މެސީއާއި ނޭމާއާ ދެކޮޅަށް ޕީއެސްޖީގެ ސަޕޯޓަރުން އިހުތިޖާޖުކޮށްފި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ އާޖެންޓީނާގެ ލިއޮނަލް މެސީއާއި ބްރެޒިލްގެ ނޭމާ ޖޫނިއާއާ ދެކޮޅަށް އެ ކުލަބުގެ ސަޕޯޓަރުން އަޑު އުފުލައި، އިހުތިޖާޖުކޮށްފިއެވެ.

ބުދަ ދުވަހު ޕީއެސްޖީގެ ސަޕޯޓަރުން ވަނީ ކުލަބުގެ ހެޑްކުއާޓަރ ކައިރިއަށް އެއްވެ އެ ދެ ކުޅުންތެރިންނާ ދެކޮޅަށް އަޑު އުފުލައިފައެވެ. އެ އިހުތިޖާޖުގައި، ސަޕޯޓަރުން ތިބީ މެސީއާއި ނޭމާއާ ދެކޮޅަށް އެކިއެކި ޝުއޫރު ފާޅުކޮށްފައިވާ ބޯޑުތައް ހިފައިގެންނެވެ. އަދި އެ ކުޅުންތެރިންނަށް އަމާޒުކޮށްގެން ވަނީ ހަޑި ހުތުރު ބަސްތައްވެސް ބޭނުންކޮށްފައެވެ. އެއަށްފަހު ސަޕޯޓަރުން ވަނީ ނޭމާ ދިރިއުޅޭ ގެ ކައިރިއަށްވެސް އެއްވެ، އަޑު އުފުލައިފައެވެ.

އެކަމާ ގުޅިގެން ޕީއެސްޖީން ވަނީ ބަޔާނެއް ނެރެފައެވެ. އެ ބަޔާނުގައި އެ ކުލަބުން ބުނެފައިވަނީ މަދު ސަޕޯޓަރުންތަކެއް ކުރިއަށްގެންދިޔަ މި ހަރަކާތް އެންމެ ހަރުކަށި އިބާރާތުން ކުށްވެރިކުރާކަމަށެވެ. ޕީއެސްޖީން ބުނީ އެއީ ވަރަށް ދަށުދަރަޖައިގެ އަމަލެއް ކަމަށާއި، ޕީއެސްޖީން އެ ކުލަަބުގެ މުވައްޒަފުންނާއި އެންމެހައި ކުޅުންތެރިންނަށް ފުރިހަމައަށް އެއްބާރުލުން ދޭނެކަމަށެވެ.

މެސީއާ ޕީއެސްޖީއާ ދެމެދު މިހާރު ވަނީ މައްސަލަޖެހިފައެވެ. އެއީ ޕީއެސްޖީގެ ހުއްދަ ނުހޯދައި މެސީ ސައޫދީ އަރަބިއްޔާއަށް ދިޔަކަމަށް ބުނެއެވެ. އެ މައްސަލާގައި ޕީއެސްޖީން ވަނީ ދެ ހަފުތާގެ މުއްދަތަކަށް މެސީ ސަސްޕެންޑުވެސް ކޮށްފައެވެ. އެ މުއްދަތުގައި މެސީއަށް މުސާރައެއްވެސް ކުލަބުން ނުދޭނެއެވެ. އަނެއްކޮޅު މެސީ ވަނީ ޕީއެސްޖީގެ އެއްބަސްވުން އައުނުކުރުމަށް މީގެ މަސް ދުވަސް ކުރިން ނިންމާފައި ކަމަށްވެސް ރިޕޯޓުތައް ބުނެއެވެ. އެހެންކަމުން މެސީއާ ޕީއެސްޖީއާ ދެމެދު މައްސަލަ ހޫނުވީ އެ ސަބަބާހުރެ ކަމަށްވެސް މީޑިއާ ރިޕޯޓުތައް ބުނެއެވެ.

އަނެއްކޮޅުން ބާސެލޯނާ ދޫކޮށް ޕީއެސްޖީއަށް ބަދަލުވިފަހުން ނޭމާއަށް އެންމެ އެކަށީގެންވާ ކުޅުމެއް ނުދެއްކެއެވެ. މީގެ އިތުރުން ނޭމާވެސް ކުލަބު ދޫކޮށްލަން އުޅޭކަމުގެ އަޑުތަކެއް ދޭތެރެއަކުން ފެތުރެއެވެ. މިވަގުތު ނޭމާ ހުރީ އޭނާއަށް ލިބުނު އަނިޔާއެއްގެ ސަބަބުން ކުޅުމާ ދުރުގައެވެ.