ރާއްޖޭގައި ފުރަތަމަ ފަހަރަށް ޖެޓް ފިޔުލްއަށް ހާއްސަ ބާޖެއް

އެސްޓީއޯއިން ރާއްޖޭގައި ފުރަތަމަ ފަހަރަށް ޖެޓް ފިޔުލްއަށް ޚާއްސަ ބާޖެއް ކޮމިޝަން ކޮށްފިއެވެ.

"ލަގަނާ" ގެ ނަމުން ނަން ދީފައިވާ މި ބާޖަކީ ޑެޑިކޭޓެޑް ޖެޓް ފިޔުލް ބާޖެކެވެ. މިއީ އެސްޓީއޯ އާއި އައިލެންޑް އޭވިއޭޝަނާ ދެމެދު ވެފައިވާ އެއްބަސްވުމެއްގެ ދަށުން މާފަރު އިންޓަނޭޝަނަލް އެއަރޕޯޓަށް ބޭނުންވާ ޖެޓް އޭ-1 ތެޔޮ ސަޕްލައި ކުރުމަށް ހާއްސަކޮށްގެން ކޮމިޝަން ކޮށްފައިވާ ބާޖެކެވެ.

އެސްޓީއޯއިން ބުނިގޮތުގައި މި ބާޖު ތައްޔާރު ކޮށްފައިވަނީ ރާއްޖޭގެ އަތޮޅުތަކަށް އޭވިއޭޝަން ފިއުލް ރައްކާތެރިކަމާއިއެކު ގެންދިއުމުގައި ދިމާވާ މައްސަލަތަކަށް ހައްލެއް ހޯދުމަށެވެ. އަދި މިއީ އޭވިއޭޝަން ފިއުލް ކޮލިޓީގެ ޝަރުތުތައް ފުރިހަމަވާ އުޅަނދެއް ކަން ވެސް އެ ކުންފުނިން ފާހަގަކުރިއެވެ. އެގޮތުން، މިބާޖަކީ ކަމާބެހޭ ކޮލިޓީ އެޝުއަރެންސް ކޯޑްތަކުގައިވާ ގޮތުގެމަތިން އޭވިއޭޝަނަށް އިންޑަސްޓްރީ ސްޓޭންޑާޑް ފިލްޓަރުތަކާއެކު ކޮމިޝަންކޮށްފައިވާ އުޅަނދެއް ކަމަށާއި މިއީ ވެސް ރާއްޖޭގައި ފުރަތަމަފަހަރަށް ކުރެވުނު ކަމެއް ކަމަށް އެ ކުންފުނިން ބުންޏެވެ.

ލަގަނާ ބާޖަކީ 200 ކިއުބިކް މީޓަރުގެ ޖާގައިގެ ބާޖަކަށް ވާއިރު، އޭގައި ޒަމާނީ މިނެކިރުމުގެ އާލާތްތައް ވެސް ވަނީ ބަހައްޓައިފައެވެ.

މި އައު ބާޖާއެކު އުޅަނދުގެ ކްރޫންނަށް އޭވިއޭޝަން ފިއުލް ހެންޑްލިންގެ ފީލްޑް ޓްރެއިނިންގެ އިތުރުން، ކަމާބެހޭ އޮޕަރޭޝަންސް މެނުއަލްތަކާއި ލިޔެކިޔުންތައް ފޯރުކޮށްދީފައިވާނެ ކަމަށް ވެސް އެސްޓީއޯއިން ބުންޏެވެ.

މި ބާޖާއެކު އެސްޓީއޯ އިން ވަނީ އިންޑަސްޓްރީ ބެސްޓް ޕެރެކްޓިސް އާއި އެއްގޮތަށް ޖެޓް އޭ-1 ތެޔޮ ރިފައިނަރީ އިން ފެށިގެން ފްލައިޓް އާއި ހަމައަށް ޓްރޭސް ކުރެވޭނެ ކުއަލިޓީ އެޝުއަރެންސް ނިޒާމެއް ގާއިމު ކޮށްފެއެވެ. އެގޮތުން ކޮންމެ ޓްރާންސްފާ ޕޮއިންޓެއްގައި ތެލުގެ ސާމްޕަލް ނަގައި އެސްޓީއޯ އިން މާލޭގައި ގާއިމުކުރި ލެބޯޓްރީ ގައި ޓެސްޓްކުރާނެ ކަމަށް އެ ކުންފުނިން ބުންޏެވެ.

ލަގަނާ ތައްޔާރު ކޮށްފައިވަނީ ހަންސާ ކޮންސަލްޓް ޕްރޮޖެކްޓްސްގެ ކޮންސަލްޓެންސީއާ އެކުގައެވެ.