28 އަހަރުވީ ޝިއަރާގެ ރެކޯޑް ހާލަންޑް މުގުރާލައިފި
4 މެއި 2023 | ބުރާސްފަތި 02:2335 ލަނޑު ޖަހައި އެއް ސީޒަނެއްގައި އެންމެގިނަ ލަނޑު ޖެހި ކުޅުންތެރިއަކީ މިހާރު ހާލަންޑް
ހާލަންޑް: ޕްރެމިއާ ލީގުގެ ރެކޯޑް ވަނީ މުގުރާލައިފައި
މެންޗެސްޓާ ސިޓީގެ ޒުވާން ފޯވަޑް އާލިން ހާލަންޑް އިނގިރޭސި ޕްރެމިއާ ލީގުގެ 28 އަހަރުވީ ގޯލު ޖެހުމުގެ ރެކޯޑް މުުގުރާލައިފި އެވެ.
ވެސްޓްހޭމް އަތުން ސިޓި 3-0އިން މޮޅުވި މެޗުގައި އޭނާ ޖެހި ގޯލާއެކު މި ސީޒަނުގައި 33 މެޗުން އޭނާ ވަނީ 35 ގޯލު ޖަހައިފަ އެވެ. މިއީ މުޅިން އައު ރެކޯޑެކެވެ. ކުރިން އެއް ސީޒަނެއްގައި އެންމެ ގިނަ ގޯލު ޖެހުމުގެ ރެކޯޑް އޮންނަނީ ނިއުކާސަލް އަށް ކުޅުނު އިނގިރޭސި ކުރީގެ ކެޕްޓަން އެލަން ޝިއަރާ އާއި މެންޗެސްޓާ ޔުނައިޓެޑަށް ކުޅުނު އެންޑީ ކޯލްގެ އަތުގަ އެވެ. މި ދެ ކުޅުންތެރިން ޖަހާފައިވަނީ 34 ލަނޑެވެ.
ޝިއަރާގެ ރެކޯޑަށް 28 އަހަރު ފަހުން ހާލަންޑް އެ ރެކޯޑް މުގުރާލުމުން ޝިއަރާ ވަނީ ހާލަންޑަށް މަރުހަބާ ކިޔައިފަ އެވެ.
ހާލަންޑް ބުނީ ރެކޯޑް މުގުރާލެވި، އަމިއްލަ ރެކޯޑެއް ގާއިމްކުރެވުމުން ވަރަށް އުފާވެއްޖެ ކަމަށާއި "މިރެއަކީ ވަރަށް އުފާވެރި ރެއެއް،" ކަމަށެވެ.
އެހާރާއި މިހާރުގެ ޕްރެމިއާ ލީގުގެ ކުޅުންތެރިން ހާލަންޑަށް މަރުހަބާ ކިޔަމުން އަންނައިރު ސިޓީގެ ކޯޗު ޕެޕް ގާޑިއޯލާ ވެސް ވަނީ ނޯވޭގެ ފޯވަޑަށް ތައުރީފް އޮއްސާލައިފަ އެވެ.
ރެކޯޑް މުގުރާލުމުން ސިޓީގެ ކުޅުންތެރިންނާއި އޮފިޝަލުން ވަނީ ހާލަންޑަށް ގާޑް އޮފް އޮނާއެއް އަރުވައިފަ އެވެ. ނަމަވެސް ގާޑިއޯލާ ބުނީ ހާލަންޑަށް ޕްރެމިއާ ލީގުން ދޭ ގާޑް އޮފް އޮނާއެއް ހައްގު ކަމަށެވެ.
މި މޮޅާއެކު ސިޓީ އޮތީ ތާވަލުގެ އެއްވަނާގަ އެވެ. އެއީ ދެވަނާގައިވާ އާސެނަލްއަށްވުރެ އެއް މެޗު މަދުން ކުޅެގެންނެވެ.
