ފުޓުބޯޅައިގެ ޚިދުމަތްތެރިޔާ ސާންތީ ކޯޗު ނިޔާވެއްޖެ

ދިވެހި ރާއްޖެ އަށް ފުޓުބޯޅަ އަށް އަގު ހުރި ޚިދުމަތްތަކެއް ކޮށްދީފައިވާ މަޝްހޫރު ކޯޗު، އިޙުސާން ޢަބްދުލް ޣަނީ (ސާންތީ ކޯޗު) ނިޔާވެއްޖެ އެވެ.

އުމުރުން 51 އަހަރުގައި ސާންތީ ކޯޗު ނިޔާވެފައި ވަނީ ހޮނިހިރު ދުވަހުގެ ރޭގެ ވަގުތެއްގަ އެވެ. އަދި ނިޔާވީ، ޓްރީ ޓޮޕް ހޮސްޕިޓަލުގައި ފަރުވާ ހޯދަމުން ގެންދަނިކޮށް ކަމަށް މައުލޫމާތު ލިބިފައިވެ އެވެ.

ސާންތީ ކޯޗު ނިޔާވީއިރު އައީ ކެންސަރު ބައްޔަށް ވެސް ފަރުވާ ހޯދަމުންނެވެ.

ދިވެހި ފުޓުބޯޅަ އަށް ގިނަ ޚިދުމަތްތަކެއް ކޮށްދީފައިވާ ސާންތީ ކޯޗު ވަނީ ރާއްޖޭގެ އެކި ކުލަބުތަކުގެ އިތުރުން، ރާއްޖޭގެ ޤައުމީ ފުޓުބޯޅަ ޓީމުގައި ވެސް މަސައްކަތް ކޮށްފަ އެވެ.

ސާންތީ ކޯޗު ވަނީ ރާއްޖޭގެ ސީނިއާ ޤައުމީ ފުޓުބޯޅަ ޓީމުގެ އެސިސްޓެންޓު ކޯޗުގެ ގޮތުގައި މަސައްކަތް ކޮށްފަ އެވެ. 2008 ވަަނަ އަހަރު ރާއްޖެ އިން ސަރަހައްދީ ފުޓުބޯޅަ މުބާރާތް (ސާފް ޗެމްޕިއަންޝިޕް) ކާމިޔާބު ކުރިއިރު، އެ އަހަރު ސާންތީ ކޯޗު ވަނީ ގިނަ މަސައްކަތްތަކެއް ކޮށްފަ އެވެ.

އެންމެ ފަހުން ސާންތީ ކޯޗު ހުރީ ކުލަބު އީގަލްސްގެ ކޯޗުކަމުގެ މަގާމުގަ އެވެ. އެ މަގާމުން 2023 ވަނަ އަހަރު ވަކިވީ ވެސް، ބަލި ޙާލަތު ހުރި ގޮތުގެ ސަބަބުންނެވެ. އީގަލްސްގެ އިތުރުން ސާންތީ ކޯޗު ވަނީ ޔުނައިޓެޑް ވިކްޓްރީ އަދި ކުލަބު އޭދަފުއްޓަށް ވެސް އިރުޝާދު ދީފަ އެވެ.

ކޯޗިން ކެރިއަރުގެ އިތުރުން ސާންތީ ކޯޗު ވަނީ، ފުޓުބޯޅަ ހިންގުމުގައި ވެސް ގިނަ ޚިދުމަތްތަކެއް ކޮށްފަ އެވެ. އެގޮތުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޓެކްނިކަލް ޑިރެކްޓަރުގެ މަގާމު ވެސް ވަނީ އަދާ ކޮށްފަ އެވެ.

އޭގެ އިތުރުން މޯލްޑިވްސް ސްޕޯޓްސް ކޯޕަރޭޝަންގެ ޗެއާމަންކަމުގެ މަގާމު ވެސް ސާންތީ ކޯޗު ވަނީ އަދާ ކޮށްފަ އެވެ.

ސާންތީ ކޯޗު ނިޔާވުމާ ގުޅިގެން، ކުޅިވަރުގައި އިސްކޮށް އުޅުއްވައި ފަރާތްތަކާއި، އެކި އެކި ކުޅުންތެރިންނާއި، އަދި އާންމު ގިނަ ރައްޔިތުން އަންނަނީ ހިތާމަފާޅުކޮށް، އާއިލާ އަށް ތައުޒިޔާ ކިޔަމުންނެވެ.