ކެނދިކުޅުދޫ ކައުންސިލުގެ ބަޔާނާ ގުޅިގެން އިންކުއަރީއެއް ހަދަން އެލްޖީއޭގެ ބޯޑަށް މައްސަލަ ނުގެންދިޔައީ ކަމުގެ މުއާލާތް ކެނޑިދާނެތީ: ޒުލްފާ
މައްސަލައިގެ އިންކުއަރީއެއް ނުހެދީ ކީއްވެތޯ ބަންޑާރަނައިބު ސުވާލު ކުރެއްވި
ނޫސްވެރިންގެ ބައްދަލުވުުމުގެ ތެރެއިން
ކެނދިކުޅުދޫ ކައުންސިލުގެ ބަޔާނާ ގުޅިގެން އިންކުއަރީއެއް ހަދައި، އެލްޖީއޭގެ ބޯޑަށް މައްސަލަ ނުގެންދެއްވީ ލަސްކޮށްފިނަމަ ކަމުގެ މުއާލާތް ކެނޑިދާނެތީކަމަށް އެ އިދާރާގެ ސީއީއޯ މަރިޔަމް ޒުލްފާ ވިދާޅުވެއްޖެއެވެ.
އާދިއްތަ ދުވަހު އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޒުލްފާ ވިދާޅުވީ، ކައުންސިލުތަކުން އަމަލުކުރަންވީ ގޮތާއި ގުޅޭގޮތުން ހުރިހާ ކައުންސިލުތަކަށް ވެސް އެލްޖީއޭއިން އިލްތިމާސެއް ފޮނުވާފައިވާނެ ކަމަށެވެ.
ކައުންސިލުން ބަޔާން ނެރުނީވެސް އެލްޖީއޭއިން ކައުންސިލުތަަކަށް އެ އެންގުން އަންގާފައިވަނިކޮށްކަަމަށް އޭނާ ވިދާޅުވިއެވެ.
އަދި އެ ބަޔާނަކީ ރައީސްގެ އަބުރުފުޅަށް ނޭދެވޭ އަސަރެއް ކުރުވާނެ ފަދަ ބަޔާނެއްކަަމަށް އަމިއްލަ ޒަމީރު ޤަބޫލު ކުރައްވާކަމަށް ވެސް ޒުލްފާ ވިދާޅުވިއެވެ.
މީގެއިތުރުން އެލްޖީއޭއިން ކައުންސިލަށް އެންގި އެންގުމަކީ އެއީ ލާމަރުކަޒީ ނިޒާމަށް ހަނިކަމެއް ގެންނާނެ ފަދަ އެންގުމެއް ނޫންކަމަށް ވެސް ޒުލްފާ ވިދާޅުވިއެވެ.
ޒުލްފާ ވިދާޅުވީ، އޭޖީ އޮފީހަކީ އެލްޖީއޭގެ ބޯޑަށް ލަފާ އަރުވަން ބާރު ލިބިފައިވާ އިދާރާއެއް ކަމަށާއި، މައްސަލައިގެ އިންކުއަރީއެއް ނުހެދީ ކީއްވެތޯ ބަންޑާރަނައިބު ސުވާލު ކުރެއްވި ކަމަށެވެ.
އެހެންނަމަވެސް، މައްސަލައިގެ އިންކުއަރީއެއް ހިންގައި، އެލްޖީއޭގެ ބޯޑާ ހިސާބަށް މައްސަލަ ނުގެންދިޔައީ މަޑުކޮށްފިނަމަ ކަމުގެ މުއާލާތް ކެނޑިދާނެތީކަމަށް ވެސް ޒުލްފާ ވިދާޅުވިއެވެ.
އެހެންނަމަވެސް، މަރުހަލާ ދިގުވުމަކީ ޤާނޫނުގައި އަމަލުކުރަން އޮންނަ އިޖުރާއަތްތަކާ ޚިލާފަށް ކަންކަން ކުރުމަށް އޮތް އުޒުރެއްތޯ ނޫސްވެރިން ވަނީ ސުވާލުކޮށްފައެވެ.
އޭގެ ޖަވާބުގައި ޒުލްފާ ވިދާޅުވީ، އޭޖީގެ ލަފާފުޅުގައި އޮތީ ޤާނޫނުގައި އޮތްގޮތަށް ކަންކަން ކުރަން އިރުޝާދެއް ދެއްވާފައި ކަމަށާއި، މިދިޔަ ސަރުކާރުތަކުގައި ވެސް އޭޖީގެ އިރުޝާދު އޮއްވައި ސިޓީތައް ފޮނުވާފައިހުރި ކަމަށެވެ.
ޒުލްފާ ވަނީ ކެނދިކުޅުދޫ ކައުންސިލުން ނެރެފައިވަނީ "ނޭދެވޭ ބަޔާނެއް" ކަމަށް ވިދާޅުވެފައެވެ.
އެކަމާ ގުޅިގެން ނޫސްވެރިން ވަނީ ތަކުރާރުކޮށް، ބަންޑާރަނައިބު ދެއްވި ލަފާ އެލްޖީއޭއިން ޤަބޫލު ކުރަންތޯ ނުވަތަ ނުކުރަންތޯ ސުވާލުކޮށްފައެވެ. ނަމަވެސް އެއަށް ޒުލްފާ ސީދާ ޖަވާބެއް ނުދެއްވުމުން ނޫސްވެރިން އަނެއްކާވެސް އެ ސުވާލު ތަކުރާރު ކުރިއެވެ.
އޭގެ ޖަވާބުގައި ޒުލްފާ ވިދާޅުވީ، އޭޖީ އޮފީހުގެ ބަޔާނަކީ ޤަބޫލު ކުރަން ފަސޭހަ ބަޔާނެއް ކަމަށާއި ނަމަވެސް ކުރިއަށް އޮތް ތަނުގައި ވެސް އެލްޖީއޭއިން ދޭން ޖެހޭ އިރުޝާދުތައް ދެމުންދާނެ ކަމަށެވެ.
އަދި އެ ބަޔާން ރަނގަޅުކަމަށް ފަހުން ވެސް ޒުލްފާ ވިދާޅުވިއެވެ.
