އިސްރޭއިލުން ގައްޒާއަށް ވައިގެ ހަމަލާތަކެއް ދީފި
27 ޖޫން 2017 | އަންގާރަ 16:43އިސްރާއީލުން ބުނަނީ މިއީ ރޮކެޓު ހަމަލާއަކަށް ދިން ރައްދުކަމަށް
އިސްރާއީލުން ފަލަސްޠީނަށް ދެމުންދާ ހަމަލާތަކަކީ ފަލަސްޠީނުގެ "ހަނގުރާމަވެރިން" ދެމުންދާ ހަމަލާތަކުގެ ރައްދުގައި ދޭ ހަމަލާ ކަމަށް އިސްރާއިލުން އަބަދުވެސް އުޒުރު ދައްކާ
އިސްރާއީލުން ފަލސްޠީނުގެ ގައްޒާއަށް ވައިގެ ހަމަލާތަކެއް ދީފިއެވެ.
އިސްރާއީލުން ގައްޒާއަށް ބޮން އަޅަންފަށާފައިވަނީ ހޯމަދުވަހުގެރެއެވެ. އިސްރާއީލުން ހާމަކޮށްފައިވާ ގޮތުގައި މި ހަމަލާތައް ދީފައިވަނީ ގައްޒާގެ ތެރެއިން، އިސްރާއީލަށް ރޮކެޓެއް ފޮނުވައިލުމާއި ގުޅިގެން އޭގެ ރައްދެއްގެ ގޮތުގައެވެ.
ފަލަސްޠީނުގެ އޮފިޝަލުން ހާމަކުރި ގޮތުގައި މި ހަމާލާތައް ދީފައިވަނީ ގައްޒާގެ ތިން ހިސާބަކަށެވެ. އެގޮތުން، ރަފާހް އަށާއި ގައްޒާ ސިޓީ ގެ އިތުރުން ގައްޒާ ސިޓީގެ އިރުދެކުނުގައިވާ ހުސް ބިމަކަށް އިސްރާއީލުން ވަނީ ހަމަލާދީފައެވެ.
ފަލަސްތީނުގެ ހެލްތު މިނިސްޓްރީގެ އޮފިޝަލަކު ވިދާޅުވީ މި ހަމަލާގައި އެއްވެސް މީހަކަށް އަނިޔާވެފައިވާކަން އެއްވެސް ފަރާތަކުން ރިޕޯޓްކޮށްފައިނުވާ ކަމަށެވެ.
އެހެންނަމަވެސް އޭއެފްޕީއިން ރިޕޯޓްކޮށްފައިވާ ގޮތުގައި މި ހަމަލާގައި ފިރިހެނަކަށް އަނިޔާވެގެން، އެމީހާއަށް ފަރުވާ ދިނުމަށްޓަކައި އެ ހިސާބުގައި ހުރި ގެއަކަށް ގެންދިޔަ މަންޒަރު އެ އޭޖެންސީގެ ނޫސްވެރިންނަށް ވަނީ ފެނިފައެވެ.
2008 ވަނަ އަހަރުން ފެށިގެން މިހާތަނަށް އިސްރާއީލް އާއި ހަމާސް ޖަމާޢަތުން ވަނީ ޖުމްލަ 3 ހަނގުރާމައެއް ކޮށްފައެވެ.
