މެސީ އަނެއްކާ ވެސް ބާސެލޯނާގައި!

ބާސެލޯނާގެ ކުރީގެ ކެޕްޓަން ލިއޮނަލް މެސީ އަނެއްކާ ވެސް ސްޕެއިންގެ ބާސެލޯނާ އަށް ގޮސް، އެ ޓީމަށް ކުޅުނު ބައެއް ރަޙުމަތްތެރިންނާ ބައްދަލުކޮށްފި އެވެ.

ބޭރުގެ މީޑިއާތަކުގައި ބުނެފައިވާ ގޮތުން މެސީ ބާސެލޯނާ އަށް ގޮސްފައި ވަނީ ހޮނިހިރު ދުވަހުގެ ވަގުތެއްގަ އެވެ. އެއަށްފަހު މެސީ ވަނީ ހޯމަ ދުވަހުގެ ރޭ އޭނާއާއެކު ކުރިން އެ ޓީމަށް ކުޅުނު ބައެއް ރަޙުމަތްތެރިންނާ ވެސް ބައްދަލުކޮށްފަ އެވެ. މީޑިއާ ރިޕޯޓުތައް ބުނާ ގޮތުގައި، މެސީ ވަނީ ސާޖިއޯ ބުސްކެޓްސް އާއި ޖޯޑީ އަލްބާއާއެކު ރޭގަނޑުގެ ކެއުމެއްގައި ބައިވެރިވެފަ އެވެ. ޓުވިޓާގައި ދައުރުވަމުންދާ ވީޑިއޯތަކުން ފެންނަ ގޮތުގައި ރޭގަނޑުގެ ކެއުމަށްފަހު މެސީ އެ ހޮޓަލުން ނުކުންނަ މަންޒަރު ފެނެ އެވެ. އެއަށްފަހު މެސީ އޭނާގެ ކާރަށް އަރަން ދާއިރު، ނޫސްވެރިން އޭނާއާ ސުވާލު ކުރުމަށް މަސައްކަތް ކުރާ މަންޒަރު ވެސް ފެނެ އެވެ. ނަމަވެސް މެސީ އެއްވެސް ސުވާލަކަށް ޖަވާބުދީފައި ނުވާއިރު، އޭނާ ވަނީ އެ ސަރަހައްދުގައި ތިބި ބައެއް މީހުންނާއެކު ސެލްފީ ނަގައިފަ އެވެ. ސްޕެއިންގެ މީޑިއާތަކުގައި ބުނެފައިވާ ގޮތުން މެސީ ބާސެލޯނާ އަށް ދިޔައީ އޭނާގެ އާއިލާއާ ވެސް އެކުގަ އެވެ.

މިއީ މިއަހަރުގެ ތެރޭގައި މެސީ ބާސެލޯނާ އަށް ދަތުރުކުރި ދެ ވަނަ ފަހަރު ކަމަށް ވެސް ރިޕޯޓުތައް ބުނެ އެވެ. މީގެ ކުރިން މިއަހަރުގެ ފެބްރުވަރީ މަހު ވެސް މެސީ ވަނީ ބާސެލޯނާގައި، ބުސްކެޓްސް އާއި އަލްބާއާއެކު ކެއުމެއްގައި ބައިވެރިވެފަ އެވެ. އެފަހަރު އެ ފޮޓޯތައް ވެސް ވަނީ ސޯޝަލް މީޑިއާގައި ދައުރުވެފަ އެވެ. މެސީ އާއި އޭނާގެ އަންހެނުންގެ އިތުރުން އެ ކައުމުގައި ބުސްކެޓްސް އާއި އަލްބާގެ ލޯބިވެރިން ވެސް ވަނީ ބައިވެރިވެފަ އެވެ. ބާސެލޯނާ ދޫކޮށް މެސީ ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވި ނަމަވެސް، އޭނާ އަންނަނީ ކުރީގެ ކުޅުންތެރިންނާ ގާތް ގުޅުމެއް ބާއްވަމުން ކަމަށް ވެސް ރިޕޯޓުތައް ބުނެ އެވެ.

މެސީ ބާސެލޯނާ އަށް ދަތުރުކޮށްފައިވާއިރު، ކުރީގެ ކުލަބުން އަލުން އޭނާ ހޯދުމުގެ މަސައްކަތް އަންނަނީ ކުރަމުންނެވެ. އެގޮތުން ބާސެލޯނާގެ ނައިބު ރައީސް ރަފައެލް ޔޫސްޓޭ ދާދި ފަހުން ވިދާޅުވީ، ފާއިތުވި ދުވަސްތަކުގައި މެސީއާ ވާހަކަދެކެވިފައި ވާނެކަމަށާއި، ބާސެލޯނާއިން މެސީގެ އަގު ވަޒަންކުރާ މިންވަރު އޭނާއަށްވެސް އެނގޭނެ ކަމަށެވެ. މީގެ އިތުރުން އޭނާ ވިދާޅުވީ އަލުން މެސީ ގެނެވޭތޯ މަސައްކަތް ކުރާ ކަމަށާއި، ބާސެލޯނާގައި މެސީގެ ތާރީޚު ކުރިއަށް ގެންދިއުމަށް ވެސް އެދޭ ކަމަށެވެ. އަނެއްކޮޅުން ޕީއެސްޖީން އަންނަނީ މެސީގެ އެއްބަަސްވުން އައު ކުރުމުގެ މަސައްކަތް ވެސް ކުރަމުންނެވެ. މެސީ ޕީއެސްޖީގެ އެއްބަސްވުން އައު ކޮށްފައި ނުވާތީ، އެ ކުލަބުގެ ސަޕޯޓަރުން ވެސް ވަނީ މެސީއާ ދިމާކޮށްލައިފަ އެވެ.