ސަފާރީއެއްގެ ބުރަފަތީގައި ޖެހި، ރަސްގެތީމު ކައުންސިލްގެ ކުރީގެ ނައިބު ރައީސް އަވަހާރަވެއްޖެ
3 މެއި 2023 | ބުދަ 16:12އޭނާގެ އުމުރުފުޅަކީ 55 އަހަރު
ރ. އިނގުރައިދޫ
ރ. އިނގުރައިދޫ ފަޅުގައި ސަފާރީއެއް އެޅުއްވުމަށް މޫދަށް ފައިބާވަޑައިގެން އުޅުއްވަނިކޮށް، ރ. ރަސްގެތީމު މިދިޔަ ދައުރުގެ ކައުންސިލްގެ ނައިބު ރައީސް މުހައްމަދު އިބްރާހީމް އަވަހާރަވެއްޖެއެވެ. އޭނާއަކީ އެ ސަފާރީގައި މަސައްކަތްކުރައްވާ ބޭފުޅެކެވެ.
ބުރަފަތީގައި ޖެހުމާގުޅިގެން އޭނާއަށް ބޮޑެތި ޒަޚަމްތަކެއް ލިބިވަޑައިގެންފައިވެއެވެ. އަވާރަވީއިރު އޭނާގެ އުމުރުފުޅަކީ 55 އަހަރެވެ.
ފުލުހުން ބުނީ އިނގުރައިދޫ ފަޅަށް ވަންނަން އުޅުނު ސަފާރީއެއްގެ ބުރަފަތީގައި ވަލެއް އޮޅިގެން ނައްޓަން ފޭބި މީހެއްގެ ގައިގައި ބުރަފަތިން ޖެހި އެމީހާއަށް އަނިޔާވިކަމުގެ ރިޕޯޓު ލިބިފައިވާކަމަށެވެ. މިރިޕޯޓު ލިބިފައިވަނީ ބުދަ ދުވަހުގެ އިރުއޮއްސި 6:00ހާއިރު ކަމަށެވެ.
އޭނާ ސިއްހީ މަރުކަޒަށް ގެންދިޔައިރުވެސް އަވަހާރަވެފައިވާކަމަށް، އެ މަރުކަޒާ ހަވާލާދީ ފުލުހުން ބުނެއެވެ.
މި ހާދިސާ ހިނގަން މެދުވެރިވި ސަބަބު ފުލުހުން ދަނީ އިތުރަށް ތަހުގީގުކުރަމުންނެވެ.
