ހޮޅުދޫ ބާފާ ސޮކަރ ކަޕްގެ ޗެމްޕިއަންކަން އެފްސީ ބޭސް ސިޓީ ހޯދައިފި
29 އެޕްރީލު 2023 | ހޮނިހިރު 14:51މިިދިޔަ އަހަރުވެސް މުބާރާތް ކާމިޔާބުކުރީ އެފްސީ ބޭސް ސިޓީ
ޗެމްޕިއަން އެފްސީ ބޭސް ސިޓީ: ފޮޓޯ-ބާފާ
ނ. ހޮޅޫދޫ ބާފާ ޖަމްއިއްޔާއިން ބޭއްވި ބާފާ ސޮކަރ ކަޕްގެ ޗެމްޕިއަންކަން އެފްސީ ބޭސް ސިޓީން ހޯދައިފިއެވެ.
ފަސް ޓީމް ވާދަކުރި މުބާރާތުގެ ޗެމްޕިއަންކަން އެފްސީ ބޭސް ސިޓީން ހޯދީ ފައިނަލްގައި 1-0ން ދަ ސިޓީ ބަލިކޮށްގެންނެވެ. ފައިނަލް މެޗުގެ ހަމައެކަނި ގޯލް ޖެހީ ހައިސަމް ރަޝީދުއެވެ. ފައިނަލް މެޗުގެ މޮޅު ކުޅުންތެރިއަކީ ބޭސް ސިޓީގެ ކީޕަރު މުހައްމަދު އަފްރާހުއެވެ. މުބާރާތުގެ 21 އަހަރުން ދަށުގެ އެންމެ މޮޅު ކުޅުންތެރިއަކީ ޗެމްޕިއަން ޓީމްގެ އުބައިދުﷲ އިބްރާހީމެވެ. ފެއަރޕްލޭ ޓީމަކީ ޓީސީއޯސީއެވެ. މިއީ އެފްސީ ބޭސް ސިޓީން ވިދިވިދިގެން މުބާރާތް ކާމިޔާބުކުރި ދެވަނަ ފަހަރެވެ.
މުބާރާތުގެ ފައިނަލުން އެފްސީ ބޭސް ސިޓީ ޖާގަހޯދީ ލީގު ބުރުގެ އެއްވަނަ ހޯދައިގެންނެވެ. ދަ ސިޓީ ފައިނަލުން ޖާގަހޯދީ ލީގު ބުރުގެ ދެވަނައާއި ތިންވަނަ ވާދަކުރި ސެމީފައިނަލް މެޗު ކާމިޔާބުކޮށްގެންނެވެ. އެއީ ސެމީފައި ޓީ-ބާރޒް ބަލިކޮށްގެންނެވެ. މިއީ ބާފާ ސޮކަރ ކަޕްގެ 14 ވަނަ މުބާރާތެވެ.
