މޮރީނިއޯ ޗެލްސީއަކަށް ނުދާނެ!
1 މެއި 2023 | ހޯމަ 16:41ޗެލްސީގެ ކޯޗުކަމުގައި މަދުވެގެން ތިން އަހަރު ހުރެވޭނެކަމުގެ ޔަގީންކަމެއްނެތް
ހޯސޭ މޮރީނިއޯ
އިޓަލީގެ ރޯމާގެ ކޯޗު ހޯސޭ މޮރީނިއޯ ޗެލްސީގެ ކޯޗުކަން ބޭނުންނުވާކަމަށް ބުނެފިއެވެ.
އިޓަލީގެ ނޫސްތަކުން ބުނާގޮތުގައި ޗެލްސީގެ ބައެއް އިސްވެރިން ވަނީ އެ ޓީމުގެ ކޯޗުކަމަށް ތިންވަނަ ފަހަރަށް މޮރީނިއޯ ގެންދިއުމަށް އޭނާއާ މަޝްވަރާކޮށްފައެވެ. ނަމަވެސް މިކަމަށް މޮރީނިއޯގެ ޝައުގުވެރިކަން ވަރަށް ކުޑަކަމަށްވެއެވެ. ސަބަބަކީ ޗެލްސީއަށް, އަންނަ ސީޒަނުގެ ޔޫރަޕުގެ އެއްވެސް މުބާރާތަކުން ފުރުސަތު ލިބެން ނެތުމެވެ. އަދި އޭނާ މިހާރު ކޯޗުކޮށްދެމުން އަންނަ ރޯމާއަށް ޗެމްޕިއަންސް ލީގުގެ ފުރުސަތު ލިބުން ގާތްކަމަށްވާތީއެވެ.
މީގެ އިތުރުން މޮރީނިއޯ ޗެލްސީއަށް ނުދާން ނިންމާ އަނެއް ސަބަބަކީ އެ ޓީމުގެ ކޯޗުގެ މަގާމުގައި މަދުވެގެން ތިން އަހަރު ހުރެވޭނެ ކަމުގެ ޔަގީންކަން ނެތުމެވެ. އެއީ ޗެލްސީ ނަތީޖާ ގޯސްވާއިރަށް އަވަސް އަވަހަށް ކޯޗުން ބަދަލު ކުރަމުންދިއުމެވެ. މީގެ އިތުރުން, މި ސީޒަނަށްފަހު ކާލޯ އެންޗެލޯޓީ ރެއާލް މެޑްރިޑުން ވަކިވެއްޖެނަމަ އެ ޓީމުގެ ކޯޗުކަމަށް މޮރީނިއޯ އުއްމީދުކުރާ ކަމަށްވެސް މިލާނުގެބައެއް ނޫސްތަކުން ބުނެއެވެ.
މޮރީނިއޯއަކީ ޗެލްސީގެ އެންމެ ކާމިޔާބު ކޯޗެވެ. އޭނާ ވަނީ އެ ޓީމަށް ތިން ފަހަރު ޕްރެމިއަރ ލީގު ކާމިޔާބުކޮށްދީފައެވެ. ރެއާލް މެޑްރިޑާއި އިޓަލީގެ އިންޓަރމިލާން، އަދި ޕޯޗުގަލްގެ ޕޯޓޯއާއި މެންޗެސްޓަރ ޔުނައިޓެޑަށްވެސް ކޯޗުކޮށްދިން މޮރީނިއޯ ވަނީ ޗެމްޕިއަންސް ލީގުވެސް ދެފަހަރު ކާމިޔާބުކޮށްފައެވެ.
ރޯމާއާއެކު އޭނާ ހަދާފައިވާ ތިން އަހަރުގެ ކޮންޓްރެކްޓް ހަމަވާނީ 2024ގައެވެ. އަދި އެކުލަބުގެ އިސްވެރިންނާ އަންނަ ހަފުތާގައި މޮރީނިއޯ ބައްދަލުކުރާ ގޮތަށްވެސް މިހާރުވަނީ ހަމަޖެހިފައެވެ.
