ރެފްރީ އަށް މަރުގެ އިންޒާރު، މައްސަލަ ފުލުހަށް

ޖަރުމަނު ލީގުގެ ރެފްރީއެއް ކަމަށްވާ ސަސްޗާ ސްޓެގްމަން އާއި އޭނާގެ އާއިލާ އަށް މަރުގެ އިންޒާރު ދިން މައްސަލަ ފުލުހަށް ހުށަހަޅައިފި އެވެ.

ސްޓެގްމަން އަށް މަރުގެ އިންޒާރު ދިނީ ޖަރުމަނު ލީގުގައި ބޮރޫޝިއާ ޑޯޓްމަންޑުން ބޮކުމްއާ ދެކޮޅަށް ކުޅުނު މެޗުގައި އޭނާ ގޯސް ނިމުންތަކެއް ނިންމާފައިވާ ކަމަށް ބުނެ އެވެ. އެ މެޗުގެ ފަސްޓް ރެފްރީ އަކަށް ހުރި ސްޓެގްމަންއާ ދެކޮޅަށް ޑޯޓްމަންޑުން ވަނީ ޖަރުމަނު އެފްއޭ އަށް ޝަކުވާ ވެސް ހުށަހަޅައިފަ އެވެ. އެ ޝަކުވާގައި ޑޯޓްމަންޑުން ބުނީ، މެޗުގައި އެ ޓީމަށް ލިބެން ޖެހޭ ދެ ޕެނަލްޓީއެއް ރެފްރީ ނުދިން ކަމަށެވެ. އެ ޓީމުން ވަނީ އެކަމުގެ ހެކިތަކާއެކު ޖަރުމަނުގެ އެފްއޭ އަށް ޝަކުވާ ހުށަހަޅައިފަ އެވެ. އެއާއެކު ޖަރުމަނު އެފްއޭ އިން މައްސަލަ ބެލުމަށް ފަހު ނިންމީ، އެ މެޗުގައި ރެފްރީ އަށް ގޯސްތަކެއް ހެދިފައިވާ ކަމަށް އެ ޤައުމުގެ މީޑިއާ ތަކުގައި ވަނީ ބުނެފަ އެވެ.

އެކަމާ ގުޅިގެން ސްޓެގްމަން ވަނީ އޭނާ އާއި އޭނާގެ އާއިލާ އަށް މަރުގެ އިންޒާރު ދީފައިވާކަން ހާމަކޮށްފަ އެވެ. ސްޓެގްމަން ބުނީ، އޭނާ އަށް ޖަޒުބާތުތައް ވަރަށް ރަނގަޅަށް ވިސްނޭ ކަމަށެވެ. އަދި އެ މައްސަލައިގައި އޭނާ އާއި އާއިލާއަށް މަރުގެ އިންޒާރު ދީފައިވާ ކަމަށާއި، ފުލުހުންނަށް އެ މައްސަލަ ހުށަހަޅައި ޖިނާއީ މައްސަލައެއްގެ ގޮތުގައި ބަލައި ދިނުމަށް އެދިފައިވާނެ ކަމަށެވެ. އެ މައްސަލަ ފުލުހުން ބަލަމުން އަންނަ ކަމަށާއި، ސްޓެގްމަނަށް ރައްކާތެރިކަން ދިނުމަށް ފުލުހުން ނިންމާފައިވާ ކަމަށް ޖަރުމަނުގެ ނޫސްތަކުގައި ވަނީ ބުނެފަ އެވެ.

ބޮކުމްއާ އެއްވަރުވެ ޑޯޓްމަންޑަށް ވަނީ އެއް ވަނައިގައި ލީޑު ނަގަށް ލިބުނު ފުރުސަތު ގެއްލިފަ އެވެ. އޭގެ ފަހުން ބަޔާން މިއުނިކް ކުޅުނު މެޗު ކާމިޔާބުކޮށް އެ ޓީމު ވަނީ އަލުން އެއް ވަނަ އަށް ޖެހިލައިފަ އެވެ. ބަޔާން މިވަގުތު އެއް ވަނައިގައި އޮތީ ޕޮއިންޓެއްގެ ލީޑަކުންނެވެ.