ތަކުރާރުކޮށްލަން އީގަލްސްއަށް ރަނގަޅު ފުރުޞަތެއް، ސާންތިގެ ކަންބޮޑުވުމަކީ ހަވީރު ކުޅެން ޖެހުން

އަލުން ޕްރެޒިޑެންޓް ކަޕްގެ ތަށި ހޯދަން މިއީ ރަނގަޅު ފުރުޞަތެއް ކަމަށާއި, އެކަމަކު ސެމީފައިނަލް މެޗު ހަވީރު ކުޅެން ޖެހުމަކީ ޗެލެންޖެއްކަމަށް އީގަލްސްގެ ކޯޗު އިހުސާން އަބުދުލްޣަނީ (ސާންތި) ބުނެފިއެވެ.

ގްރޫޕް ސްޓޭޖްގައި ކުޅުނު ދެ މެޗުންވެސް މޮޅުވެ ސެމީފައިނަލަށް ދަތުރުކުރި ޓީމްގެ ކޯޗު ބުނީ މިއީ އީގަލްސްއާއި އޭނާއަށްވެސް ޚާއްޞަ މުބާރާތެއްކަމަށެވެ. އަދި އަލުން ތަށި ހޯދަން ރަނގަޅު ފުރުޞަތެއް ކަމަށެވެ. އެކަމަކު ފުރަތަމަ ދެ މެޗު އަދި އޭގެކުރިން ޗެރިޓީ ޝީލްޑް މެޗުވެސް ރޭގަނޑު ކުޅުމަށްފަހު ގަދަ ހޫނުގައި ހަވީރު ސެމީފައިނަލް މެޗު ކުޅެން ޖެހުމަކީ ޗެލެންޖެއްކަމަށް ބުންޏެވެ. އެއާއެކު ހަ ދުވަސް ތެރޭ ތިން މެޗު ކުޅެން ޖެހުމަކީވެސް ވިސްނަންޖެހޭ ކަމެއްކަމަށް ސާންތި ބުންޏެވެ. ސެމިފައިނަލްގައި އިދިކޮޅަށް ނިކުންނަ ބުރު ތިން މެޗު ކުޅުނީ 13 ދުވަސް ތެރޭގައެވެ. އަދި ސެމީފައިނަލަށް ނިކުންނަނީ ހަ ދުވަހުގެ ރިކަވަރީ އަށްފަހުކަން ސާންތި ފާހަގަކުރިއެވެ.

ސާންތި ބުނީ އޭނާއަށް ޓީމްގައި އަދިވެސް މުޅިން ހިތްހަމަޖެހޭވަރަށް ސެޓްކޮށް ނުލެވެނީ ޑިފެންސްކަމަށެވެ. އެކަމަކު އިސްމާއީލް އީސާ ފަދަ ތަޖުރިބާ ބޮޑު ކުޅުންތެރިން ޓީމްގައި ތިބުމާއި, އެކުޅުންތެރިން ރަނގަޅު ފޯމެއްގައި ތިބުން އެއީ ހިތްހަމެޖެހުމެއް އަދި އެޑްވާންޓޭޖެއްކަމަށް ސާންތި ބުންޏެވެ. އިދިކޮޅަށް ނިކުންނަ ބުރާ ގުޅޭގޮތުން ސާންތި ބުނީ ލީގު ޗެމްޕިއަން މާޒިޔާ ބަލިކޮށްގެން ސެމީއަށް އަންނައިރު ބުރު އޮންނާނީ ވަރަށް ރަނގަޅު ފޯމެއްގައި ކަމަށެވެ. އެހެންކަމުން ބުރަކީ ދެރަ ޓީމެއްގެ ގޮތުގައި ބެލެވެން ނެތްކަމަށެވެ.

ބުރުގެ ކޯޗު ނިޒާމްބެއަށް އިޝާރާތްކޮށް ބުނީ ބުރުން ޖެހިލުންވާ ޓީމެއް ނެތްކަން ތަކުރާރުކޮށް ބުނަމުން ނިޒާމްބެ އެކަން ސާބިތުކޮށްދީފިކަމަށެވެ. އަދި ބުރު ފުރަތަމަ ޑިވިޝަންގައި އަލަށް ވާދަކުރާއިރު ޒުވާން ކުޅުންތެރިން ގެންގުޅެން އިނގޭ, ޒުވާން ކުޅުންތެރިން އުފައްދާ ކޯޗެއް ހުރުމަކީ ބުރަށް އޮތް އެޑްވާންޓޭޖެއް ކަމަށްވެސް ސާންތި ބުންޏެވެ.

ބުރާއި އީގަލްސް ވާދަކުރާ ސެމީފައިނަލް މެޗު ކުޅޭނީ ބުރާސްފަތި ދުވަހު ހަވީރެވެ.