ދާދި ފަހުން ނިޔާވި، ދިވެހި ފުޓުބޯޅަ އަށް ގިނަ ގުނަ ޚުމަތްތަކެއް ކޮށްދީފައިވާ، އަލްމަރުޙޫމް އިޙުސާން ޢަބްދުލް ޣަނީ (ސާންތި) ކޯޗުގެ ހަނދާނުގައި ތައުޒިޔާގެ ދަފުތަރެއް ހުޅުވަން ނިންމައިފި އެވެ.

ކުޅިވަރާއި، ހަށިހެޔޮ ކަމާ ބެހޭ ވުޒާރާ އިން ހާމަކޮށްފައިވާ ގޮތުގައިި، ސާންތި ކޯޗުގެ ހަނދާނުގައި ތައުޒިޔާގެ ދަފުތަރު ހުޅުވުން އޮންނާނީ ބުރާސްފަތި ދުވަހު އެވެ. ތައުޒިޔާގެ ދަފުތަރު ހުޅުވުން އޮތީ ބުރާސްފަތި ދުވަހުގެ ހަވީރު 16:00 ގައި، ގަލޮޅު ރަސްމީ ދަނޑުގަ އެވެ.

މުރުން 51 އަހަރުގައި ސާންތި ކޯޗު ނިޔާވެފައި ވަނީ މިދިޔަ ހޮނިހިރު ދުވަހުގެ ރޭގެ ވަގުތެއްގަ އެވެ. އަދި ނިޔާވީ، ޓްރީ ޓޮޕް ހޮސްޕިޓަލުގައި ފަރުވާ ހޯދަމުން ގެންދަނިކޮށެވެ ސާންތި ކޯޗު ނިޔާވީއިރު އައީ ކެންސަރު ބައްޔަށް ވެސް ފަރުވާ ހޯދަމުންނެވެ.

ދިވެހި ފުޓުބޯޅަ އަށް ގިނަ ޚިދުމަތްތަކެއް ކޮށްދީފައިވާ ސާންތި ކޯޗު ވަނީ ރާއްޖޭގެ އެކި ކުލަބުތަކުގެ އިތުރުން، ރާއްޖޭގެ ޤައުމީ ފުޓުބޯޅަ ޓީމުގައި ވެސް މަސައްކަތް ކޮށްފަ އެވެ.

ސާންތި ކޯޗު ވަނީ ރާއްޖޭގެ ސީނިއާ ޤައުމީ ފުޓުބޯޅަ ޓީމުގެ އެސިސްޓެންޓު ކޯޗުގެ ގޮތުގައި މަސައްކަތް ކޮށްފަ އެވެ. 2008 ވަަނަ އަހަރު ރާއްޖެ އިން ސަރަހައްދީ ފުޓުބޯޅަ މުބާރާތް (ސާފް ޗެމްޕިއަންޝިޕް) ކާމިޔާބު ކުރިއިރު، އެ އަހަރު ސާންތީ ކޯޗު ވަނީ ގިނަ މަސައްކަތްތަކެއް ކޮށްފަ އެވެ.

އެންމެ ފަހުން ސާންތި ކޯޗު ހުރީ ކުލަބު އީގަލްސްގެ ކޯޗުކަމުގެ މަގާމުގަ އެވެ. އެ މަގާމުން 2023 ވަނަ އަހަރު ވަކިވީ ވެސް، ބަލި ޙާލަތު ހުރި ގޮތުގެ ސަބަބުންނެވެ. އީގަލްސްގެ އިތުރުން ސާންތި ކޯޗު ވަނީ ޔުނައިޓެޑް ވިކްޓްރީ އަދި ކުލަބު އޭދަފުއްޓަށް ވެސް އިރުޝާދު ދީފަ އެވެ.

ކޯޗިން ކެރިއަރުގެ އިތުރުން ސާންތި ކޯޗު ވަނީ، ފުޓުބޯޅަ ހިންގުމުގައި ވެސް ގިނަ ޚިދުމަތްތަކެއް ކޮށްފަ އެވެ. އެގޮތުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޓެކްނިކަލް ޑިރެކްޓަރުގެ މަގާމު ވެސް ވަނީ އަދާ ކޮށްފަ އެވެ.

އޭގެ އިތުރުން މޯލްޑިވްސް ސްޕޯޓްސް ކޯޕަރޭޝަންގެ ޗެއާމަންކަމުގެ މަގާމު ވެސް ސާންތި ކޯޗު ވަނީ އަދާ ކޮށްފަ އެވެ.

ސާންތި ކޯޗުގެ ޖަނާޒާ މިދިޔަ އާދީއްތަ ދުވަހު ބާއްވާފައިވާއިރު، ގިނަ އަދަދެއްގެ ބަޔަކު ވަނީ ޖަނާޒާގައި ބައިވެރިވެފަ އެވެ. އަދި ސާންތި ކޯޗުގެ ވަކިވުމާ އެކު، ކުޅިވަރު އާއިލާ އިން އަންނަނީ އެކަމުގެ ހިތާމަ ފާޅުކޮށް، އާއިލާ އަށް ތައުޒިޔާ ވެސް ކިޔަމުންނެވެ.