ބައެއް ދުވަސްވަރު ކަނޑުމެދުގައި ހުންނަ ރަށްރަށުގެ ބަނދަރަށް ވަނުމުގައި ގޮންޖެހުންތައް ކުރިމަތިވާ ކަމަށާއި، އެ ގުދުރަތީ ނިޒާމު ބަދަލު ނުކުރެވޭނެ ކަަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

މިމަހުގެ 26 ވީ ބުދަ ދުވަހު ކުރިއަށް ދިޔަ ރައްޔިތުން މަޖިލީހުގެ ޖަލްސާގައި ތޮއްޑޫ ދާއިރާގެ މެމްބަރު ހަސަން ޝިޔާން ކުރެއްވި ސުވާލަށް ޖަވާބުދެއްވަމުން މިނިސްޓަރު އަސްލަމް ވިދާޅުވީ ތޮއްޑޫގެ ބަނދަރުގެ ނެރު މައްޗަށް ބޮޑެތި ރާޅު ނަގާ މައްސަލާގައި ސީދާ ޖަވާބެއް ދެއްވަން އެނގިވަޑައިނުގަންނަވާ ކަމަށެވެ. އަދި ވިދާޅުވީ ރާއްޖޭގެ ހުރިހާ ރަށެއްގެ ބަނދަރުތަކަކީ އެއްޒާތެއްގެ ބަނދަރުތަކެއް ނޫން ކަމަށެވެ.

ފުވައްމުލައް ސިޓީގެ ބަނދަރަށް އިޝާރާތް ކުރައްވައި މިނިސްޓަރު ވިދާޅުވީ އެބަނދަރުގެ މަސައްކަތް ކުރިއިރު އިސްބޭފުޅެއްގެ ހައިސިއްޔަތުން އެ މަސައްކަތުގައި ޝާމިލްވެވަޑައިގެންނެވި ކަމަށެވެ. އެރަށުގެ ބަނދަރު ކޮންމެ އަހަރެއްގެ ވެސް 11 ދުވަހު ބޭނުން ނުކުރެވޭނެ ޑިޒައިން ރިޕޯޓުގައި އަންގާފައިވާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ މިއާ ހިލާފަށް ގދ.ފަރެސްމާތޮޑާގެ ބަނދަރު ބޭނުން ނުކުރެވޭ ދުވަހެއް ނާންނާނެ ކަމަށެވެ.

މީގެ އިތުރުން މިނިސްޓަރު ވިދާޅުވީ ސީދާ ކަނޑުގައި ހުންނަ ރާޅު ނުހުއްޓުވޭނެ ކަމަށާއި، ބަނދަރުގެ އެތެރެއަށް ވަންނަ ރާޅު ހުއްޓުވިދާނެ ކަމަށެވެ.

ތޮއްޑޫ ބަނދަރުގެ މަސައްކަތް ކުރަމުންދާއިރު، އެމަސައްކަތް ކުރަމުންދާ ފަރާތުން ބަނދަރުގެ މަސައްކަތް ނިމުމާއެކު ގިރާ ސަރަހައްދު ހިމާޔަތް ކުރުމުގެ މަސައްކަތް ފައްޓަވާނެ ކަމަށް މިނިސްޓަރު ވިދާޅުވިއެވެ.