އިޓްލޮސްގެ ނިންމުމަކީ ރާއްޖޭގެ ހުރިހާ ރައްޔިތުންނަށް ލިބުނު ބޮޑު ކާމިޔާބީއެއް: ނ. މަގޫދޫ ކައުންސިލް
3 މެއި 2023 | ބުދަ 08:41މި އަގުބޮޑު ރައޫސުލްމާލު ރާއްޖޭގެ ރައްޔިތުންނަށް ލިބިގެންދިޔައީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ހިކުމަތްތެރިކަމާއި ދުރުވިސްނުންފުޅުގެ ސަބަބުން
ރައީސް މަގޫދޫ ކައުންސިލާ ބައްދަލު ކުރެއްވުން
އިމުގެ މައްސަލައިގައި އިޓްލޮސްގެ ނިންމުމަކީ ރާއްޖޭގެ ހުރިހާ ރައްޔިތުންނަށް ލިބުނު ބޮޑު ކާމިޔާބީއެއް ކަމަށް ނ. މަގޫދޫ ކައުންސިލުން ބުނެފިއެވެ.
އެ ކައުންސިލުން ބުދަ ދުވެހު ނެރުނު ބަޔާނެއްގައި ވަނީ އިޓްލޮސްގެ ނިންމުމާ ގުޅިގެން ދިވެހި ރައްޔިތުންނާއި މަސްވެރިންނަށް މަރުހަބާ ކިޔާފައެވެ. އެގޮތުން އެ ނިންމުމަކީ ދިވެހި ހުރިހާ ރައްޔިތުންނަށް ވެސް ލިބުނު ވަރަށް ބޮޑު ކާމިޔާބީއެއް ކަމަށާއި އެއީ ތާރީހުގައި ރަންއަކުރުން ލިޔެވޭނެ ކަމެއް ކަމަށް ވެސް އެ ކައުންސިލުން ބުންޏެވެ.
މަގޫދޫ ކައުންސިލުން ބުނީ އިމުގެ މައްސަލައިގައި ރާއްޖެއަށް 4687 އަކަކިލޯމީޓަރުގެ ސަރަހައްދެއް ލިބިފައިވާއިރު މި އަގުބޮޑު ރައޫސުލްމާލު ރާއްޖޭގެ ރައްޔިތުންނަށް ލިބިގެންދިޔައީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ހިކުމަތްތެރިކަމާއި ދުރުވިސްނުންފުޅުގެ ސަބަބުން ކަމާމެދު ދެބަސްނުވެވޭނެ ކަމަށެވެ. އަދި މިއީ އެމަނިކުފާނުގެ ޚާރިޖީ ސިޔާސަތު ފުރިހަމައަށް ކާމިޔާބުވެއްޖެ ކަމުގެ ވަރުގަދަ ރަމްޒެއް ކަމަށް އެ ކައުންސިލުގެ ބަޔާނުގައި ވަނީ ބުނެފައެވެ. އެހެންވެ އެ ކައުންސިލުން ރައީސް ޞާލިހަށް މަގޫދޫ ރައްޔިތުންގެ ފަރާތުން ޝުކުރު އަދާ ކޮށްފައެވެ.
މީގެ އިތުރުން މި ޤައުމުގެ ތާރީހުގައި ދިވެހިން ދުށް، އެންމެ އޯގާތެރ އަދި އެންމެ ތެދުވެރި ލީޑަރަކީ ރައީސް ޞާލިހު ކަން މިއަދު ހާމަވެގެން ހިނގައްޖެ ކަމަށާއި އެމަނިކުފާނުގެ ނަން، މުހައްމަދު ތަކުރުފާނާއި އަލިރަސްގެފާނާއި ދޮންބާޑަރައިން ފަދައިން ތާރީީހީ ފަތްފުއްތަކުގައި ލިޔެވިގެންދާނެ ކަމަށް ވެސް މަގޫދޫ ކައުންސިލުން ބުންޏެވެ.
މިދިޔަ ހުކުރު ދުވަހު އިޓްލޮސް އިން ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށް، ޗާގޯސް އާއި ރާއްޖޭގެ ފުށުއަރާ ސަރަހައްދުން ރާއްޖެއަށް 4،687 އަކަކިލޯމީޓަރުގެ އިތުރު ސަރަހައްދެއް ކަށަވަރުވާގޮތަށް ނިންމާފައެވެ.
މޮރިޝަސްގެ ފަރާތުން އިޓްލޮސްއަށް ހުށަހަޅާފައިވާ ހުށަހެޅުމުގައި ބޭސް ޕޮއިންޓް ކަނޑައަޅަން ފަށާނެ ހިސާބަކީ ތިލަ ދިޔަވަރުގައި ފެންނަން އޮތް ބްލެންހެމް ރީފް އިން ފެށިގެން ކަމުގައި ވަނީ ބަޔާންކޮށްފައެވެ. ނަމަވެސް ރާއްޖޭން ބުނެފައިވަނީ ބައިނަލްއަގުވާމީ ހަމަތަކަށް ބަލާއިރު، ތިލަ ދިޔަވަރުގައި ފެންނަން އޮންނަ ފަރަކުން ބޭސް ޕޮއިންޓު ކަނޑަނޭޅޭނެ ކަމަށެވެ. އިން ވަކިކުރުމުގެ މައްސަލައިގައި، ރާއްޖޭން ވަކާލާތުކުރީ، ކަނޑުގެ ސަރަހައްދުގެ އިން ވަކިކުރުމުގައި ބަލަން ޖެހޭނީ ޗާގޯސްގެ އައްސޭރިފަށުން ފެށިގެން ކަމަށް ބުނެއެވެ.
