުން މަރުވެއްޖެ

ޕާކިސްތާނުގެ ހުޅަނގު އުތުރު ކުއްރަމް ޑިސްޓްރިކްޓްގެ ސްކޫލަކަށް ބަޔަކު ބަޑި ހިފައިގެން ވަދެ، ދިން ހަމަލާއެއްގައި ހަތަރު ޓީޗަރުންނާއެކު ޖުމްލަ ހަތް މީހުން މަރުވެއްޖެއެވެ. ސަރުކާރު ހައިސްކޫލެއްކަމަށްވާ ތަރި މަންގަލްގެ ސްޓާފް ރޫމަށް ބަޑި ހިފައިގެން ވަދެ ހަމަލާދިނުމުގައި އެކަކަށްވުރެ ގިނަ މީހުން ބައިވެރިވެފައިވާކަމަށް ފުލުހުން މައުލޫމާތު ދީފައިވެއެވެ.

ހަމަ މިއަދު ހެދުނުގެ ވަގުތެއްގައި މި ޑިސްޓްރިކްޓްގައި، ކާރެއްގައި އިން މީހެއްގެ ގަޔަށްވެސް ބަޑިޖަހައި މަރާލާފައިވެއެވެ. ހަވީރު ދިން ހަމަލާއަކީ ހެނދުނުގެ ހަމަލާއާ ގުޅުންހުރި، އެކަމުގެ ބަދަލު ހިފުމުގެ ހަމަލާއެއްކަމަށް ބެލެވޭކަމަށް ފުލުހުން ބުނެފައިވެއެވެ.

ސްކޫލަށް ވަދެ ހަމަލާދީ ހަތް މީހުން މަރާލުމަށްފަހު އެމީހުން ފިލާފައިވާކަމަށްވެއެވެ. ހަމަލާ ދިންއިރު ޓީޗަރުން ގެންދިޔައީ އިމްތިހާނަކަށް ތައްޔާރުވުމުގެ މަސައްކަތް ކުރަމުން ކަމަށް ވެއެވެ.

އަފްޣާނިސްތާނުގެ އިމާ ކައިރީގައިވާ ކުއްރަމް ޑިސްޓްރިކްޓްގެ ސްކޫލަކަށް ވަދެ ދިން ހަމަލާއާބެހޭ މާބޮޑު ތަފްސީލެއް ފުލުހުން ހާމައެއްނުކުރެއެވެ. އަދި އެކަން ކުރި މަގްސަދުވެސް ހާމަނުވާކަމަށްވެއެވެ.

ޕާކިސްތާނުގެ ކުރީގެ ރައީސް އާސިފް އަލީ ޒަރްދާރީ ވަނީ މިހަމަލާ ކުށްވެރިކުރައްވައި ޓްވީޓް ކުރައްވާފައެވެ.