ދުނިޔެ ވަށާ ބައިސްކަލުގައި އެންމެ އަވަހަށް ބުރު ޖެހުމުގެ ރިކޯޑް އިނގިރޭސިވިލާތުގެ ސައިކްލިސްޓަކު މުގުރާލައިފިއެވެ.

އިނގިރޭސިވިލާތުގެ އެންޑިއުރެންސް ސައިކްލިސްޓެއް ކަމަށްވާ މާކް ބިއުމޮންޓް މި ރިކޯޑު މުގުރާލާފައިވަނީ 79 ދުވަހާ 14 ގަޑިއިރާ 14 މިނިޓުން ދުނިޔެ ވަށައިގެން ބުރެއް ފުރިހަމަކޮށްގެންނެވެ. މީގެ ކުރިން މި ރިކޯޑު އޮންނަނީ ނިއުޒިލޭންޑުގެ އެންޑްރޫ ނިކޮލްސަން އަތުގައެވެ. 2015 ވަނަ އަހަރު އޭނާ މި ރިކޯޑު ގާއިމު ކުރީ 123 ދުވަހުން ދުނިޔެ ވަށާ ބުރެއް ފުރިހަމަކޮށްގެންނެވެ.

މި ރިކޯޑު ގާއިމު ކުރުމަށް އޭނާގެ މަސައްކަތް ފެށީ ޖުލައި މަހުގެ ދެވަނަ ދުވަހު ފްރާންސްގެ ޕެރިހުންނެވެ. މި ދަތުރުގައި އޭނާވަނީ ފިންޔާއި ހޫނުގެ އިތުރުން ތޫފާނުތަކުގެ ތެރޭ 18000 މޭލު ކަޑައްތުކޮށްފައެވެ. އޭނާގެ މި ދަތުރުގެ ފުރަތަމަ މަހުގައިވެސް 7030 މޭލު ދަތުރު ކުރިއެވެ. މި ރިކޯޑު ގާއިމު ކުރުމަށްޓަކައި އޭނާ ވަނީ ދުވާލަކު 16 ގަޑިއިރު ބައިސްކަލުގައި ހޭދަކޮށްފައެވެ. ހަމައެހެންމެ މި 79 ދުވަސްތެރޭ އޭނާއަށް ލިބިފައިވަނީ ކޮންމެ ދުވަހަކު ވެސް އެންމެ ފަސް ގަޑިއިރުގެ ނިންޖެވެ.

ބިއުމޮންޓްގެ މި ދަތުރުގެ ފުރަތަމަ ސްޓޭޖު ޕެރިސްއިން ފެށުމަށްފަހު ނިންމާލާފައިވަނީ ޗައިނާގެ ބެއިޖިންގްއަށެވެ. އަދި ދެވަނަ ސްޓޭޖުގައި އޮސްޓްރޭލިއާއާއި ނިއުޒިލޭންޑް ކަޑައްތުކުރިއިރު އޭނާވަނީ ތިންވަނަ ސްޓޭޖުގައި އެމެރިކާގެ އަލަސްކާއިން ފެށިގެން ހެލިފެކްސްއަށް ދަތުރުކޮށްފައެވެ. އަދި އެންމެ ފަހު ސްޓޭޖުގައި އޭނާ ދަތުރުކުރީ ޕޯޗުގަލްގެ ލިސްބަންއިން އޭނާގެ ދަތުރު ފެށި ޕެރިހަށެވެ. މި ދަތުރުގައި އޭނާ ކަނޑުތަށް ހުރަސްކުރީ ފްލައިޓުންނެވެ. 79 ދުވަސް ތެރޭ މިދަތުރު ނިންމާލުމަށް ބިއުމޮންޓް ދުވާލަކު 240 މޭލެ ދަތުރުކުރަން ޖެހުނެވެ.

މި ދަތުރު ފުރިހަމަ ކުރުމަށްފަހު ނޫސްވެރިންނާ ވާހަކަ ދައްކަމުން ބިއުމޮންޓް ބުނެފައިވަނީ ރިކޯޑު މުގުރާލުމަކީ އޭނާގެ ވަރަށް ބޮޑު ހުވަފެނެއް ކަމަށާއި އެކަން ހަގީގަތަކަށް ވުމުން ވަރަށް ބޮޑަށް އުފާވާ ކަމަށެވެ. ހަމައެހެންމެ މި ދަތުރަކީ އޭނާގެ ހަޔާތުގައި ފުރިހަމަކުރި އެންމެ ބުރަ މަސައްކަތްކަމަށާއި އެތަށް ބަޔަކު ނުކުރެވޭނެ ކަމެއް ކަމަށް ބުނި ކަންތަށް ފުރިހަމަ ކުރުމަކީ އޭނާއަށް ލިބުނު ވަރަށް ބޮޑު ފަހުރެއް ކަމަށެވެ. އަދި އޭނާވަނީ މި ދަތުރުގެ ތެރޭގައި އޭނާއަށް އެކި މީހުންގެ ފަރާތުން ލިބުނު އެއްބާރުލުމާ ތަރުހީބަށް ވަރަށް ބޮޑަށް ޝުކުރުއަދާކޮށްފައެވެ.

ބިއުމޮންޓްގެ މި ދަތުރުގައި އޭނާއާއެކު މެކޭނިކާކާއި ނިއުޓްރިޝަނިސްޓަކާއި ފިސިއޮތެރަޕިސްޓެއްގެ އިތުރުން އޭނާގެ މެނޭޖަރު ބައިވެރިވިއެވެ. ބިއުމޮންޓް ވަނީ 2008 ވަނަ އަހަރުވެސް މި ރިކޯޑު މުގުރާލާފައެވެ. އެ ފަހަރު އޭނާ މި ރިކޯޑު މުގުރާލީ 194 ދުވަހުން ދުނިޔެ ވަށާ ބުރެއް ފުރިހަމަކޮށްގެންނެވެ.