ރާއްޖޭގައި މެޑިކަލް މާފިއާއެއް އެބައޮތް، ސިއްހީ ވަސީލަތްތައް ހޯދަން ދިމާވާ ގޮންޖެހުމަކީ އެއީ: އެމްއެޗްޕީޔޫ
ސިއްހީ ވަސީލަތްތަކަށް ފައިސާ ދެއްކި ނަމަވެސް ތަކެތި ނުލިބުމުގެ މައްސަލަ ދިމާވޭ
މެޑިކަލް ފެސިލިޓީ އެއް
ރާއްޖޭގައި މެޑިކަލް މާފިއާއެއް އެބައޮތްކަމަށާއި، ސިއްހީ ވަސީލަތްތައް ހޯދަން ދިމާވާ ގޮންޖެހުމަކީ އެއީ ކަމަށް މޯލްޑިވްސް ހެލްތް ޕްރޮފެޝަނަލް ޔޫނިއަން (އެމްއެޗްޕީޔޫ) އިން ބުނެފިއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އެމްއެޗްޕީޔޫގެ އެކްސްކޯ މެންބަރު ހާޝިމް އަބޫބަކުރު ވިދާޅުވީ ރާއްޖޭގައި ސިއްހީ ވަސީލަތްތައް ރާއްޖޭގައި އަދިވެސް މަދު ކަމަށެވެ. އަދި ބޭނުންވާ ދާއިރާތަކުން ވަސީލަތްތައް ގާއިމްކުރުމުގައި ސިއްހީ ވަސީލަތްތައް ހޯދުމުގެ މަރުހަލާގައި ޓްރާންސްޕޭރެންސީ ނުވަތަ ދެ ފުށް ފެންނަ ނިޒާމެއް ނެތުމަކީ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވިއެވެ. އަދި ސިއްހީ ވަސީލަތްތައް ހޯދުމުގައި ވަކި ބަޔަކަށް މަންފާ ވާގޮތަށް ކަންކަން ދޫކޮށްލާފައި އޮތުމުގެ ސަބަބުން ބޮޑެތި ޚަރަދުތަކެއް ސިއްހީ ދާއިރާ އަށް ކުރި ނަމަވެސް އެކަމުގެ އެދެވޭ ނަތީޖާ ނުފެންނަ ކަަމަށް އޭނާ ވިދާޅުވިއެވެ. ހަމައެހެންމެ އެ ދާއިރާގައި ހިނގާ ކޮރަޕްޝަންގެ އަމަލުތައް ބަލާ ފިޔަވަޅު އެޅުމުގައި ވެސް އެކަށީގެންވާ ކުރިއެރުމެއް ނުލިބޭ ކަަމަށް އޭނާ ވިދާޅުވިއެވެ. އެގޮތުން ސިއްހީ ވަސީލަތްތަކަށް ބޭނުންވާ ފައިސާ ދެއްކި ނަމަވެސް އިކުއިޕްމެންޓް ނުލިބުމުގެ މައްސަލަ ދިމާވެފައި އެބަހުރި ކަމަށް އޭނާ ވިދާޅުވިއެވެ.
އެ ޕްރޮގްރާމްގައި އެމްއެޗްޕީޔޫގެ ސެކޭޓްރީ ޖެނެރަލް ފާތިމަތު ޒިމްނާ ވިދާޅުވީ ސިއްހީ ދާއިރާ އަށް ބޭނުންވާ ވަސީލަތްތައް މަދުވުމުގެ ސަބަބުން މުވައްޒަފުންނަށް ވެސް އެކަމުގެ ދަތިތަކާއި ކުރިމަތިވާ ކަމަށެވެ. އެގޮތުން މުވައްޒަފުން އެކަށީގެންވާ ވަރަށް ވުރެ ގިނަ ވަގުތުތަކުގައި މަސައްކަތް ކުރަން ޖެހޭ ކަމަށް އޭނާ ވިދާޅުވިއެވެ. މިއީ ބައިނަލްޢަޤުވާމީ މިންގަނޑުތަކާއި ޑަބްލިއުއެޗްއޯގެ ގައިޑްލައިނާއި ވެސް ޚިލާފު ކަމެއް ކަމަށް އޭނާ ވިދާޅުވިއެވެ.
