ކެނދިކުޅުދޫ ގޭދޮށު މަސް ފެކްޓަރީ ހަދަން ހަވާލުކޮށްފި

ނ. ކެނދިކުޅުދޫގައި ހެދުމަށް ހަމަޖެހިފައިވާ ގޭދޮށު މަސް ފެކްޓަރީގެ މަސައްކަތް ބަޔަކާ ހަވާލުކޮށްފިއެވެ.

އެ ރަށު ކައުންސިލުން ބުނެފައިވާ ގޮތުގައި މި މައްސައްކަތް ހަވާލު ކޮށްފައިވަނީ ހަނދު އިންވެސްޓްމަންޓާއެވެ. މިކަމުގެ އެއްބަސްވުމުގައި މިހާރު ވަނީ ސޮއި ކޮށްފައެވެ.

މި މަސައްކަތް ކެނދިކުޅުދޫ ކައުންސިލުން، ހަނދު އިންވެސްޓްމަންޓާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާގޮތަށެވެ. އެ މަސައްކަތް އެ ކުންފުންޏާ ހަވާލުކޮށްފައިވަނީ 4.4 މިލިއަން ރުފިޔާއަށެވެ.

މިއީ އިންޑިއާ ސަރުކާރުގެ އެހީގެ ދަށުން ކެނދިކުޅުދޫގައި ހަދާ ގޭދޮށު މަސް ފެކްޓަރީ އެކެވެ. މި އެއްބަސްވުމުގައި ދިވެހި ސަރުކާރާ އިންޑިއާ ސަރުކާރާ ދެމެދު އެއްބަސްވުމެއްގައި ސޮއިކުރީ ފެބްރުއަރީ 2021 ގައެވެ.

ގޭދޮށު މަސް ފެކްޓްރީ މަޝްރޫއުގެ ބޭނުމަކީ ރާއްޖޭގައި ބާނާ މަހުގެ ތެރެއިން ކުންފުނިތަކަށް ނުގަނެވޭ މަސްތައް އުކާލުމުގެ ބަދަލުގައި ޕްރޮސެސް ކޮށްގެން ރައްޔިތުންނަށް ނަފާ ހޯދައިދިނުމެވެ. މި މަޝްރޫއުގެ ދަށުން މަސް ފިނިކުރުމާއި މަހުން އެކި ތަފާތު އިތުރު އުފެއްދުންތައް ތައްޔާރުކުރުމުގެ ފުރުސަތުވެސް ފަހިކޮށްދޭނެއެވެ.