އިންޑިޔާގައި އެއްދުވަހާ 456,000 މީހުން ވައިގެ މަގުން ދަތުރުކޮށްފި
2 މެއި 2023 | އަންގާރަ 14:02އެޕްރިލް 30 ވަނަ ދުވަހު އިންޑިޔާގެ އެކި ސްޓޭޓްތަކުން 2،978 ފްލައިޓް ފުރާފައިވާކަމަށް ރިކޯޑްތަކުން ދައްކާ
އިންޑިޔާގެ އެއާޕޯޓެއް
އިންޑިޔާގެ އެތެރޭގެ ވައިގެ ދަތުރުފަތުރުގެ ކަންތައް އިތުރު އުސްމިނަކަށް ގޮސް, އެއްދުވަހާ 456,000 މީހުން ދަތުރުކުރުމުގެ ރެކޯޑެއް ގާއިމްވެއްޖެއެވެ. މިކަން ހާސިލްވެފައިވަނީ އެޕްރިލް 30 ވަނަ ދުވަހުއެވެ. އެދުވަހު އިންޑިޔާގެ އެކި ސްޓޭޓްތަކުން 2،978 ފްލައިޓް ފުރާފައިވާކަމަށް ރިކޯޑްތަކުން ދައްކައެވެ.
މިކަން ފާހަގަކުރައްވައި ކުރެއްވި ޓްވީޓެއްގައި އޭވިއޭޝަން މިނިސްޓަރު ވިދާޅުވީ، މިކަމުން ދައްކައިދެނީ ކޮވިޑްގެ ބަލިމަޑުކަމަށްފަހު އިންޑިޔާގެ އިގްތިސާދު ފުޅާވެފައިވާ މިންވަރު ކަމަށެވެ.
ކޮވިޑް 19 ބަލިމަޑުކަމަށްފަހު އިގްތިސާދު އަލުން އާލާވާންފެށުމާއެކު އިންޑިޔާގެ އެތެރޭގައި ދަތުރުފަތުރު ކުރުމުގެ އޮއިވަރެއް ވަނީ ފެށިގެން ގޮސްފައެވެ. ތަފާސްހިސާބުތައް ދައްކާގޮތުގައި 2023ގެ ފުރަތަމަ ތިންމަސް ދުވަހުގެ ތެރޭގައި އެތެރޭގެ އުދުހުންތަކުގައި 37.5 މިލިއަން ފަސިންޖަރުން އުފުލާފައިވެއެވެ. މިއީ ކުރީ އަހަރުގެ ތަފާސް ހިސާބުތަކާ އަޅައިބަލާއިރު 51.7 އިންސައްތައިގެ ކުރިއެރުމެއް ކަމަށް ޑައިރެކްޓަރޭޓް ޖެނެރަލް އޮފް ސިވިލް އެވިއޭޝަންގެ ތަފާސް ހިސާބުތަކުން ދައްކައެވެ.
އެވިއޭޝަން އެނަލިސްޓެއް ފާހަގަކޮށްފައިވާގޮތުގައި ކޮވިޑްގެ ދެ އަހަރު އިގްތިސާދު އެއްވެސް ވަރަކަށް ކުރިއަރާފައި ނެތުމާއެކު މިހާރު މި ފެންނަނީ އެ މުއްދަތުގައި ހިފެހެއްޓިފައި ހުރި ޑިމާންޑުތައް ކަމަށް ބުނެފައިވެއެވެ. މީގެ އިތުރުން ފުރަތަމަ ފަހަރަށް ފްލައިޓަކުން ދަތުރުކުރި މީހުންގެ އަދަދުވެސް، ކޮވިޑް ޕެންޑަމިކަށްފަހު ވަރަށް ބޮޑަށް އިތުރުވެފައިވާކަން އޭނާ ފާހަގަކޮށްފައި ވެއެވެ.
އިންޑިޔާގެ ޑޮމެސްޓިކް ޓްރެވަލް ލޯޑްފެކްޓަރ ނުވަތަ އެއާލައިންތަކުގެ ގޮނޑިތައް ފުރޭވަރު 81.6 އިންސައްތަޔަށް އަރާފައިވާއިރު، މިއީ މިއަދު އެމެރިކާ، ޗައިނާ، ޖަޕާން، އޮސްޓްރޭލިޔާ، އަދި ބްރެޒިލްފަދަ ގައުމުތަކާ އަޅައިބަލާއިރު މުޅިދުނިޔޭގައިވެސް ނިސްބަތުން އެންމެ ބޮޑު ޑޮމެސްޓިކް މާކެޓް ކަމަށް ވެއެވެ.
އިތުރުވަމުންދާ ޑިމާންޑާ އެއްވަރަށް މަތިންދާބޯޓު ފްލީޓް އިތުރުކުރުމަށްވެސް އިންޑިޔާއިން ދަނީ މަސައްކަތްތަކެއް ކުރަމުންނެވެ. މިގޮތުން ކުރިއަށް އޮތް ދެތިން އަހަރުގެ ތެރޭގައި ލިބޭވަރަށް، 1،100 މަތިންދާބޯޓަށް ވަނީ އޯޑަރު ދީފައެވެ.
އަދި މުޅި ދުނިޔޭގެ އެވިއޭޝަން ތާރީޚުގައިވެސް ދިން އެންމެ ބޮޑު އޯޑަރު، މިއަހަރުގެ ފެބްރުއަރީ މަހު، ޓާޓާ ގްރޫޕުން ހިންގާ އެއަރ އިންޑިޔާއިން ދީފައިވެއެވެ. މިއީ އެއަރބަހާއި ބޮއިންގަށް ދިން 470 މަތިންދާބޯޓުގެ އޯޑަރެކެވެ. އަދި އިތުރުވާ ބޯޓުތަކުގެ ނިސްބަތުން ޕައިލެޓުންނާއި އިންޖިނޭރުންފަދަ މީހުން ތަމްރީންކޮށް، އަދި އެއާޕޯޓުތައް އެޅުންފަދަ، އުމްރާނީ ގޮތުން ގެންނަންޖެހޭ ބަދަލުތައްވެސް ގެންނަން ރާވާފައިވާކަމަށް ކަމާބެހޭ އޮފިޝަލުން ވަނީ ހާމަކޮށްފައެވެ.
